INIHAIN ni Quezon City Rep.Jesus "Bong" Suntay ang House Bill No. 3857 o False Claims and Whistleblower Protection Act upang mapalakas ang kampanya ng gobyerno laban sa korapsyon at maling paggamit ng pondo ng bayan.

"Panahon na para mas maging accountable ang lahat. Kung sino man ang mag-submit ng false claim laban sa gobyerno, mananagot — at may kasama pang triple damages," ani Suntay.

Sa ilalim ng panukalang batas:

• Mabigat na Parusa – Multa mula ₱500,000 hanggang ₱4,000,000 bawat violation, kasama ang treble damages (tatlong beses ng halagang nawala sa gobyerno).

• Reward System – Mga ordinaryong mamamayan na maglalantad ng katiwalian ay pwedeng tumanggap ng 15–30% ng halagang mababawi.

• Proteksyon sa Whistleblowers – May safeguards laban sa harassment, panggigipit, at illegal dismissal. Garantiyado rin ang reinstatement, back pay, at damages kung sakaling mag-retaliate ang kanilang employer.

"Hindi lang ito laban kontra pandaraya. Isa itong panukala para bigyan ng boses at proteksyon ang mga matitinong Pilipino na handang lumaban para sa tama," dagdag ni Suntay.

Bukod pa dito, ayon sa mambabatas, "hindi biro ang magkaso ng recovery cases. Masyadong mabagal, magastos, at minsan nauuwi sa wala. Sa ilalim ng panukalang ito, mas magiging mabilis ang proseso, mas mabigat ang parusa, at mas protektado ang mga maglalakas-loob na magsumbong".

Kung maisasabatas, ang HB 3857 ay magbibigay ng malinaw na mensahe: ang kaban ng bayan ay hindi laruan ng mga mandaraya.

(Vina de Guzman)

LAGLAG sa selda ang isang kelot matapos makuhanan ng hindi lisensyadong baril sa Valenzuela City, kamakalawa ng gabi.

Sa kanyang report kay Northern Police District (NPD) Acting District Director P/BGen. Jerry Protacio, sinabi ni Valenzuela Police Acting Chief P/Col. Joseph Talento, nagtungo ang kanyang mga tauhan sa Brgy. Ugong para magsilbi ng arrest warrant laban sa isang idibidwal.

Pagdating ng mga operatiba ng Station Intelligene Section (SIS) sa Que Balag Street, Brgy. Ugong dakong alas-9:30 ng gabi, naispatan nila ang kanilang target na wanted person na may kasamang isang lalaki.

Gayunman, nang mapansin nito ang papalapit na mga operatiba ay mabilis itong nakaiwas at tumakas habang naiwan naman ang kanyang kasamang lalaki.

Dito, napansin ng mga operatiba ang nakasukbit na baril sa baywang ng 26-anyos na lalaki na si alyas "Edwin", kaya agad itong kinumpiska ng mga pulis.

Nang walang maipresentang ang suspek na mga dokumento hinggil sa ligaledad ng nakuha sa kanya na isang kalibre .38 revolver na kargado ng isang bala ay pinosasan siya ng mga tauhan ni Col. Talento.

Ayon sa pulisya, naipresenta na ang suspek sa inquest procedings para sa kasong paglabag sa R.A 10591 o ang Comprehensive Law on Firearms and Ammunition Regulation Act sa Valenzuela City Prosecutor's Office. (Richard Mesa)

UMABOT sa mahigit P.1 milyon halaga ng shabu ang nasamsam sa dalawang drug suspects na naaresto ng pulisya sa magkahiwalay na operation sa Caloocan at Navotas Cities.

Sa ulat, nakatanggap ng impormasyon ang mga tauhan ni Navotas Police Acting Chief P/Col. Renante Pinuela hinggil sa umano'y ilegal drug activities ni alyas "Niño," 31, listed bilang street-level individual (SLI).

Nang magawa ng isa sa mga operatiba ng Station Drug Enforcement Unit (SDEU) na makipagtransaksyon sa suspek, ikinasa ng mga tauhan ni Col. Pinuela ang buy bust operation, sa koordinasyon sa PDEA.

Hindi na nakapalag ang suspek nang dambahin ng mga operatiba ng SDEU dakong alas-12:30 ng hating gabi matapos umanong tanggapin ang marked money mula sa pulis na nagpanggap na buyer kapalit ng isang sachet ng shabu sa M. Naval St., Barangay Bangkulasi.

Nakumpiska sa suspek ang nasa 10.64 grams ng hinihinalang shabu na may katumbas na halagang P72,352.00 at isang markadong P500 bill na ginamit bilang buy bust money.

Sa Caloocan, dinakip naman ng mga tauhan ni Caloocan Police Acting Chief P/Col. Joey Goforth si alyas "Gbaril", 26, matapos umanong pumalag nang sitahin sa paglabag nito sa city ordinance dakong ala-1:30 ng madaling araw sa Crispulo Street, Barangay 180.

Nang kapkapan, nakuha kay Gabril ang isang plastic sachet na naglalaman ng nasa 5 grams ng umano'y shabu na nagkakahalaga ng P34,000.00.

Pinuri naman ni P/BGen. Jerry Protacio, District Director ng Northern Police District, ang arresting teams sa kanilang kasipagan at professionalism na binibigyang-diin ang hindi natitinag na pangako sa pangangalaga sa kaligtasan ng publiko. (Richard Mesa)

PINAGTULUNGANG kuyugin ng tatlong vendors ang isa nilang parokyano nang humiling ito na kuhanan muna sila ng larawan bago bumili ng cellular phone sa Caloocan City.

Napag-alaman na bibili sana ng cellphone ang biktimang si alyas "Jonard", nasa hustong, residente ng Munoz sa mga suspek na may puwesto ng tindahan sa gilid lang ng Bus Carousel Station sa EDSA Monumento pasado alas-8 ng umaga pero hiniling muna niya na kuhanan ng litrato ang mga vendor upang makikilala pa rin niya kung sakali na masira kaagad ang bibilhing gadget.

Hindi umano pumayag ang mga vendor na nauwi sa pagtatalo hanggang pagtulungan ng gulpihin at pagpapaluin ng monoblock chair ang biktima na nagawa pang makatakbo bago tuluyang humandusay.

Matapos ang insidente, mabilis na tumakas ang mga suspek habang isinugod naman ng ambulansiya ng Caloocan City Disaster Risk Reduction and Management Office (CDRRMO) sa pagamutan ang biktima para lapatan ng kaukulang lunas.

Ipinag-utos na ni Caloocan police chief P/Col. Joey Goforth sa kanyang mga tauhan ang pagtugis sa mga suspek. (Richard Mesa)