IGINIIT ng Pamahalaang Lungsod ng Maynila na legal at naaayon sa Konstitusyon ang Ordinance No. 9151 na nagtatakda ng updated garbage collection fees para sa mga negosyo sa lungsod.
Ayon kay City Legal Officer Atty. Luch Gempis Jr., hindi dapat ikumpara ang ordinansa sa Quezon City case na tinalakay ng Korte Suprema dahil magkaiba ang saklaw at layunin.
Sa QC, household at condominium ang siningil at inilaan ang kikitain para sa socialized housing, samantalang limitado sa business establishments ang revised garbage fees ng Maynila at itinuturing na regulatory fee, hindi buwis.
Sinabi rin ni Gempis na huling na-update noong 2013 ang garbage fees sa kabila ng pagtaas ng volume ng basura at mas mataas na hauling at disposal costs, lalo na nang i-redirect ng MMDA ang pagtatapon sa San Mateo Landfill sa Rizal.
Ayon naman kay City Treasurer Atty. Paul Vega, layunin ng ordinansa na bawasan ang agwat ng nakokolekta ng lungsod at aktwal na gastos sa waste collection.
Tiniyak ng Bureau of Permits na system-generated ang assessments at bukas ang mga tanggapan para sa paglilinaw mula sa mga negosyo. (Gene Adsuara)

ISA ang Dr. V. Orestes Romualdez Educational Foundation (DVOREF) College of Law sa Top 5 law schools sa bansa na may mataas na passing percentage sa 2025 Bar Examinations, base sa official data na ipinalabas ng Supreme Court (SC).
Nakapagtala ang DVOREF ng 80.19% passing rate sa mga
first-time examinees mula sa schools na may mahigit sa 100 candidates, na 4th overall, na una sa San Beda College of Law–Alabang at kasabayan sa ibang nangungunang institutions, kabilang na ang Ateneo de Manila University, University of the Philippines, at University of Santo Tomas.
Sa 106 examinees, nasa 85 ang pumasa sa Bar, na naglagay sa DVOREF na tanging law school sa probinsiya sa national Top 5.
Ang DVOREF College of Law ay pinamumunuan ni Leyte Rep. Ferdinand Martin Romualdez, na nagtapos ng Bachelor of Laws mula sa University of the Philippines College of Law.
“This achievement shows that excellence in legal education is not confined to Metro Manila,” Romualdez said. “I thank our administrative staff, faculty members, students, and parents for standing with us every step of the way and for helping turn our shared goal into reality,” ani Dean Romualdez.
(Vina de Guzman)

NAGHAIN sina Senior Deputy Minority Leader at Caloocan City 2nd District Rep. Edgar R. Erice, at ML Rep. Leila M. de Lima, ng Petition for Certiorari and Prohibition sa Korte Suprema na kumukuwestiyon sa konstitusyonalidad ng Unprogrammed Appropriations sa 2026 General Appropriations Act, Huwebes ng umaga.
Layon ng petisyon na ito na ipawalang-bisa ang Section XLIII ng 2026 GAA at humihiling ng agarang temporary restraining order at iba pang injunctive reliefs upang pigilan ang pagpapatupad ng mga probisyong ito habang dinidinig ang kaso.
Ayon sa mga petitioner, ang unprogrammed appropriations ay nagpapahintulot ng paggastos ng pondo ng bayan nang walang malinaw at umiiral na pinagkukunan ng pondo, na labag sa Saligang Batas at lumilikha ng isang “budget sa loob ng budget.”
Anila, nagdudulot ito ng seryosong banta sa transparency, pananagutan, at sa balanseng hatian ng kapangyarihan sa pamahalaan.
Tinukoy sa petisyon ang paglabag sa ilang probisyon ng 1987 Constitution, kabilang ang mga patakaran sa budget ceiling, contingent appropriations, at wastong paglalaan at paggastos ng pondo ng publiko.
Para sa 2026, mula sa halos ₱249.9 bilyong iminungkahing unprogrammed funds, ₱243.4 bilyon ang inaprubahan ng Kongreso. Matapos ang ₱92.5 bilyong veto ng Pangulo, humigit-kumulang ₱150.9 bilyon ang nanatili, na ayon sa mga petitioner ay patuloy na may panganib na mailabas at magastos nang labag sa Konstitusyon.
Binigyang-diin ng mga petitioner na kapag nailabas na ang pondo ng bayan, hindi na ito maaaring bawiin, kaya’t mahalaga ang agarang interbensiyon ng Korte Suprema gamit ang pinalawak nitong kapangyarihan ng judicial review.
Samantala, iginiit ni Rep. Erice na ang paghahain ng petisyong ito ay isang hakbang upang ipagtanggol ang integridad ng pambansang badyet at matiyak na ang pondo ng bayan ay ginagastos alinsunod sa Konstitusyon at sa tuntunin ng batas. (Richard Mesa)