IBINAHAGI ng Malakanyang na tumungo kaninang umaga, araw ng Huwebes, Enero 8, si Pangulong Ferdinand R. Marcos Jr. sa Cagayan upang suriin ang bumagsak ng Piggatan Bridge.
Matatandaang nasira ang tulay noong October 6 ng nakaraang taon dahil sa overloading na siya namang nagdulot ng matinding abala sa kabuhayan ng mga residente sa rehiyon.
Kaya naman inaksiyunan ito agad ng pamahalaan, ayon kay Communications Office (PCO) Undersecretary at Palace Press Officer Claire Castro sa press briefing sa Malakanyang.
Mabilis aniya na nakapaglatag ng mga alternatibong ruta para magtuluy-tuloy ang biyahe sa lugar at nagtayo rin ng detour bridge upang gawing pansamantalang daanan habang ginagawa ang tulay na ipapalit sa Piggatan Bridge.
Nagbigay naman aniya ng direktiba si Pangulong Marcos sa Department of Public Works and Highways (DPWH) na tiyakin na tama ang disenyo at maayos ang paggawa ng bagong tulay at siguruhing ligtas, matibay, at naaayon sa engineering standards ang ipapalit na tulay.
Samantala, tumungo rin si Pangulong Marcos sa Camalaniugan Bridge upang opisyal na itong buksan sa publiko.
Ang tulay na ito ani Castro ay inaasahang magbibigay-ginhawa sa mga residente sa lugar lalo pa’t pinagdurugtong nito ang baya ng Aparri at Camalaniugan.
Ang dating isang oras na biyahe aniya ay magiging 20 minuto na lang dahil kapag mas mabilis ang biyahe, mas maginhawa sa mga motorista at mas mabilis din ang daloy ng pag-asenso. (Daris Jose)

IPINAG-UTOS ni Pangulong Ferdinand Marcos Jr., sa PhilHealth na magpatupad ng general amnesty sa mga negosyante, private employer at self-employed na hindi na nababayaran ang kanilang kontribusyon sa PhilHealth.
Ibig sabihin nito ayon sa Malakanyang ay walang interes na sisingilin sa mga unpaid contributions.
”Sa aming patuloy na tumulong sa ating mga kababayan, lalong-lalo na sa tinatawag nating healthcare, eh inutusan ko po ang PhilHealth na magpatupad ng general amnesty para sa mga negosyante, private employer, mga self-employed na ating mga kababayan na hindi nabayaran ang kontribusyon sa PhilHealth,” ayon kay Pangulong Marcos sa isang video message.
”Alam naman namin na ‘yung 3% na binabayad para sa PhilHealth na buwan-buwan ay ramdam na ramdam ng ating mga kababayan,” dagdag na pahayag nito.
Sa hakbang na ito, tinatayang humigit-kumulang 300,000 beneficiaries ang makikinabang sa amnesty.
Dagdag pa ng Pangulo, bibigyan ng isang taon ang mga employer at self-employed upang bayaran ang mga kulang na kontribyusyon mula July 2013 hanggang December 2024 nang walang dagdag singil sa pamamagitan ng one-time waiver.
Layunin ni Pangulong Marcos na pagaanin ang pasanin sa pagbabayad ng PhilHealth contributions ng mga employer at self-employed upang mas maraming Pilipino ang magkaroon ng maayos na benepisyo sa kalusugan.
”Inutusan ko po ang PhilHealth, gagawa tayo nitong taon na ito, 2026, ang tinatawag na one-time waiver para sa interest… ngayong taong 2026,” aniya pa rin.
Samantala, hinihikayat din ng Pangulo ang mga employer na i-update ang lahat ng kanilang impormasyon at irehistro ang mga empleyado Yaman ng Kalusugan o YAKAP Program ng pamahalaan.
Sa ilalim ng YAKAP Program ay puwedeng mag-avail ng libreng checkup sa accredited clinics at mga gamot sa mga partner-pharmacies, may lab at cancer screening test din sa mga YAKAP clinics.
“Kahit sino puwedeng sumali sa YAKAP Program dahil ang mabuting kalusugan ay karapatan ng bawat Pilipino. Hanapin lamang ang pinakamalapit na YAKAP clinic para makapagparehistro. Ang pangunahing layunin ng Pangulo sa sektor ng pangkalusugan, palawakin ang saklaw ng PhilHealth at bawasan ang pasanin ng mga Pilipino pagdating sa gastusing-medikal,” ayon naman kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
“Muli, ang nais ni Pangulong Marcos Jr. ay hindi naging sagabal sa gastusin sa ospital ang tuwing magkakasakit ang bawat Pilipino,” aniya pa rin. (Daris Jose)

