PORMAL na naghain ng reklsmo sa Department of Justice (DOJ) si Mamamayang Liberal Party-List Leila De Lima laban sa mga prosecutor.

Nais ng kampo ni De Lima na maimbestigahan ang mga prosecutors na umabuso sa kapangyarihan .

Sa isinumiteng pormal na reklamo ng mambabatas sa pamamagitan ng kanyang kinatawan na si Atty.Dino de Leon, reklamong grave misconduct and gross ignorance of the law ang kanilang inihain.

Sinabi ng kampo ng mambabatas na hanggang ngayon kasi ay hindi pa rin tumitigil ang mga prosecutors sa paghahabol sa kaso ni De Lima .

Ayon sa ML Party-List, naabswelto na ito at nadismis na ang kaso sa hukuman.

Noong July 23, inatasan na rin anya nina Justice Secretary Crispin Remulla at Prosecutor General Richard Fadullon sa pamamagitan ng memorandum noong July 23 ang mga DoJ Prosecutors na i-withdraw o iatras na ang Motion for Reconsideration na dating inihain ng DoJ.

Paliwanag ni Atty.De Leon, nais nilang maimbestigahan ang umano’y umabuso sa kapangyarihan na mga prosecutors .

Dagdag pa ng abogado, ang hakbang na ito ay simula pa lamang dahil nais din nilang papanagutin ang mga nasa likod kung bakit ito nakulong noong panahon ng administrasyong Duterte. (Gene Adsuara)

UMABOT sa mahigit P.2 milyong halaga ng shabu ang nasamsam sa isang hinihinalang tulak ng illegal na droga na naaresto ng pulisya sa ikinasang buy bust operation sa Valenzuela City.

          Sa kanyang ulat kay NPD Acting Director P/BGen. Jerry Protacio, kinilala ni Valenzuela Police OIC chief P/Col. Joseph Talento ang naarestong suspek na si alyas “Bunso”, 38, ng Dulong Tangke, Brgy. Malinta.

          Ayon kay Col. Talento, nakatanggap ang mga operatiba ng Station Drug Enforcement Unit (SDEU) ng impormasyon hinggil sa umano’y illegal drug activities ng suspek.

Nang magawang makipagtransksyon ng isa sa mga operatiba kay ‘Bunso’, ikinasa ng SDEU ang buy bust operation sa pangunguna ni P/Lt Sherwin Dascil, sa koordinasyon sa PDEA.

          Matapos umanong tanggapin ni ‘Bunso’ ang marked money mula sa pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba dakong alas-11:20 ng gabi sa Ibaba St., Brgy. Bignay.

          Nakumpiska sa suspek ang humigi’t kumulang 30 grams ng hinihinalang shabu na may standard drug price na P204,000, buy bust money na binubuo ng isang tunay na P500 bill at pitong P1,000 boodle money, P200 cash at coin purse.

          Ani SDEU investigator P/MSgt. Ana Liza Antonio, kasong paglabag sa Sections 5 at 11, under Article II ng RA 9165 o ang Comprehensive Dangerous Drugs Act of 2002 isinampa nila laban sa suspek sa pamamagitan ng inquest proceedings sa Valenzuela City Prosecutor’s Office. (Richard Mesa)

NALAMBAT ng pulisya ang isa sa Most Wanted Person (MWP) ng Northern Police District (NPD) na akusado sa panghahalay sa isang babaing biktima sa Caloocan City.

          Sa kanyang ulat kay NPD Acting Director P/BGen. Jerry Protacio, sinabi ni ni District Special Operation Unit (DSOU) Officer-in-Charge P/Lt. Col. Emmanuel Gomez na nakatanggap sila ng impormasyon na naispatan ang 23-anyos na si alyas “Cris” sa Brgy. 187, Tala, North Caloocan.

          Agad ikinasa ng mga tauhan ng DSOU ang operasyon sa pangunguna ni Lt.Col. Gomez bitbit ang warrant of arrest na inilabas ng Caloocan City Regional Trial Court (RTC), Family Court Branch 1 laban sa akusado na nahaharap sa kasong panggagahasa.

Hindi naman umano pumalag ang akusado nang dakpin siya ng mga operatiba ng DSOU dakong ala-1:30 ng hapon sa tinutuluyang bahay sa North Sta Rita, Caimito St. Tala, Brgy 187.

