HINIKAYAT ni Lanao del Sur Rep. Zia Alonto Adiong ang mga kritiko na itigil na ang hindi kinakailangang ingay sa pagtatangkang paghahain ng impeachment laban kay Presidente Bongbong Marcos.

Ang tunay na isyu aniya na kinakaharap ng ilang grupo ay ang kawalan ng endorser mula sa Kamara para sa kanilang reklamo.

Ayon kay Adiong, ang pahayag nina Atty. Ferdie Topacio at dating Anakalusugan Party-list Rep. Mike Defensor ay kulang umano ng factual basis, dahil ang isyu ay walang kinalaman sa proseso na hinaharang.

“The problem is straightforward: there is no House member endorser. Without an endorser, the complaint cannot move. That is what the rules clearly provide,” paliwanag ni Adiong.

Naniniwala pa ang mambabatas na walang pumipigil sa kanila at kung gusto talagang umusad ang impeachment complaint ay kailangan nila ng endorser mula sa isang mambabatas.

“This is not about being stopped or blocked. It’s about meeting a basic requirement. The absence of an endorser is the main issue,” dagdag nito.

Binanggit nito ang ginawang paglilinaw ni House Committee on Justice chair Gerville “Jinky Bitrics” Luistro, na ang impeachment complaints na inihain ng isang private individuals ay hindi maisusumite o maita-transmit sa Office of the Speaker hanggang hindi iniendorso ng isang miyembro ng Kamara.

“Just like any other bill, it must be sponsored by at least a member of the House. If this is filed by a private individual at walang mag-sponsor, it will not be transmitted to the Office of the Speaker,” paliwanag pa nito.

Sinabi pa ni Luistro na ang impeachment complaints ay maaaring ihain sa pamamagitan ng dalawang paraan, sa pamamagitan ng isang private individual na inindorso ng kongresista o sa pamamagitan ng signature at verification ng one-third ng lahat ng House members.

Kung walang nasunod na isa sa dalawang paraan, hindi papasok sa pormal na proseso ng Kamara ang reklamo.

“It is not my intention to preempt any discussion on sufficiency. But by form, dapat supported ‘yan by a House member, dapat signed ng private individual at dapat verified by an authorized officer.”

Ang naturang rules ay matagal ng nabuo para masigurong may kaayusan at patas na proseso ng impeachment.

“Hindi puwedeng baguhin ang proseso at saka magrereklamo na may humaharang. The rules are clear, and they apply to everyone, pahayag pa ng mambabatas.
(Vina de Guzman)

ISANG lalaki na wanted sa kaso ng Child Abuse sa lalawigan ng Sorsogon ang arestado nang kumuha ng police clearance sa Valenzuela City, kamakalawa ng hapon.

Pansamantalang nakapiit ang 30-anyos na akusado, residente ng Brgy., Canumay West sa Custodial Facility Unit ng Valenzuela City Police Station habang hinihintay ang pagpapalabas ng commitment order mula sa korte.

Sa ulat, bandang alas-2:00 ng hapon nang magtungo sa National Police Clearance Section (NPCS) sa Valenzuela CPS sa Brgy. Malinta ang akusado para mag-apply ng police clearance na gagamitin niya sa pag-apply ng trabaho.

Gayunman, nang biripikahin sa e-warrant system ang pangalan ng akusado ay nadiskubreng may standing warrant of arrest ito na inisyu ng Regional Trial Court, Branch 54, Gubat, Sorsogon, noong September 16, 2025 para sa paglabag sa Section 10 (A) ng R.A. 7610 – Anti-Child Abuse Law na na may inirekomendang piyansa na P80,000.

Sa tulong ng Warrant and Subpoena Section (WSS), isinagawa ang pagsilbi sa akusado ng naturang warrant of arrest na nakadokumento gamit ang Body-Worn Camera.

Pinuri naman ni Police Brigadier General Christopher Dela Cruz, Acting District Director ng Northern Police District (NPD) ang arresting team para sa kanilang kasipagan, disiplina, at propesyonalismo na binigyang-diin ang patuloy na pangako sa mga legal na operasyon at kaligtasan ng komunidad. (Richard Mesa)

SA kulungan ang bagsak ng isang lolo na akusado sa pang-aabuso sa isang menor-de-edad matapos malambat ng pulisya sa ikinasang manhunt operation sa Navotas City, kamakalawa ng hapon.

