2023 January Archive - People's Balita

Archive for January, 2023

DA, mage-establisa ng 2-MONTH SUGAR BUFFER STOCK

Posted on: January 27th, 2023 by @peoplesbalita No Comments

SINABI ni Pangulong Ferdinand R. Marcos Jr. na mage-establisa ang Department of Agriculture (DA) ng two-month sugar buffer stock para pababain ang presyo at maiwasan ang kakapusan sa hinaharap.

“Again [for] sugar, to cut down speculation, we are guaranteeing a buffer stock of two months. So hindi magkaka-shortage, hindi dapat tataas ang presyo,” ayon kay Pangulong Marcos.

“We are beginning to rationalize this buying schedule, the importation schedule, so that we will match the crop here of the local producers of sugar. Para hindi naman tayo nagpapasok habang mababa ang presyo ng asukal, so para mag-normalize naman ‘yung presyo,” aniya pa rin.

Sa isinagawang sectoral meeting sa Palasyo ng Malakanyang, iniulat ng mga opisyal ng DA na ang umiiral na retail price ng asukal mula Oktubre 2022 hanggang Enero 2023 ay mataas kumpara sa presyo mula Oktubre 2021 hanggang Enero 2022.

Iniulat din ng mga ito na “as of January 8,” ang raw sugar production ay nasa 877,028 metric tons (MT), 22.41% na mas mataas kumpara sa crop year’s (CY) 716,485 MT.

Ang raw sugar stock balance ay nasa 362,263 MT, 0.92% na mas mababa sa 365,633 MT ng nakalipas na crop year o taon ng pag-aani.

“During the same period, refined sugar production reached 316,829.15 MT, 34 percent higher than last crop year’s 235,838.45 MT, while domestic use of refined sugar for the same period is at 211,832.90 MT, 17.78 percent lower compared to last CY’s 257,646.75 MT,” ayon sa ulat.

Ang refined sugar stock balance, sa kabilang dako ay 132,384.55 MT, 8.68% na mas mataas kumpara sa nakaraang CY’s 121,813.25 MT.

Para sa Sugar Regulatory Administration (SRA), ang projection nito ay negative sugar-ending inventory sa July 2023.

Kapwa naman hiniling ng Carbonated Soft Drinks (CSD) industry at major sugar industry stakeholders ang implementasyon ng supplemental sugar importation program base sa pgtataya na ang kasalukuyang sugar inventory ay matatagal lamang ng hanggang second quarter ng taon.

Sinabi naman ng CSD industry na “without premium refined domestic sugar to manufacture its products, manufacturers would be forced to impose prolonged shutdowns, which would affect the livelihood of employees.”

Kapwa naman inirekomenda ng DA at SRA ang pag-aangkat ng hanggang 450,000 MT ng asukal, kasunod ng naging kautusan ni Pangulong Marcos na panatilihin ang two-month sugar buffer stock at ibaba ang retail prices.

Idagdag pa rito, para maibaba ang presyo ng asukal, nagbigay naman ng go signal ang DA para sa pagbebenta ng 80,000 bags ng nakumpiskang asukal sa KADIWA stores sa halagang P70 per kilo sa oras na maaprubahan ito ng kinauukulang ahensiya ng pamahalaan gaya ng finance department at SRA.

Isang “sugar council,” binubuo ng sugar planters’ federations, ang binuo para pag-usapan ang policy recommendations sa gobyerno para sa sugar industry. (Daris Jose)

DOTr, nagpaliwanag sa pagsasapribado ng NAIA

Posted on: January 27th, 2023 by @peoplesbalita No Comments

NAGPALIWANAG si Department of Transportation Secretary Jaime Bautista hinggil sa ulat na pagsasapribado sa Ninoy Aquino International Airport (NAIA).

Sa idinaos na press briefing sa Malakanyang, sinabi ni Bautista na walang mangyayaring pagbibigay sa pribadong sektor sa asset ng NAIA dahil ipapaubaya lamang ang management sa operasyon sa pamamagitan ng concession agreement.

