Nasungkit ni Chezka Centeno ang silver medal sa women’s 10-ball event ng 2025 World Games sa Chengdu, China, matapos matalo sa dikit na laban kontra kay Yu Han ng China, 6-7.

Bumawi si Centeno mula sa 0-3 na umpisa at muntik nang kunin ang gintong medalya, ngunit dahil sa pagkakamali —isang scratch sa safety play ang nagbigay ng pagkakataon kay Han na dominahin ang huling rack.

Bagama’t talo, masaya pa rin si Centeno sa kanyang naging laban.

Ito na ang ikalawang silver medal ng Team Philippines sa World Games, kasunod ng kay Kaila Napolis (ju-jitsu, women’s 52kg), habang si Carlos Baylon Jr. ay nakakuha naman ng bronze sa wushu sanda 56kg class.

Sa kanyang paglalakbay patungong finals, tinalo ni Centeno sina Mayte Ropero ng Spain sa quarterfinals at Shasha Lui ng China sa semis.

Habang sa preliminaries, pinataob niya si Savannah Easton ng Eastados Unidos bago unang natalo kay Yu Han.

NAGTALA ng panibagong world record ang Swedish pole vaulter na si Armand ‘Mondo’ Duplantis.

Nakuha ang clearance na 6.29 meters sa isang torneo sa Budapest.

Ito na ang pang-13 beses na nabasag niya ang record kung saan nitong Hunyo pa lamang ay nagtala ito ng 6.28 meters sa torneo mula sa Stockholm.

Ang nasabing record ay siya ring pangatlo ng 25-anyos na si Duplantis ngayong 2025 na una ay noong Pebrero na mayroong 6.27 meters.

Mula noong maitala ni Sergey Bubka ng Ukraine na siyang unang atleta na nagtala ng clearance ng 6 meters noong Hulyo 13, 1985 sa Paris ay 26 beses na itong nabasag.

Ang 12 ay nalagpasan ni Bubka, 13 beses naman kay Duplantis at isa naman kay Renaud Lavillenie ng France.

Unang nabasag ni Duplantis ang record noong 2020 na mayroong 6.17 meters.

INILATAG ni Manila Vice Mayor Chi Atienza ang estado ng garbage crisis ng Maynila sa ginanap sa Meeting of Governors and Mayors of ASEAN Capitals (MGMAC) kamakalawa.

Sa naturang forum, ipinahayag  ng Bise Alkalde ang mga tungkuling hinarap nila ni Mayor Isko Moreno ukol sa mga garbage at pre-termination notices for waste collection contracts dulot ng isyu sa pondo.

Isa rin sa binanggit ang pagpasa ng 13th City Council sa Resolution No. 147 na ang layunin ay magkaroon ng kolaborasyon ang gobyerno, private sector, mga mamamayan.

Inihayag din ni Atienza ang istratehiya ng Manila gaya ng Comprehensive 10-year Solid Waste Management Plan (2025-2034), na nais abutin ang 56% waste diversion rate sa pamamagitan ng proactive segregation, recycling at pagpapatayo ng 686 material recovery facilities.

Sa huli, iginiit ang pagsasanib pwersa ng mga lider at mamamayan, para sa mas matatag na pagharap sa mga sakuna.

“When leaders and citizens join forces, as we do in ASEAN, there’s no mess we can’t tackle, no crisis we can’t overcome,” Ani Atienza. (Gene Adsuara)

NAKAPAGTALA na ng mahigit sa 1,000 reports ang sumbongsapangulo.ph website simula ng ilunsad ito ni Pangulong Ferdinand ‘Marcos Jr. , araw ng Lunes.

“As of August 11 to 13, 2025, may 84,892 total views, may 1,148 reports, at may 823 feedbacks,” ang sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.

Hindi naman idinetalye ni Castro ang mga report o sumbong mula sa publiko.

Kamakailan ay pormal na inilunsad ni Pangulong Ferdinand Marcos Jr. ang ‘Sumbong sa Pangulo’ o sumbongsapangulo.ph, isang online platform na magbibigay sa publiko ng access sa impormasyon tungkol sa mga flood control project sa buong bansa.

Ayon kay Pangulong Marcos, matagal na rin umanong ginagawa ang naturang website at kahit nasa India siya ay tinatrabaho ito ng pamahalaan.

“(We) put it into a form that is accessible to the public, and most importantly, it is in a form that the public can use so that they can first identify the flood control projects that are within their area,” anang Pangulo.

Dagdag pa niya, maaari ding mag-ulat ng mga iregularidad ang publiko tungkol sa mga proyekto sa kanilang lugar at mapapadali ang paghahanap dito sa pamamagitan ng interactive map feature.

