SINABI ng Malakanyang na nagtitiwala si Pangulong Ferdinand R. Marcos Jr. kay dating Department of Public Works and Highways (DPWH) secretary Manuel Bonoan na magsasalita ng totoo sa oras na humarap na ito sa Senate investigation hinggil sa di umano’y iregularidad sa public infrastructure projects.
Sinabi ni Presidential Communications Office (PCO) Undersecretary at Palace Press Officer Claire Castro na naniniwala si Pagulong Ferdinand Marcos Jr., na naiintindihan ni Bonoan na seryoso ang pagpapatotoo sa harap ng Senate Blue Ribbon Committee, kung saan ang mga pahayag ay isinasailalim sa isang panunumpa.
“Naniniwala po ang Pangulo na si dating secretary Manny Bonoan ay magsasabi ng katotohanan lalong-lalo naman po na siya ay nasa Senado at under oath ang kaniyang mga sinasabi. So, kailangan lamang po tayo umasa na mga katotohanan lamang ang kaniyang sasabihin,” ang sinabi ni Castro sa press briefing sa Malakanyang.
Patuloy kasi ang ginagawa ng Senate Blue Ribbon Committee na imbestigasyon ukol sa di umano’y anomalya na nagsasangkot sa infrastructure projects.
Sa katunayan, kabilang sa humarap sa pagdinig ang mga pina-subpoena na sinasabing sabit sa isyu na sina dating DPWH Secretary Manuel Bonoan, dating DepEd Usec. Trygive Olaivar, dating Special Envoy to China Maynard Ngu, Commission on Audit Commissioner Mario Lipana, DPWH Region 4B Regional Director Engr. Gerald Pacanan at DPWH NCR Regional Director Engr. Gerard Opulencia.
Samantala, binigyang diin ni Castro na ang Senate hearings ay may gabay ng mahigpit na ‘rules at legal accountability’, sabay sabing ang mga testigo ay dapat at kinakailangan na magsabi ng totoo o mahaharap sa posibleng legal consequences. ( Daris Jose)

HINIKAYAT ng Malakanyang ang publiko na galugarin o lakbayin ang iba’t ibang destinasyon sa Pilipinas sa gitna ng napaulat na mga paghihirap na kinahaharap ng mga travel agencies para makakuha ng Japanese visa appointments para sa kanilang kliyente.
Sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na ang alalahanin sa kakapusan ng appointment slots para sa Japanese visas ay isinangguni na sa Department of Foreign Affairs (DFA).
“Pansamantala, habang sila ay naghihintay ng kanilang visa na i-issue ng bansang Japan, ito nama’y kanilang polisiya at iginagalang natin ito,” ayon kay Castro.
Subalit habang ang usapin ay tinutugunan, hinikayat naman ni Castro ang mga byahero na bisitahin ang mga local tourist destination, sabay sabing makatutulong ito para mapalakas ang domestic economy.
“Pero habang sila’y naghihintay, mas maganda sigurong i-explore ng ating mga kababayan ang Pilipinas,” aniya pa rin.
“Iangat din natin ang turismo ng Pilipinas at kung sila ay kikita dahil sa travel tax at kita ng mga tourism agencies, mas kikita rin sila kung iaangat nila ang turismo ng Pilipinas,” dagdag na wika ni Castro.
Samantala, nagpasaklolo naman ang Global Tourism Business Association, Inc. (GTBA) sa Japanese Embassy ukol sa patuloy na kakapusan ng appointment slots para sa Japanese visas.
Ito’y matapos na mapaulat ang paghihirap na dinarasan ngayon ng travel agents na matulungan ang kanilang kliyente na makakuha ng kinakailangang dokumento para makapasok sa Japan.
Sinabi ng GBTA na mayroong advisory mula sa VFS Global, official partner ng Japan embassy para sa scheduling, na ang susunod na available appointment slots para sa Japan visa ay inilipat sa Abril.
(Daris Jose)