Sa katunayan aniya ay ginagawa ito sa dalawang paliparan sa bansa katulad ng Cebu na kung saan ay pinapatakbo nito ang operasyon ng GMR Megawide at sa Clark international airport sa lalawigan ng Pampanga.

Sa kabilang dako, inalis naman ng Kalihim ang pangamba ng publiko na baka magkaroon ng pagtaas sa singil sa airfare at iba pang services kung matuloy ang pangangasiwa sa operasyon ng NAIA ng isang private firm.

Samantala, nabanggit naman kahapon ni Pangulong Ferdinand R. Marcos Jr na isang isang management contract sa pagitan ng gobyerno at isang private firm na nagpapatakbo ng London airport ang inihahanda para sa pagpapatakbo ng operasyon sa NAIA. (Daris Jose)

Davis balik na sa lineup ng Lakers

Posted on: January 27th, 2023 by @peoplesbalita No Comments

Nagbalik sa lineup ang Lakers star big man na si Anthony Davis laban sa San Antonio Spurs, umiskor ng 21 puntos sa 113-104 panalo sa Los Angeles habang nagmula sa bench sa unang pagkakataon sa halos isang dekada.

Si Davis, na wala sa nakalipas na 5½ linggo dahil sa bali ng buto at stress sa kanyang kanang paa, ay pinaglaro pagkatapos ng kanyang pregame warmup noong Miyerkules mga dalawang oras bago ang tipoff.

Nag-check in si Davis sa unang pagkakataon may 4:22 na natitira sa opening quarter at naglaro ng 26 minuto habang pinangangasiwaan ng team ang kanyang workload. Bilang karagdagan sa kanyang nangunguna sa koponan na 21 puntos sa 7-of-15 shooting, nag-ambag siya ng 12 rebounds at 4 na blocks.

Ang huling pagkakataong lumabas si Davis sa bench sa isang laro ay noong Disyembre 18, 2013, sa Los Angeles laban sa Clippers sa kanyang ikalawang season sa New Orleans Pelicans.

Si Rui Hachimura, nakuha sa isang trade sa Washington Wizards mas maaga nitong linggo, ay ginawa ang kanyang Lakers debut laban sa Spurs at lumabas din sa bench, nag-check in kasabay ni Davis. Sinalubong sila ng malakas na palakpakan ng Lakers crowd.

Nagtapos si Hachimura na may 12 puntos sa 4-of-7 shooting sa loob ng 22 minuto. (CARD)

Halos P5-B duties and taxes nawawala sa gobyerno dahil sa agri-smuggling – Salceda

Posted on: January 27th, 2023 by @peoplesbalita No Comments

NASA mahigit P5 billion duties and tax ang nawawala sa gobyerno dahil sa agricultural smuggling.

Ito ang ibinunyag ni House Committee on Ways and Means Chair at Albay Representative Joey Salceda.

Batay sa inilabas na smuggling estimates data na isinumite sa mambabatas ang rice smuggling ang may pinakamalaking revenue losses na umabot sa mahigit P1.8 billion na sinundan ito ng karneng baboy na umabot sa mahigit P1.2 billion at pumapangatlo ang mga poultry products na nasa mahigit P770 million pesos.

Sa nasabing pagdinig kanina ng house panel inihayag na nasa P4.99 billion ang nawawalang duties ng bansa mula sa mga declared arrivals.

Layon din ng pagdinig na masolusyunan na rin ang smuggling sa bansa na nagpapahirap sa mga local farmers.

Tinanong naman ni Cong. Salceda si Transnational crime chief retired Gen. Alfred Corpus kung may natanggap itong ulat tungkol sa mga Chinese mafia na nasa likod ng large scale smuggling sa bansa.

Sagot naman ni Corpus na wala silang natatanggap na impormasyon ukol dito.

