AABOT na sa 10% o katumbas ng 170,000 ng rehistradong Pilipinong botante sa ibang bansa ang nakaboto na ayon sa Commission on Election (Comelec).

Ayon kay Casquejo nasa kabuuang 76,745 katao na ang nakabboto sa Asia Pacific.

Nasa 13,462 overseas voters naman ang nakaboto na sa Europe, 83,450 Pilipino ang nakaboto naman sa Middle East at Africa.

Sa America nasa inisyal na 1,809 overseas voters ang nakaboto na.

Sa ngayon, hindi pa inisyal pa lamang ang naturang bilang ng overseas voters habang inaantay pang makapagsumite ang ilang foreign service posts gaya ng Philippine embassies, consulates, foreign service establishments, at iba pang Philippine government agencies abroad.

Kaugnay nito, nagpahayag ng pagkabahala si poll Commissioner Marlon Casquejo sa overseas voting sa ngayon na nasa humigit kumulang 175,266 botante pa lamang ang nakaboto bagamat hindi pa ito accurate dahil ilang mga posts ang hindi nakapagsumite ng bilang ng overseas voters na nakapadala na ng kanilang mail-in ballots.

NAGBABALA si Pangulong Rodrigo R. Duterte ng “worst possible outcome” para sa buong mundo sa gitna ng patuloy na banta ng Russia sa posibilidad na gamitin ang tactical o low-yield nuclear weapons laban sa Ukraine.

Sa naging talumpati ng Pangulo sa Lapu-Lapu City, Cebu sa idinaos na 501 taong anibersaryo ng Victory of Mactan, nagpahayag ng pagtutol si Pangulong Duterte sa nuclear threats ni Russian President Vladmir Putin at mangamba na ito na ang maging katapusan ng mundo.

“Putin’s threat is not good. If he really presses the button there and it goes nuclear and they use nuclear armaments, I think that my brother Lapulapu is waiting for all of us there in heaven because the world will melt,” ayon sa Pangulo.

Hindi naman nagbigay pa ng ibang detalye si Pangulong Duterte subalit iginiit nito ang kahalagahan ng pagkakaroon ng posisyon sa ginawang pagsalakay ng Russia sa Ukraine.

“Our history is evolving, the history of our world. How we react, how we define ourselves, how we would stand in this conflict if it really goes nuclear,” ayon pa rin sa Punong Ehekutibo.

Matatandaang, nanindigan si Pangulong Duterte na dapat ay manatiling neutral ang Pilipinas hinggil sa nagpapatuloy na sigalot ngayon sa pagitan ng Russia at Ukraine.

Ipinahayag ito ng pangulo sa kanyang naging talumpati sa Palo, Leyte at sinabing mas makakabuti para sa bansa na hindi makisali dito sa kadahilanang hindi dapat madamay o makaladkad ang Pilipinas sa naturang sitwasyon ng krisis.

Hangga’t siya ang tumatayong presidente ng Pilipinas ay sinabi rin ni Duterte na tatanggi siya na magpadala ng mga sundalong Pilipino sa bansang sinalanta ng digmaan kahit na maging kahilingan pa ito ng Estados Unidos dahil sa pangamba na ito ay maaaring mag resulta lamang ng spill over na magdudulot ng aktwal na giyera dito sa Pilipinas. (Daris Jose)

MAHIGIT sa 1 milyong tao na ang inilikas mula sa Ukraine patungo sa Russia mula noong Pebrero 24.

Sinabi ni Russian Foreign Minister Sergei Lavrov, kabilang sa 1.02 million individuals ang 120,000 foreigners at ang mga taong inilikas mula sa Russian-backed breakaway regions ng Ukraine na tinatawag na Donetsk at Luhansk People’s republics.

Ayon sa data mula sa United Nations, higit sa 5.4 milyong tao ang tumakas sa Ukraine mula nang magsimula ang pagsalakay.

Tinatawag ito ng Moscow na isang “espesyal na operasyon” upang i-demilitarize at “i-denazify” ang Ukraine.

Sinasabi ng Ukraine at ng West na ang Russia ay naglunsad ng isang walang dahilan na war of aggression.