INIULAT ng Bureau of Immigration (BI) na umabot sa kabuuang 15.6 milyong pasaherong dumating sa iba’t ibang panig ng bansa noong 2025, na nagpapakita ng patuloy na paglago ng internasyonal na paglalakbay papasok at palabas ng Pilipinas.
Ayon kay BI Commissioner Joel Anthony Viado, nakapagtala ang mga opisyal ng imigrasyon sa lahat ng internasyonal na pantalan ng pagpasok ng 15,608,868 na pagdating mula Enero hanggang Disyembre 2025, kabilang ang 6,704,007 dayuhang mamamayan.
Ang naturang bilang ay kumakatawan sa halos anim na porsiyentong pagtaas kumpara sa 14,733,597 na pagdating na naitala noong 2024.
Ayon pa sa BI Chief na nananatiling nakatuon ang ahensya sa pagsuporta sa mga layunin ng pamahalaan sa turismo at ekonomiya sa pamamagitan ng patuloy na modernisasyon.
“Aktibo naming isinusulong ang modernisasyon ng aming mga proseso sa imigrasyon—pinapalawak ang mga automated system, ina-upgrade ang mga pasilidad, at pinatitibay ang aming lakas-tao—upang matiyak ang mas mabilis, mas ligtas, at mas maginhawang serbisyo sa imigrasyon para sa mga biyahero,” pahayag ni Viado. “Mahalaga ang mga repormang ito upang mapadali ang lehitimong paglalakbay ng mga turista at iba pang manlalakbay,” dagdag pa niya.
Sinabi rin ni Viado na ipagpapatuloy ng BI ang pag-aayon ng mga programa nito sa pagtulak ng pambansang pamahalaan para sa digitalisasyon at episyenteng paghahatid ng serbisyong publiko, habang nananatiling mapagmatyag laban sa mga transnasyonal na krimen at mga pang-aabusong may kaugnayan sa paglalakbay. (Gene Adsuara)

IGINIIT ng Pamahalaang Lungsod ng Maynila na legal at naaayon sa Konstitusyon ang Ordinance No. 9151 na nagtatakda ng updated garbage collection fees para sa mga negosyo sa lungsod.
Ayon kay City Legal Officer Atty. Luch Gempis Jr., hindi dapat ikumpara ang ordinansa sa Quezon City case na tinalakay ng Korte Suprema dahil magkaiba ang saklaw at layunin.
Sa QC, household at condominium ang siningil at inilaan ang kikitain para sa socialized housing, samantalang limitado sa business establishments ang revised garbage fees ng Maynila at itinuturing na regulatory fee, hindi buwis.
Sinabi rin ni Gempis na huling na-update noong 2013 ang garbage fees sa kabila ng pagtaas ng volume ng basura at mas mataas na hauling at disposal costs, lalo na nang i-redirect ng MMDA ang pagtatapon sa San Mateo Landfill sa Rizal.
Ayon naman kay City Treasurer Atty. Paul Vega, layunin ng ordinansa na bawasan ang agwat ng nakokolekta ng lungsod at aktwal na gastos sa waste collection.
Tiniyak ng Bureau of Permits na system-generated ang assessments at bukas ang mga tanggapan para sa paglilinaw mula sa mga negosyo. (Gene Adsuara)

ISA ang Dr. V. Orestes Romualdez Educational Foundation (DVOREF) College of Law sa Top 5 law schools sa bansa na may mataas na passing percentage sa 2025 Bar Examinations, base sa official data na ipinalabas ng Supreme Court (SC).
Nakapagtala ang DVOREF ng 80.19% passing rate sa mga
first-time examinees mula sa schools na may mahigit sa 100 candidates, na 4th overall, na una sa San Beda College of Law–Alabang at kasabayan sa ibang nangungunang institutions, kabilang na ang Ateneo de Manila University, University of the Philippines, at University of Santo Tomas.
Sa 106 examinees, nasa 85 ang pumasa sa Bar, na naglagay sa DVOREF na tanging law school sa probinsiya sa national Top 5.
Ang DVOREF College of Law ay pinamumunuan ni Leyte Rep. Ferdinand Martin Romualdez, na nagtapos ng Bachelor of Laws mula sa University of the Philippines College of Law.
“This achievement shows that excellence in legal education is not confined to Metro Manila,” Romualdez said. “I thank our administrative staff, faculty members, students, and parents for standing with us every step of the way and for helping turn our shared goal into reality,” ani Dean Romualdez.
(Vina de Guzman)