HINDI raw muna bibigyan ng anumang gadgets ng mag-asawang Solenn Heussaff at Nico Bolzico ang kanilang dalawang anak hanggang hindi pa raw sila nasa tamang edad.
Naniniwala ang mag-asawa na may hindi magagandang epekto ang gadgets sa mga kabataan ngayon.
“Tili doesn’t know Instagram. She doesn’t have an iPad. She’s six na. Hindi ako nagga-gadgets sa kanila. Wala. Never. Their first phone maybe at 18, 19. Sana. Kung may pager, baka pager puwede muna. Pero iPad I don’t want,” tawa pa ni Solenn.
Gusto raw ni Solenn na kapag nasa labas sila, may bonding sila through talking sa isa’t isa. Unlike daw ng ibang pamilya na may kanya-kanyang gadgets.
“Nico owns a restaurant, so we’re at the restaurant a lot kasi, and he’s very hands-on, so I go with him. Ako nagda-dine lang. And then I see all the families having dinner together, but not ‘together.’
“‘Yung dad nasa phone, ‘yung mom nasa phone, ‘yung isang baby nasa iPad, ‘yung mas maliit nanonood ng TV. I get so frustrated because I’m like, this is so sad. This is what we’ve become?”
Ngayon kasi, bukod sa paglabas sa ‘Encantadia Chronicles: Sang’gre’ bilang si Cassiopeia, simple lang ang pamumuhay ni Solenn kasama ang kanyang pamilya.
***
UMABOT na ng mahigit 10 million views ang teaser ng inaabangang mystery-drama series na The Secrets of Hotel 88.
Nagbigay na ng ilang clues ang teaser kung ano ang magiging kwento nang magbukas ito sa mga karakter nina Will Ashley, Brent Manalo, at Ralph De Leon.
Kalaunan ay tila makakaalitan nila ang mga karakter nina Mika Salamanca, Bianca De Vera, River Joseph, at Josh Ford.
Makakasama rin nila rito ang ilang former housemates ng unang season ng Pinoy Big Brother Celebrity Collab Edition.
Sa panayam sa kanila ni Nelson Canlas para sa 24 Oras, ibinahagi ng ilan sa cast ang tila rollercoaster na emosyon na mapapanood at mararamdaman nila sa serye.
“Rollercoaster po kasi talaga ‘yung Hotel 88. It’s not one-sided, it’s not all drama, but it’s also not all fun at the same time. So ‘yung mga iyakan du’n, ‘yung mga galit, ‘yung mga away, it happens,” sabi ni Ralph.
Ayon pa sa cast, may ilang eksena raw na walang sinusunod na script kaya naman raw emotions at reactions ang masisilayan ng mga manonood.
“I think it depends po sa eksena, kasi ako I’ve trained myself na rin po to get used to like on the spot, like improvisations and everything. So not having the script is also pretty exciting for me,” sabi ni Kira Balinger.
Kwento naman ni Mika, paunti-unti kung ibigay sa kanila ang script kaya naman, kaniya-kaniyang hintay ang mga bida ng serye.
“Kahit kami talaga, kailangan namin hintayin talaga ‘yung kwento, ganiyan, kasi po ang dami po talagang secrets,” sabi ni Mika.
Bukod sa dating mga housemate, mapapanood din ang ilan sa mga beteranong aktor sa serye tulad nina Ina Raymundo, Dominic Ochoa, at Gardo Versoza.
Inaasahang mapapanood ang serye sa first quarter ng 2026 sa GMA Primetime.
***
PINABULAANAN ng country music singer na si Karley Scott Collins na siya ang pinalit ni Keith Urban sa ex-wife nitong si Nicole Kidman.
Ayon sa 26-year-old singer, professional daw ang ugnayan nila ni Urban. Naging opening act siya sa 2025 High and Alive World Tour ni Urban last year.
Sa kanyang Instagram Stories, pinawalang-totoo ni Karley na live-in na sila ni Urban. Caption niya: “yall, this is absolutely RIDICULOUS and untrue.”
Officially divorced na last Jan. 6, 2026 sina Nicole at Keith after 19 years of marriage.
(RUEL J. MENDOZA)