“If they already have information, they can tell us about it. Kung maganda ang naging project, kung hindi naging maganda ‘yung project, anong naging problema,” lahad nito.

Binigyang-diin din ni Pangulong Marcos na mahalaga ang partisipasyon ng mga Pilipino sa pagtukoy ng mga anomalya at sa pagpapatupad ng transparency sa P545 bilyong flood control program.

“Of course, we want the people who have taken advantage of the system to pay… And if there is evidence of corruption, of embezzlement, of any kind of wrongdoing, that’s when we will move,” aniya.

“We cannot do all of this without the help of the ordinary citizen,” dagdag pa ni Pangulong Marcos. ( Daris Jose)

ISINAPUBLIKO ni Pangulong Ferdinand R. Marcos Jr. ang kanyang plano na magtayo ng 10 bagong fish ports na may ‘state-of-the-art facilities at mga kagamitan’ sa bansa.

Bahagi ito ng pagsisikap ng pamahalaan na i-develop ang agri-fishery sector at makamit ang food security.

Ipinahayag ng Pangulo ang kanyang commitment habang pinangunahan ang inagurasyon ng ‘rehabilitated and improved’ Philippine Fisheries Development Authority – Iloilo Fish Port Complex (PFDA-IFPC) sa Barangay Tanza-Baybay, Iloilo City.

Sa naging talumpati ni Pangulong Marcos, tinukoy nito ang kahalagahan ng pagtatayo ng mga bagong fish ports na may pinakamahalagang istraktura gaya ng cold storage facilities, para palakasin ang operational efficiency at tugunan ang logistics issues.

“Kaya inaayos natin itong mga fish port na ganito para dito puwedeng isakay kaagad. Hindi na kailangan isakay sa truck, tapos kung saan-saan pa dadalhin. Napakalaki ang bayad ng transportasyon,” ang sinabi ng Pangulo.

“I’m looking forward ngayon doon sa ating ibang itatayo na… Iyon hindi na rehabilitation ‘yun, bago ‘yun,” dagdag na wika nito.

Ayon pa sa Pangulo, kailangang makipagsabayan ang Plipinas sa mga neighboring countries nito gaya ng Thailand at Vietnam, na pinagtibay ang kahalintulad na sistema para gawing mahusay ang sektor ng pangisdaan, maging globally competitive, at mapalakas ang food production.

Ang mga bagong fish ports ay magiging kapaki-pakinabang sa mahigit sa 2 milyong mangingisdang filipino, inaasahan na mas lalaki ang kita ng mga ito.

“This is why our infrastructure is important, dahil kahit na simpleng-simple lang na disenyo, eh mayroon lang tayong hallway na malaki, napakalaking bagay na kasi magiging sentro na ‘yan para sa ating mga mangingisda na connection,” aniya pa rin.

“They have a connection to our ice plants, they already have a connection to frozen food retailers, to retailers – the small ones and then the small stores that sell them,” ang winika nito.

Ang rehabilitated fish port, pinondohan sa pamamagitan ng Multi-Year National Government Subsidy ng PFDA na may contract price na P885.14 million, ay nakompleto noong Marso, tampok ang mga makabagong pasilidad at dinagdagang kapasidad upang mas makapagsilbi sa mga kliyente at mga stakeholders.

Ang rehabilitated PFDA-IFPC naman ay mayroong 390-kilowatt peak (kWp) Solar Photovoltaic (PV) system na may 1,152 370-watt PV solar panel modules na may nakakabit na pinakamahalagang istraktura kabilang na ang bagong market hall, refrigeration building, cold storage facility, commercial building, public toilet, at administration building.

“Serving as a bustling hub of fisheries and trade in Western Visayas, the PFDA-IFPC is home to more than 1,400 industry players who drive the region’s economy,” ayon sa ulat.

Samantala, sa loob ng bagong market hall ay ang 21 licensed fish brokers na suportado ng 369 helpers, 503 fish viajeros na may 344 helpers, kasama ang 66 major overland fish suppliers, pitong fishing vessel operators, at 37 retailers na tutulungan ng 74 personnel, lilikha ng ‘connected at fast-moving fishery supply chain’ mula karagatan hanggang pamilihan. (Daris Jose)

SHOOT sa selda ang tatlong lalaki na nagsabwatan sa pagnanakaw sa isang kompanya noong nakaraang linggo matapos malambat sa isinagawang follow-up operation ng pulisya sa Valenzuela City.