Sa kabilang dako, sa sponsorhip speech naman ni Sultan Kudarat Rep Cong. Horacio Suansing Jr kaugnay sa inihain nitong House Resolition No 311 na naglalayon imbestigahan in aid of legislation at bumuo ng mga batas laban sa smuggling at papanagutin ang mga nasa likod ng large scale smuggling sa bansa.

Pinangalanan din ni Suansing ang mga umanoy mga smugglers. Pina pasubpoena din ni suansing ang mga umanoy smugglers na kaniyang pinangalanan.

Ibinunyag naman ni Suansing nakalabas na umano ng bansa ang dalawang personalidad na posibleng sangkot sa large scale smuggling.

Ayon kay Suansing, may nakarating sa kanyang impormasyon na nakaalis na ang dalawa, at nagtungo na sa China.

Nagmosyon naman si Suansing sa komite sa pinamumuan ni Rep. Joey Salceda na maimbitihan ang mga kasama sa binanggit niyang listahan, at makuha ang kinakailangang rekord ng ilang consignees mula sa Bureau of Customs at Department of Agriculture.

Binigyang-diin ng mambabatas na ang listahan niya ay “pampagana” pa lamang, at nais niyang personal na humarap sa susunod na pagdinig ang mga personalidad. (BISHOP JESUS “JEMBA” M. BASCO)

Dini-discourage nga pero susuportahan pa rin: MIKEE, ibinunyag na pangarap ng PAUL na pumasok sa politika

Posted on: January 27th, 2023 by @peoplesbalita No Comments

IBINUNYAG ni Mikee Quintos na pangarap ng kaniyang nobyong si Paul Salas na pumasok sa politika.

Sa Surprise Guest with Pia Arcangel, inilahad ni Mikee na mga lawyer at doktor ang propesyon ng mga miyembro ng kaniyang pamilya, at siya lang nag-iisang taga-showbiz.

Dating mga konsehal at konsehala sa Maynila ang kaniyang mga magulang na sina Eduardo Quintos XIV at Jocelyn Quintos.

Naging “ritwal” na raw ng kanilang pamilya ang pangangampanya.

May mga pagkakataong inayawan ni Mikee ang pagsama sa mga kampanya dahil siya ang natatanging artista sa pamilya na marunong kumanta at sumayaw.

“Isa ‘yun sa mga mabigat kong bubog, drama ko ‘yun sa magulang ko,” sabi ng Kapuso actress.

“Until I realized na nitong huling eleksyon na ‘yung ate ko na ang tatakbo, na imbes na i-hate ko siya, I should see it as a blessing na ako ‘yung kinukulit.”

Binago ni Mikee ang kaniyang pag-iisip at naging maluwag sa kaniya ang pagsuporta sa kaniyang pamilya.

“My mom actually told me that and one of my sisters na, ‘Mikee ikaw ‘yung kumakanta eh, ikaw ‘yung may talent eh.’ Sabi ko oo nga, minsan ‘yung talent na ‘yon it is a blessing and because of the pressure nakakalimutan kong blessing.”

Dahil dito, natanong si Mikee kung plano niya ring pumasok sa politika.

“Parang hindi po para sa akin eh. Hindi ko nafi-feel na… Mas nag-e-enjoy po ako sa acting,” sabi ni Mikee.

“Andito ako to help and to support my family. Pero kung ako mismo ‘yung nakaupo, hindi na. Hindi ko nakikita na ako ‘yung nakaupo,” dagdag niya.

“Nafi-feel ko naman ‘yung tulong na nagagawa ko naman ng ganito na hindi ako ‘yung nasa posisyon. Happy lang po ako dito.”

Gayunman, ikinuwento ni Mikee na si Paul ang may interes na pumasok sa politika.

“Siya, he’s into it. Gusto niyang tumakbo someday. Pangarap niya ‘yan someday,” sabi ng dalaga tungkol sa kaniyang nobyo.

