Lusot na sa Special Committee on Persons With Disabilities ang panukala na magkakaloob ng buwanang pensiyon sa mga kababayang may kapansanan o persons with disablity (PWDs). 

Sa ilalim ng House Bill 7571 na inihain ni Bohol Rep. Alexie Tutor, layon dito na magtatag ng Social Pension Program sa ilalim ng Department of Social Welfare and Development (DSWD) at matulungan ang mga may kapansanan na lubhang apektado ng COVID-19 pandemic.

Sa programang ito, ginagarantiya na ang lahat ng mga rehistradong PWDs ay mabibigyan ng social pension na P1,000 kada buwan.

Maaaring ipamahagi ang pensyon ng mga PWDs ng quarterly, semiannually o annually.

Isinusulong din ng panukala ang pagbuo ng National Registry for PWDs na magiging basehan para sa special PWD classification ng Philippine Identification System.

Isasama rin ang mga PWDs bilang benepisyaryo ng microfinance, microinsurance at microenterprise programs at projects ng pamahalaan nang sa gayon ay mabigyan ng hanapbuhay ang nasabing sektor. (ARA ROMERO)

Nagbigay ng tax refund ang Pamahalaang Lungsod ng Navotas sa mga nagkaroon ng karagdagang multa dahil sa huling pagbabayad matapos na dalawang beses nang magbigay ng palugit para sa pagbabayad ng lokal na buwis.

Nilagdaan ni Mayor Toby Tiangco ang City Ordinance 2020-45 na nagkakaloob ng tax refund sa mga taxpayers na nagbayad ng surcharges, penalties at interes sa lahat ng  lokal na buwis at bayarin na due at na-assess noong Setyembre September 14, 2020 hanggang sa petsa ng pagiging epektibo ng ordinansa.

“Most of our constituents are still reeling from the economic impact of the COVID-19 pandemic. We want to ease their burden and help them in every possible way,” ani Tiangco.

Ang mga taxpayers na may makukuhang tax refund ay maaaring makipag-ugnayan sa City Treasurer’s Office sa ikalawang palapag ng Navotas City Hall.

Ang City Ordinance 2020-45 ay alinsunod sa Department of Finance Circular No. 003-2020, kung saan nakasaad na “payment of all local taxes, fees and charges falling on or after September 14, 2020 shall be extended until December 19, 2020 without interest, surcharge or penalty.

Nauna rito, ipinasa sa Navotas ang City Ordinance No. 2020-25 at 2020-35 na nagpapaliban sa pagbabayad ng real property tax, business tax, at transfer tax. (Richard Mesa)

NAKIUSAP ang Malakanyang sa publiko na hintayin na lang muna ang guidelines na ilalabas ng Department of Transportation (DOTr)  at  Land Transportation Franchising and Regulatory Board (LTFRB) ukol sa pagbabalik ng provincial buses na  point-to-point routes bago pa mag-isip na bumiyahe.

“Hintayin lang po natin ang guidelines na ilalabas ng DOTr (Department of Transportation) at LTFRB ukol dito,”ayon kay  Presidential Spokesperson Harry Roque.

Nauna rito, inaprubahan nina Pangulong Rodrigo Roa Duterte at ng kanyang gabinete ang pagbabalik ng  provincial buses na  point-to-point routes.

Layon kasi ng pamahalaan na mas palawakin pa ang muling pagbubukas ng ekonomiya  matapos na manamlay dahil sa   COVID-19 pandemic.

Nagpulong kasi sina Pangulong Duterte at ang mga miyembro ng gabinete, araw ng Lunes kung saan napagkayarian na payagan na ang  “provincial buses in point-to-point routes na inaprubahan ng LTFRB at  local government unit ng destinasyon kabilang na ang  stop-over/transit terminals,” na magbalik operasyon, ayon sa inter-agency task force against COVID-19.

“Point-to-point provincial buses shall be allowed unhampered passage through the different LGUs en route to the LGU of destination,” ang nakasaad sa kalatas ng  task force.

Matatandaang, sinuspinde ng mga awtoridad noong Marso  ang lahat ng mode ng public transport.

Kamakailan ay pinaluwag naman ng mga miyembro ng gabinete ang   transport restrictions, bilang paghahanda sa pagbubukas  ng ekonomiya matapos ang ilang buwan na naka-lockdown ang iba’t ibang lugar sa bansa dahil sa pandemiya. (Daris Jose)