Sa ulat ni Valenzuela Police OIC chief P/Col. Joseph Talento kay Northern Police District (NPD) Acting District Director P/BGen. Jerry Protacio, pinasok ng mga suspek ang Webert Marketing Corp. sa P. De Guzman St., Brgy. Parada dakong alas-2 ng madaling araw at tumakas, tangay ang malaking halaga ng salapi, mga mobile phones, at mga selyado pang electrical wires.

Bumuo ng Special Investigation Team si Col. Talento sa pangunguna ni P/Maj. Jose Hizon, Assistant Chief of Police for Operation at P/Capt. Robin Santos, OIC ng Station Invetigation and Detective Management Section na silang nagsagawa ng backtracking sa mga kuha ng CCTV camera.

Nagawang matunton ng pulisya nitong Lunes ng gabi ang mga suspek na sina alyas “Edwin”, 34, at “Edward”, 20, sa harap ng Barangay Hall ng Maysilo, Malabon City at nabawi sa kanila ang gamit na motorsiklo, ninenok na mga mobile phones, bolt cutter, electric wires, at ilang dokumento.

Ikinanta naman ng dalawa ang kanilang kasabuwat na si alyas “Gerald”, 33, na caretaker ng kompanya na kalaunan ay nadakip din nitong Miyerkules at nakuha sa kanya ang P14,000 na bahagi ng nakulimbat na salapi. (Richard Mesa)

MULING inihain ng isang mambabatas ang panukalang gawing legal ang paggamit ng marijuana para sa medikal o therapeutic purposes.

Nakapaloob ito sa House Bill (HB) No. 420 na inihain ni Camsur Rep. Miguel Luis “Migz” Villafuerte.

Umaasa ito na maipapasa ngayon 20th Congress ang panukala na magbibigay ng kahit kaunting kaginhawaan sa mga Pilipinong dumaranas ng epilepsy sa pamamagitan ng paggamit ng non-addictive strain ng marijuana.

Ipinanukala rin sa HB 420 ang pagbuo ng Medical Cannabis Office (MCO) bilang pangunahing regulatory, administrative at monitoring agency na siyang mangangasiwa sa importation, cultivation, manufacture at paggamit nito sa bansa.

“This proposed legislation seeks to legalize the medical use of cannabis for qualified patients. It establishes the MCO under the Department of Health (DOH), and which shall exercise administrative, regulatory, and monitoring functions on medical cannabis use, including its cultivation, importation, production, and distribution,” ani Villafuerte.

Legal sa nasa 60 bansa ang paggamit ng medical cannabis kabilang na ang Australia, Canada, Germany, Israel at United Kingdom (UK).

(Vina de Guzman)

NAKATAKDANG talakayin ng kamara sa Lunes (Agosto 18) ang pagrerebyu at deliberasyon ng National Expenditure Program (NEP) para sa panukalang P6.793-trillion national budget para sa fiscal year 2026, natinatayang tatapusin pagdating ng Oktubre 10.

Inihayag ito ni House Committee on Appropriations chairperson at Nueva Ecija Rep. Mikaela Angela Suansing sa isang press briefing matapos na isumite ng Department of Budget and Management (DBM) ang NEP kay Speaker Ferdinand Martin Romualdez nitong Miyerkules.

“As we always do and as the Speaker said, we will do our best to finish the budget as soon as possible. So we will work hard po, tuluy-tuloy iyong ating mga deliberasyon para po kung kakayanin natin ay ma-approve na rin po on third and final reading. We will work as fast as we can at kung anuman po ang kaya nating tapusin on Oct. 10,” ani Suansing.

Orihinal na nakatakdang umpisahan ng Kamara ang deliberasyon ng badyet simula Setyembre 1, 2025. Sa pagkakasumite ng NEP, maagang sisimulan ang pagtalakay dito na gagawain sa Lunes (agosto 18).

Sinabi ni Suansing na nakalista na ang gagawing reporma ng kamara tulad ng pagbuwag sa small committee, open bicam at pagsali ng civil society organizations (CSOs) sa committee deliberations.

“We would like to do the reforms in the course of the (budget) deliberations. That’s why we want to allow for more time for the deliberations so we are starting on Aug. 18 all the way through Oct. 10,” pahayag nito.

(Vina de Guzman)

NANAWAGAN si Las Piñas Lone District Rep. Mark Anthony Santos sa Department of Public Works and Highways (DPWH) na agad magpatupad ng one-strike policy laban sa mga personnel, partikular na ang mga district engineers na napatunayang sangkot sa korupsyon o iregularidad sa kanilang hurisdiksyon.