“Medyo dini-discourage ko siya minsan dahil alam ko ‘yung stress nu’n. Pero bakit ko naman siya pipigilan? If his heart really wants to help people, andito din naman ako to support that,” dagdag ni Mikee.

***

TATLONG taong ginampanan ang kontrabidang si Brianna sa hit afternoon series na “Prima Donnas,” inihayag ni Elijah Alejo na nahirapan siyang gampanan ang role ng isang mabait na si Chynna sa “Underage.”

“Nahirapan akong mag-adjust, honestly. Kasi tatlong taon kong pinlay (play) si Brianna na super kontrabida. Tapos one week before naming mag-lock in, nag-guesting ako sa Tadhana na kontrabida rin ang role ko,” sabi ni Elijah sa Kapuso Insider.

“So parang ang bilis ng shift ko from kontrabida to mabait na Chynna,” dagdag ni Elijah.

Kaya naman todo ang kaniyang paghahanda para sa series.

“Mahirap na adjustment siya so ang ginagawa ko, lagi kong pinag-aaralan,” ayon kay Elijah, na kinokonsulta rin ang direktor na si Rechie Del Carmen.

Ang Underage ay kwento ng tatlong magkakapatid na sina Celine (Lexi Gonzales), Carrie (Hailey Mendes), at Chynna na napilitang umakto na may edad, matapos dumaan sa mga kasawian ang kanilang pamilya.

Dulot ito ng isa nilang malisyosong video na nag-viral online.

Napapanood na ang Underage sa GMA Afternoon Prime.

***

INIHAYAG ni Xian Lim ang labis na paghanga sa kanilang leading lady sa upcoming Kapuso series na “Hearts on Ice” na si Ashley Ortega.

Kasabay nito, looking forward din ang aktor sa pagbabalik-trabaho nila ni Jennylyn Mercado para naman sa “Love, Die, Repeat.”

Sa Chika Minute report ni Lhar Santiago sa “24 Oras”, sinabi ni Xian na nakita niya kung gaano kamahal ni Ashley ang trabaho nito sa taping nila ng Hearts on Ice.

“I think she is very dedicated when it comes to her project, this project in particular, kasi ngayon ko pa lang naman siya nakita in action. She comes to the set prepared and she knows what she is doing especially on ice,” ani Xian.

Grateful din si Xian sa ginagawang tulong sa kaniya ni Ashley pagdating sa iceskating, lalo ngayong may mga komplikado na silang eksena sa skating rink.

“Upon hearing about the role lang saka ako nag-skating. Ngayon nag-intensify ang mga ginagawa namin sa serye, ‘yung liftings involved which is a bit dangerous kasi mapapatid kami, may mga blades sa paa namin. It takes a lot of practice, time and dedication sa Hearts on Ice,” patuloy ng aktor.

Looking forward din si Xian kapag magsimula na muli silang mag-taping ni Jennylyn para sa “Love, Die, Repeat.”

“When we started ‘Love, Die, Repeat,’ ‘yun talaga ang peak ng COVID. It was very strict, bawal magkita ang lahat-lahat. So I’m hoping and I’m pretty sure na once we resume mag-iiba rin ang dynamics,” sabi ni Xian.

Panandaliang nahinto ang taping ng “Love, Die, Repeat” matapos ianunsyo ni Jennylyn ang kaniyang pagbubuntis.

Isinilang ni Jennylyn noong nakaraang taon ang anak nila ni Dennis Trillo na si Baby Dylan.

(ROMMEL L. GONZALES)

Novak Djokovic nasungkit ang Semis spot ng Australian Open

Posted on: January 27th, 2023 by @peoplesbalita No Comments

Pasok na sa semifinal rounds ng Australian Open si Novak Djokovic.

Ito ay matapos talunin si fifth seed Andrey Rublev sa score na 6-1 6-2 6-4.

Ito na ang pang-44 beses ng Serbian tennis star na nakaabot sa semifinals ng Grand Slam tournaments.