Sa kanyang ulat kay Northern Police District (NPD) Acting Director P/BGen. Christopher Dela Cruz, sinabi ni Navotas Police Chief P/Col. Renante Pinuela na ang akusado ay isang 60-anyos na residente ng lungsod.

May warrant of arrest umano ang akusado para sa paglabag sa Section 5(b) ng Republic Act No. 7610 (Special Protection of Children Against Abuse, Exploitation and Discrimination Act) na inisyu ng Regional Trial Court, National Capital Judicial Region, noong January 12, 2026.

Dahil dito, kaagad iniutos ni Col. Pinuela sa kanyang mga tauhan ang malawakang pagtugis sa akusado na nakatala bilang No. 6 sa Top Ten Most Wanted Person sa Navotas CPS at No. 10 naman sa NPD.

Alas-5:35 ng hapon nang tuluyang masukol ng tumutugis na mga operatiba ng Navotas Police Warrant and Subpoena Section ang akusado sa Barangay NBBS Dagat-Dagatan.

Dinakip ng mga tauhan ni Col. Pinuela ang akusado sa bisa ng naturang arrest warrant na inirekomendang piyansa na ₱200,000.00 para sa kanyang pansamantalang paglaya.

Ang akusado ay pansamantalang nakapiit sa Custodial Facility Unit ng Navotas CPS habang hinihintay ang pagpapalabas ng commitment order mula sa korte.

Pinuri naman ni Gen. Dela Cruz ang arresting team sa kanilang pagsisikap at dedikasyon para hulihin ang mga lumalabag sa batas upa

BILANG bahagi pa rin ng kanyang Ulat sa Malabueño, pinasinayaan ni Mayor Jeannie Sandoval ang isang bagong multi-purpose building sa Barangay Tanong at pinabasbasan ang mga bagong sasakyang pang-serbisyo, na naglalayong mapabuti ang paghahatid ng mahahalagang serbisyo sa mga residente.

Ang bagong pasilidad sa Tanong National High School, sa 1st Street, sa Barangay Tanong, ay isang 4-storey school building na may 12 classrooms at mga Persons with Disability Comfort Rooms na naa-access sa pamamagitan ng mga rampa, na may CCTV, Fire Protection at Fire Control Systems.

Idinaos din ng Pamahalaang Lungsod ang pagbabasbas ng bagong Manlift na may Aerial Platform at isang L300 van na gagamitin ng City Engineerin Department para sa pagpapanatili at serbisyo ng mga ilaw sa kalye na hindi madaanan ng malalaking manlift.

Isinagawa din ang pagbabasbas ng 3 bagong response motor vehicle at 3 Tamaraw pick up truck, na gagamitin ng Malabon Disaster Risk Reduction and Management Office para sa mga emerhensiya, pagtiyak ng kaligtasan, kahandaan sa serbisyo, at epektibong pagtugon sa panahon ng kalamidad.

Alinsunod sa pangako nitong protektahan ang mga karapatan at kapakanan ng kababaihan, pinabasbasan din ang isang bagong sasakyang pang-serbisyo sa pagsagip at ligtas na transportasyon ng Women in Especially Difficult Circumstances (WEDC), lalo na ang mga biktima ng Violence Against Women and their Children (VAWC).

“Sa pamamagitan ng pasilidad at mga sasakyang ito, mas mapapabuti pa natin ang mga serbisyo lalo na sa oras na kinakailangan. Para sa Malabueno, mas sisikapin ng ating pamahalaan lungsod na mapabilis at napapanahon ang ating mga serbisyo at programa. Ito ang ating pangako at sabay-sabay tayo na aabutin ang mga ating mga layunin para sa mas maunlad Malabon,” pahayag ni Mayor Jeannie.

Ang pasilidad at mga sasakyan ay magsisilbing venue para sa mga klase, programa ng komunidad, at magpapahusay sa kapasidad ng pagpapatakbo ng lungsod sa mga lugar tulad ng kalusugan, pagtugon sa emerhensiya, kalinisan, at suportang pang-administratibo.

Binigyang-diin naman ni City Administrator Dr. Alexander Rosete na ang mga pag-unlad na ito ay sumasalamin sa patuloy na pagsisikap ng lokal na pamahalaan na mamuhunan sa modernong imprastraktura at mga ari-arian na direktang nakikinabang sa mga Malabueño at nag-aambag sa isang mas naa-access, mahusay, at nakasentro sa mga pampublikong serbisyo. (Richard Mesa)