SINABI ng Malakanyang na walang problema sa usapin ng pondo ang pamahalaan para mabayaran ang utang ng PHILHEALTH sa Philippine National Red Cross.

Giit ni Presidential Spokesperson Harry Roque na kung sa kakayahang magbayad ng gobyerno para ayusin na ang atraso sa PNRC ay kaya naman nito.

Iyon nga lamang ay kailangan lang na may daanang procedures alinsunod o subject to government audit rules.

Mayroon lang umanong dapat plantsahin sang-ayon sa panuntunan ng Commission on Audit o COA.

So mayroon lang pong paplantsahin sang-ayon nga sa mga rules din ng COA. Pero kung nag-offer na po ang PhilHealth 50%, kung tinanggap na po iyon matagal na pong bayad iyong 50%. Pero ang gusto po ng Red Cross ay 100% ang mababayaran,” paliwanag ni Sec. Roque.

Maliban dito ay inihirit din ni Sec. Roque na dapat din sanang magkaruon ng reconciliation sa halaga ng testing na siningil sa mga nai- swab ng PNRC.

Mas mababa dapat ang ibawas sa PHILHEALTH kung ang machine na ginamit sa isang nagpa-test ay donation kasama na ang testing kits.

“Well, kailangan po siguro mag- reconciliation. Kasi ang aking paningin diyan iba-iba kasi ang halaga ng testing depende kung donated iyong machine at depende kung donated iyong testing kit,” ayon kay Sec. Roque.

“Bagama’t ang case rate po ay P3,500 pero mas mababa po talaga ang dapat masingil sa PhilHealth kung ang machine po ay donated at ang testing kits nga po ay donated. Sa tingin ko reconciliation lang iyan so wala pong problema iyan. Ang gobyerno naman po eh, kaya nga po napakaimportante nang tinatawag nilang sovereign guarantee right, kahit gaano ka kahirap, kahit gaano ka kayaman basta naman gobyerno ang nag- assure na magbabayad eh tinatanggap po iyang assurance na iyan dahil hindi naman po tayo mauubusan ng pera,” dagdag na pahayag nito. (Daris Jose)

SA hindi na mabilang na pagkakataon ay muli na namang ipinagtanggol ni Pangulong Rodrigo Roa Duterte si Health Secretary Francisco Duque III.

Nahaharap kasi si Sec. Duque sa alegasyon ng korapsyon.

Si Duque, chairman ng board of state medical insurer PhilHealth kung saan ang mga opisyal ay inakusahan sa Senate hearing ng pambubulsa ng P15 billion ng state funds.

Sinabi ng isang whistleblower na si Sec. Duque di umano ang “Godfather” ng PhilHealth mafia.

“Si Duque, walang nanakaw kung pera ang pag-usapan. Maybe some other things, there might be some other thing pero corruption, pera? Wala,” ayon kay Pangulong Duterte.

Binasura naman ni Pangulong Duterte ang makailang ulit na panawagan na magbitiw na sa puwesto ang Kalihim.

“For what? Secretary Duque was not a part of PhilHealth. As a matter of fact, he was not even reporting,” ayon sa Pangulo.

Si Duque, isa ring PhilHealth board chair ay kabilang sa mga opisyal na inirekomenda ng Senado na sampahan ng kasong irregularities sa state insurance agency

Sa kabila ng paulit-ulit na pagtatanggol ni Pangulong Duterte kay Sec. Duque, sinabi ng Malakanyang na nananatiling “open-minded” ang Chief Executive

“As a lawyer, he (Duterte) is also open-minded to the fact na mayroon siyang binuong task force, mayroon po talagang kapangyarihang mag- imbestiga ang Senado at kung mayroon pong ebidensya, titingnan ni Presidente ang ebidensya,” ang pahayag ni Sec. Roque.

“By way of precedent with the Morales incident, hindi niya ina-absolve, hindi niya dini-discourage ang mga pag-iimbestiga,” aniya pa rin.

Sa kabilang dako, nagpahayag naman ng kumpiyansa si Pangulong Duterte kay dating PhilHealth president at CEO Ricardo Morales subalit sa kalaunan ay hiniling niya rito na magbitiw dahil sa alegasyon ng korapsyon na nalantad sa Senate investigation. (Daris Jose)