UMAABOT sa 75 ka­tao ang naratay dahil sa posibleng food poisoning matapos na kumain ng galunggong at tahong sa Brgy. Inirangan, Bayambang, Pangasinan, ayon sa ulat kahapon.

Sa report ng Municipal Health Office sa Office of Civil Defense Region, ang kinain na galunggong at tahong ay binili ng mga residente sa isang vendor.

Sinusuri na rin ng mga health experts ang sample ng nakain ng mga biktima upang mabatid kung alin sa galunggong at tahong na nakain ng mga ito ang posibleng nakalason sa mga biktima.

Nakauwi na sa kani­lang mga tahanan ang ilan sa mga nalasong residente matapos na malapatan ng pangunahing lunas habang ang iba pa ay patuloy na nagpapagaling sa ospital.

Gayunman, matapos makain ang galunggong at tahong ay nagsimula nang makaranas ng matinding pananakit ng tiyan at ulo, pagsusuka, paninigas ng kalamnan at matinding pagkahilo ang mga tao sa nasabing barangay.

Agad silang isinugod sa pagamutan para malapatan ng lunas.

Kasalukuyan namang inaalam kung ang nakain ng mga biktima ay nagtataglay ng red tide toxin.

ON HOLD pa rin ang Overseas voting sa Shanghai, China dahil pa rin sa mga lockdown na ipinaiiral ngayon doon.

Sa kabila ito ng unti-unting pagbaba ng mga kaso ng COVID-19 sa lungsod kung saan ay mas mababa na lamang sa 20,000 ang bilang ng ma naitatala sa araw-araw.

Inamin ni Consul General Josel Ignacio na dahil sa mga lockdown ay hindi pa rin nakukuha ng konsulado ang election materials mula sa Chinese Customs.

Ngunit aniya sa ngayon ay patuloy pa rin ang kanilang pakikipag-ugnayan sa Shangkai Foreign Affairs Office upang mapahintulutan na muli ang kanilang pagbubukas.

Mayroon naman daw kasing iba pang paraan para makaboto ng personal sa foreign service posts ang mga kababayan natin doon, tulad ng Philippine Consulates sa Xiamen, Hong Kong, at Macau.

Kinakailangan lamang na makapaghain ang mga ito ng kanilang manifestation para bumoto sa isa pang post bago sumapit ang April 30.

Samantala, batay sa pinakahuling datos ay tinatayang nasa 1,600 ang kabuuang bilang ng mga rehistradong Filipino overseas voters sa China, karamihan sa mga ito ay mula sa Shanghai habang ang ilan naman ay nasa Zhejiang, Jiangsu, Anhui, at Hubei.

AABOT sa halos 8.5 million mananakay ang naserbisyuhan ng libreng sakay ng Metro Rail Transit Line 3 sa unang buwan ng program.

Ayon sa pamunuan ng MRT-3 na nasa kabuuang 8,472,637 ridership mula Marso 28 hanggang Abril 30.

Nakitaan ng 27.8% na pagtaas ang average number ng mga pasaherong sumasakay sa MRT-3 tuwing weekdays matapos na ilunsad ang naturang programa.

Umaabot sa 241,800 ang weekly average ng mga pasahero mula Marso 1 hanggang 27 at tumaas ng 309,013 ang bilang ng mga pasahero mula Marso 28 hanggang Abril 30 ng kasalukuyang taon.

Naitala naman ang highest single-day ridership noong April 8 na nasa 335,993 passengers.

NATUKOY na apat lamang ang close contact sa Quezon City ng unang kaso ng Omicron subvariant BA.2.12.

Nilinaw ni Dr. Rolly Cruz, head of the City Epidemiology and Surveillance Unit (CESU) ang reports hinggil sa 9 na residente na nagkaroon umano ng contact sa 52 anyos na dayuhang mula sa Finland na nakumpirmang nagpositibo sa omicron subvariant.

Aniya, apat lamang ang nakasama ng Finnish national sa seminar na kanilang dinaluhan sa lungsod ng Baguio.

Tatlo dito ang nakaquarantine na at negatibo na sa COVID-19 habang ang isa naman sa mga close contact ay napaulat na umalis na ng bansa kasama ng Finnish national.

Maaalala na dumating sa bansa ang fully vaccinated na dayuhan mula Finland noong Abril 2. Nagtungo ito sa isang unibersidad sa Quezon City saka bumiyahe patungong Baguio city para magsagawa ng seminars.

Sa isinagawang contact tracing ng local epidemiology and surveillance unit sa baguio, nasa 9 na asymptomatic close contacts ang natukoy, dalawa dito ay negatibo na sa COVID-19.

Matapos makumpleto ang 7 day quarantine at makarekober sa sakit, bumalik ito sa finland noong Abriil 21.