Ayon kay Santos, importante na magkaroon ng agarang aksyon upang maibalik ang tiwala ng publiko at masiguro na ang pondo para sa imprastraktura ay nagagamit ng tama at transparent para na rin sa ikabubuti ng komunidad.

“Public works projects are vital to national development. We cannot allow corrupt practices to compromise the quality, safety, and integrity of these initiatives. DPWH Secretary Manuel Bonoan must adopt a zero-tolerance approach, and that starts with immediately removing officials involved in anomalies,” anang mambabatas.

Isinuwestiyon pa ng bagitong mambabatas na ilipat o ilagay sa floating status ang sinumang district engineer na napatunayang sangkot sa korupsyon, ghost projects, bribery mula sa contractors, at iba pang anomalya.

Inihalimbawa nito ang ginawa ng Philippine National Police may limamg taon na ang nakalilipas na one-strike policy sa kampanya nito laban sa illegal gambling, agad na pag-relieve sa station commanders na nabigong umaksyon laban sa naturang aktibidad sa kanilang lugar.

Ganito ring polisiya ang ipinatupad sa mga hepe ng pulisya na ang subordinates ay nahuli o nakasuhang sangkot sa illegal drugs.

(Vina de Guzman)

PARA sa mas mahusay na pangangalagang pangkalusugan sa Northern Cebu, nanawagan ng suporta si Rep. Duke Frasco mula sa Cebu Provincial Government para sa pagpasa ng panukalang mag-a-upgrade sa provincial hospital sa Danao City.

Bukod sa provincial government, umapela rin ng suporta ang mambabatas kay Cebu Governor Pam Baricuatro para sa pagpasa ng House Bill No. 3313 o “An Act Upgrading the Cebu Provincial Hospital in the City of Danao, Province of Cebu, Into a Level II General Hospital to be Known as the North Cebu Medical Center, Increasing its Bed Capacity, Upgrading its Professional Health Care Services and Facilities, Authorizing the Increase of its Medical Personnel, and Appropriating Funds Therefor.”

Layon ng panukala na makapagbigay ng mas mahusay na healthcare access at serbisyong pangkalusugan hindi lamang para sa District 5, kundi sa lahat ng munisipalidad ng Northern Cebu.

Ang pangangalagang pangkalusugan, edukasyon at imprastraktura ang nananatiling pangunahing prayoridad ng mambabatas. Sa pamamagitan ng HB No. 3313, ay layon nitong maipamahagi ang health services partikular na sa liblib at malalayong lugar kung saan kulang ang access sa specialized care.

Una nang inihain ng mambabatas ang panukala noong18th Congress o Disyembre 16, 2020 blilang House Bill No. 8275 subalit dala na rin sa pandemya at kakulangan ng panahon ay hindi ito naipasa. Noong 19th, Hunyo 30, 2022 ay muling inihain ng kongresista ang House Bill No. 107. Sa kabila na naitakda para sa deliberasyon sa komite ay nanatili itong nakabinbin habang hinihintay ang pagpasa ng provincial board resolution mula sa Cebu Provincial Board bilang suporta sa panukala. Ang kawalan ng nasabing endorsement ay may malaking epekto sa deliberasyon ng komite sa panukala.

Ngayong nasa ikatlong termino, muling inihain ni Frasco ang panukala sa ika-20th Congress.

Umaasa ito na maire-refer ito sa Committee on Health at makakuha ng suporta mula sa provincial government.

Kapag ganap na naging batas, mai-institutionalize ng panukala ang provincial hospital sa ilalim ng Department of Health (DOH), kung saan makakakuha ito ng direct funding mula sa national government. Maaalis sa Cebu Provincial Government ang financial responsibility para sa operasyon ng ospital at magagawang mai-redirect ang resources nito sa ibang programa at serbisyo.

Ani Frasco, “this is not just about improving the hospital, it is about investing in the future of healthcare for my constituents, while also being fiscally prudent.”

Isinusulong din sa panukala na matugunan ang problema sa overcrowding sa Vicente Sotto Memorial Medical Center (VSMMC) sa Cebu City, isang tertiary-level hospital na naninilbihan sa mga pasyente mula sa buong probinsiya at kalapit na rehiyon. Dala na rin sa lumalagpas na sa kapasidad ng operasyon ang VSMMC ang pag-upgrade sa Danao hospital ay makakatulong sa pagbibigay ng serbisyo sa norte.

“By establishing a fully capable Level II hospital in Northern Cebu, we will help decongest VSMMC and ensure that patients from distant municipalities will not have to travel far just to get life-saving treatment,” pagtatapos ni Frasco.

(Vina de Guzman)