Pansamantalang nakapiit sa custodial facility ng DSOU-NPD si alyas Cris habang hinihintay ang utos ng korte para sa paglilipat sa kanya sa Caloocan City Jail. (Richard Mesa)

NANANATILING mga ‘top sector’ ang edukasyon, public works, at kalusugan na makatatanggap ng pinakamalaking alokasyon sa ilalim ng panukalang National Expenditure Program (NEP) para sa 2026.

Ayon sa government budget data na isinapubliko, araw ng Miyerkules, ang ‘top three sectors’ ay mayroong parehong ranking sa 2025 NEP.

Ang panukalang national budget para sa susunod na taon ay nagkakahalaga ng P 6.793 trillion, 7.4% na mas mataas kaysa sa enacted 2025 budget.

Ang sektor ng edukasyon ay makakukuha ng P928.5 billion allocation, public works ay makatatanggap ng P881.3 billion habang ang health sector ay makakukuha ng P320.5 billion sa alokasyon.

Ang Defense ay umakyat sa fourth place na may P299.3 billion, naungusan nito ang interior and local government sector, na bumaba naman sa fifth place na may P287.5 billion.

Ang Agriculture ay tumaas sa sixth place na may P239.2 billion, pagpapalit ng spot sa social welfare, na ngayon ay nasa 7th place na may P227 billion.

Ang Transportation, 8th place na na may P198.6 billion at Judiciary, 9th place na may P67.9 billion, habang ang labor and employment (P55.2 billion) pumasok sa top 10 kapalit ng justice sector.

Sa kabilang dako, sinabi ng Department of Budget and Management (DBM), sa isang budget briefer, na ang 2026 NEP ay naglalayon na panatilihin ang economic growth momentum ng bansa habang pinalalakas ang commitment na “investing in the Filipino people.”

“With the overriding commitment to fulfill our dream of a Bagong Pilipinas , the National Budget seeks to nurture future-ready generations towards achieving the full potential of the nation,” ang sinabi ng ahensya.

Matatandaang, nagbabala ang Department of Budget and Management (DBM) sa mga posibleng pagkaantala ng pagpapatupad ng mga programa, aktibidad at mga proyekto sakaling may mga pagbabago sa mga panukalang pondo para sa 2026.

Ito ay matapos na sabihin ni Pangulong Ferdinand Marcos Jr. sa kaniyang ikaapat na ulat sa bayan na kaniyang ive-veto ang 2026 proposed budget sakaling hindi ito akma sa plano ng gobyerno at sambayanang Pilipino kahit magresulta pa ito sa reenacted budget.

Sinabi ni Budget Secretary Amenah Pangandaman na seryoso si Pangulong Marcos sa pagtiyak na dapat wala ng malaking mga pagbabago sa panukalang pondo o National Expenditure Program (NEP), na kilala bilang pondo ng Pangulo.

Paliwanag ng kalihim na pinag-isipang maigi ng Pangulo kung paano babalangkasin ang naturang pondo, kung saan inabot aniya ang punong ehekutibo kasama ang kaniyang mga gabinete ng anim na buwan sa pagbalangkas ng panukalang pondo para sa susunod na taon.

Babala pa ni Sec. Pangandaman na anumang pagbabago sa 2026 national budget na ipinanukala ng Pangulo ay magpapabagal sa implementasyon ng mga proyekto ng gobyerno, at maaaring maging mahirap para sa mga ahensiya ng gobyerno para ipatupad ang bagong mga programa na isisingit ng mga mambabatas sa mga deliberasyon ng pondo sa Kongreso. ( Daris Jose)

TUMANGGAP si P/Col. Nixon Cayaban, Class President 02-080-DO-2025-001 ng Award of Excellence at Leadership Award sa Closing Ceremony of the Provincial Directors/ City Directors Qualification Course (PD/CD QC) na ginanap noong August 8, 2025 sa PNP Multi-Purpose Center sa Camp BGen Rafael T Crame, Quezon City kung saan nagsilbing Guest of Honor and Speaker si Philippine Nation Police (PNP) Chief P/Gen. Nicolas Torre III. (Richard Mesa)