Labis ang kaniyang kasiyahan at hindi ito makapaniwala na nakaabot na siya ng semifinals ng nasabing torneo.

Susunod na makakaharap nito sa semifinal round si Tommy Paul ng US. (CARD)

Ads January 27, 2023

Posted on: January 27th, 2023 by @peoplesbalita No Comments

Bukod kay Winwyn na ‘di natuloy: ALDEN, inamin na iniwanan niya si JULIE ANNE kaya nag-sorry after seven years

Posted on: January 27th, 2023 by @peoplesbalita No Comments

OF course, hindi mawawala na magkaroon ng iba-ibang reaction ang mga netizens na nanood ng “Fast Talk with Boy Abunda,” last January 25.

Sa third day ng airing ng talk show na special guest ni Boy si Asia’s Multimedia Star Alden Richards. Naging matapat naman si Alden sa pagsagot sa tanong ni Boy kung sino ang muntik na niyang naging girlfriend sa mga stars ng GMA, pero hindi natuloy.

Nagkatawanan ang studio audience nang sagutin ni Alden na ‘dalawa po.’

Sina WinWyn Marquez at Julie Anne San Jose, na ngayon lamang niya binanggit sa mga interviews niya. Ipinaliwanag ni Alden na kay Win, hindi raw nagtuloy ang panliligaw niya dahil naging very busy na sila pareho noon at nawalan na sila ng time sa isa’t isa.

“Kay Julie po, nag-decide ako noon na bigyan ko ng priority ang pagtatrabaho ko bilang artista, nagkasunud-sunod na rin ang trabaho ko at parang naiwan ko na siya,” paliwanag ni Alden.

“Siguro po after seven years na hindi kami nagkakausap, minsan na naiwanan kaming dalawa sa “Sunday Pinasaya,” kinausap ko siya, humingi ako ng tawad na iniwanan ko siya, sana ay mapatawad niya ako.

“Since then po naman hanggang sa ngayon naging best of friends na kami.”

Hindi rin naiwasang maging emosyonal si Alden nang ipakita ni Boy ang photo ng namayapa niyang ina, si Mommy Rosario, ang naging dahilan kung bakit siya nag-artista, ay wala na sa kanyang tabi para pag-alayan ng lahat ng tagumpay na natanggap niya.

Meanwhile, bukas na, January 28, ang Myriad Esports Cup Grand Finals, na produced ni Richard Faulkerson, Jr. Gaganapin ito sa Ynares Sports Center sa Shaw Blvd., Pasig City.

Gates will open at 10am, at mapapanood naman sa Facebook Page ng Myriad Esports Cup at 7pm. Over-all-in-charge of Production si Vince P. Mariano, Supervising Producer si Mona Coles-Mayuga at Executive Producer naman si Leysam Sanciangco.

Sino kaya ang magiging winner ng Myriad Esports Cup? May 32 teams ang magku-compete for the title of the First Myriad Esports Cup Champion, sponsored by @ExperienceCNVRG @mcdo_PH @Oxecure_PH at @StingEnergy.

***

NGAYONG open nang mag-collaborate ang mga producers and networks sa mga projects na gusto nilang gawin para sa mga artistang gusto nila sa kanilang gagawing movie or teleseryes, matupad na kaya ang wish ni Director Lino Cayetano?

Type niyang magawa ang dream reunion project na matagal na niya gustong gawin sa mga winners ng first “StarStruck” ng GMA Network na mga winners sina Jennylyn Mercado, Mark Herras, Rainier Castillo, Yasmien Kurdi, Sheena Halili, at iba pa.

Si Direk Lino kasi ang first director ng “StarStruck” noong nasa GMA pa siya. Ngayon, balik na siya sa pagdidirek at may sarili na siyang production, ang Rein Entertainment at pwede na siyang makipag-collaborate sa GMA.

“I’m very proud kasi sa kanila, lahat sila nagkaroon ng pangalan sa industry,” sabi ni Direk Lino. “Kaya sana payagan sila ng GMA na gumawa ng project sa akin.”