SINABI ng Malakanyang na ang mambabatas na nag-endorso ng impeachment complaint laban kay Pangulong Ferdinand Marcos Jr., sa Mababang Kapulungan ng Kongreso ay isang kontratista na dawit sa maanomalyang flood control projects.
Napaulat na isa sa walong contractors na nabanggit sa Independent Commission for Infrastructure (ICI) ang Pusong Pinoy Party-list na kinatawan si Representative Jett Nisay sa iniimbestigahan na flood control projects.
Nang tanungin si Presidential Communications Office (PCO) Undersecretary at Palace Press Officer Claire Castro kung ano angn masasabi niya kay Atty. Andre de Jesus – naghain ng impeachment complaint laban sa Pangulo at kay Pusong Pinoy Party-list Rep. Jett Nisay na nag-endorso ng impeachment complaint , sinabi ni Castro na wala siyang personal knowledge ukol sa kanilang intensyon.
“Ang alam lang natin sa ngayon, ang party-list na nag-endorse ay isa sa walong contractors na nabanggit ng ICI,” ang sinabi ni Castro.
Matatandaang, sa huling bahagi ng Nobyembre, inirerekomenda ng Independent Commission for Infrastructure (ICI) ang paghahain ng criminal at administrative complaints laban sa ilang several “contractors” o mga mambabatas na sinasabing nagmamay-ari ng kompanya na nakasungkit ng government projects.
Si Nisay, di umano’y nauugnay sa JVN Construction and Trading, ay di umano’y napagkalooban ng 3 infrastructure projects mula 2021 hanggang 2022, na may price tag ng mahigit sa P73 million.”
“JVN Construction and Trading (‘JVN’) is a sole proprietorship owned by Rep. Jernie Jett Nisay (‘Rep. Nisay’), who has been serving as a representative of the Pusong Pinoy Partylist since 2022 up to the present,” ayon sa ICI referral noong Nov. 26.
Samantala, iginiit ni House Speaker Faustino Dy III na wala siyang nakikitang basehan para bigyang katuwiran ang impeachment complaint laban kay Pangulong Marcos.
Kasabay nito, sinabi ni Dy na hindi dapat na ginagamit ang impeachment complaints sa pamumulitika.
Ipinaliwanag pa ni Dy na ang pagtutuunan ng pansin ng Kamara sa pagbubukas ng sesyon ang paglikha ng mga mahahalagang batas.
Sinabi naman ni Manila Rep. Joel R. Chua, chair ng House Committee on Good Government and Public Accountability
na tatanggapin at ipoproseso ang inihaing impeachment complaint laban kay Marcos batay sa Konstitusyon at House Rules. ( Daris Jose)

PINANGUNAHAN ni Manila City Mayor Francisco “Isko” Moreno Domagoso ang groundbreaking ceremony para sa itatayong Senior Citizens Park at community Pet Park sa Nagtahan, Pandacan, na inilarawan niyang konkretong bunga ng pagtutulungan ng pambansa at lokal na pamahalaan.

Ang proyekto, na opisyal na tatawaging Senior Citizens’ Park and Pet Park (Plaza Azul), ay inisyatiba ng Pamahalaang Lungsod ng Maynila, Department of Budget and Management (DBM), at Metropolitan Manila Development Authority (MMDA).

Sinabi ni Domagoso na halos tatlong taon nang nananatiling bakanteng open space ang lugar matapos maitayo ang Skyway, dahilan upang maging madilim, maalikabok, at mapanganib para sa mga residente, manggagawa, at motorista.

“Simula nang nagawa ang Skyway, dumilim. Naging mapanganib sa gabi sa nagmamaneho at naghahanapbuhay at mamamayan ng Pandacan. Hindi lang dumilim, umalikabok araw-araw,” aniya.

Ayon sa alkalde, personal niyang sinuri ang lugar sa gabi matapos siyang makabalik sa puwesto dahil sa pangambang maaaring maaksidente ang mga bata at senior citizens.

“Hindi na natin hihintayin na may mangyaring masama. Kailangan itong ayusin agad,” wika niya.

Upang mapabuti ang kaligtasan, humingi aniya ng tulong ang lungsod sa pribadong sektor para sa paglalagay ng ilaw sa ilalim ng Skyway. Ayon kay Domagoso, tumugon si San Miguel Corporation Chairman Ramon Ang sa pamamagitan ng P20.8 milyong donasyon para sa pagpapailaw sa nasabing lugar.

Dagdag pa niya, layon din ng proyekto na matugunan ang kakulangan ng open spaces sa Pandacan, lalo na para sa mga senior citizen na nangangailangan ng ligtas na lugar para sa ehersisyo at mga gawaing pangkalusugan.

“Gagawa tayo ng Senior Citizen Park kung saan maaari silang mag-stretching, mag-calisthenics, at magsagawa ng iba’t ibang aktibidad araw-araw,” ani Domagoso.

Kasama rin sa proyekto ang pagtatayo ng Pet Park upang magkaroon ng espasyo ang mga residente at kanilang mga alagang hayop.

“Karaniwan ito sa mayayamang subdivision at sa ibang bansa. Dito sa Maynila, gagawa rin tayo ng para sa mga hayop,” dagdag niya.

Binigyang-diin din ng alkalde ang papel ng Local Government Support Fund (LGSF) ng DBM na tumutulong sa mga lokal na pamahalaan sa mga programa at proyekto. Ayon sa kanya, inatasan ni Pangulong Ferdinand “Bongbong” Marcos Jr. ang malaking pagtaas ng pondo ng LGSF para sa 2026, na halos 400 porsiyentong paglago.

Pinuri rin ni Domagoso ang MMDA sa pangunguna ni Chairman Romando Artes sa pagtutulungan para sa proyekto, matapos itong mangakong dodoblehin ang pondo ng lungsod para sa naturang parke.

Sa huli, sinabi ng alkalde na inaasahang makatutulong ang Senior Citizens Park at Pet Park sa pagbawas ng alikabok, pagpapabuti ng kalidad ng hangin, at pagbibigay ng ligtas at luntiang espasyo para sa mga pamilya, senior citizens, at pet owners sa Pandacan at mga karatig-lugar.

“Titigil na ang alikabok. Magkakaroon na kayo ng sariwang hangin at mas maraming green space para sa inyong mga anak at apo,” ani Domagoso. (Gene Adsuara)