May collab na ngang gagawin ang GMA Network at ABS-CBN, na magtatampok kina Jodi Sta. Maria, Richard Yap, Gabbi Garcia at Joshua Garcia, sa isang teleserye, na kukunan sa Switzerland.

(NORA V. CALDERON)

Sektor na malapit sa kanyang puso: Sen. IMEE, nakipag-bonding sa mga millennial na magsasaka

Posted on: January 27th, 2023 by @peoplesbalita No Comments

ISASARA ni Senadora Imee Marcos ang kanyang vlog series para sa buwan ng Enero sa pamamagitan ng two-part special na mapapanood sa kanyang opisyal na YouTube channel kasama ang mga sektor na malapit sa kanyang puso – ang mga magsasaka at ang kabataan.

Sa araw na ito, Enero 27 at sa Sabado, Enero 28, ipakikita ng walang kapagurang mambabatas ang mga highlights ng katatapos lamang na kanyang pagbisita sa Candaba, Pampanga kung saan nakipag-bonding siya sa mga millennial na magsasaka sa Candaba Trade Center sa isang pagtitipon na pinamagatang ‘Kumustahan With Young Famers’.

Nakipag-tsikahan ang Super Ate na si Imee sa mga farmer-entrepreneurs sa isang dialogo kung saan pinag-usapan nila ang mga isyu na nakakaapekto sa industriyang pang-agrikultura ng bansa.

Ipinagmalaki din ng mga kabataang magsasaka ang kanilang iba’t-ibang produkto na talaga namang ikinatuwa ni Imee – mula sa iba’t-ibang mga gulay hanggang sa sibuyas, itlog ng itik, at litsugas hanggang sa kakaiba at Pinoy na Pinoy na Malunggay ice cream, na kaagad na naging paborito ng Senadora.

Samahan sina Senadora Imee at ang mga batang agriculturists ng Pampanga sa kakaiba at nagbibigay liwanag na farming experience na ito at mag-subscribe sa https://www.youtube.com/c/ImeeMarcosOfficial/featured

(ROHN ROMULO)

2 piloto ng PAF, patay sa plane crash sa Bataan

Posted on: January 27th, 2023 by @peoplesbalita No Comments

PATAY ang dalawang piloto ng Philippine Air Force (PAF) matapos na bumagsak ang sinasakyan nilang aircraft sa Pilar, Bataan umaga ng January 25, Miyerkoles.

Kinilala ang mga biktima na sina Captain Jhon Paulo Aviso at Captain Ian Gerru Pasinos.

Ayon kay Bataan PNP Provincial Director Police Col. Romell Velasco, lulan ang mga piloto ng Marchetti SF260 na may tail number 29-01 nang bumagsak dakong alas-10:40 ng umaga.

Sinabi ni Velasco na nakita ng mga residente sa lugar ang mabilis na pagbulusok ng aircraft sa kabukiran ng Sitio Tabon sa Barangay Del Rosario.

Kaagad namang nagtungo sa crash site ang mga tauhan ng Pilar Municipal Police Station at ang 2nd Police Mobile Force Company kung saan nakita nila ang dalawang piloto na nakalupaypay ang katawan sa cockpit ng eroplano.

Dinala na ang labi ng mga ito sa Martinez Funeral Homes sa Pilar, Bataan.

Napag-alaman naman kay PAF spokesperson Col. Maria Consuelo Castillo, sakay ng eroplano ang dalawang piloto na nagsasagawa ng training flight.

Galing ang trainer aircraft sa Sangley Point, Cavite at magpapalibut-libot sa lugar hanggang sa mawala ito sa monitor ng SPYDER (Surface-to-Air Python and Derby Medium Range) ng PAF dakong alas-10:34 ng umaga.

Lampas isang dekada nang nasa inventory ng PAF ang eroplano, ayon kay Castillo. (Daris Jose)