NAKATAKDANG magpulong sa Abril 8 ang 13 committees bilang crisis response sa patuloy na pagtaas ng presyo ng langis.

Ito ay pagkatapos palawigin ni Speaker Faustino “Bojie” G. Dy III sa 13 ang bilang ng House committees na naatasan na magsagawa ng isang unified legislative response para sa mga oil price crisis dala ng tumitinding Middle East conflict.

Sinabi ni Dy na layon ng pagdinig na masiguro ang koordinasyon sa Executive at makabuo ng konkretong hakbang para dito.

“The objective of these hearings is to work with our partners in the Executive to identify solutions, not point fingers. We want to hear directly from our economic managers and frontline agencies so we have the information we need to come with measures that can help our people cope with the impact of the Middle East conflict,” pahayag nito.

Sinabi ni House Committee on Ways and Means chair at Marikina City Rep. Miro Quimbo na nabuo ang grupo matapos ang isinagawang initial emergency meeting na ipinatawag ni Speaker sa ilang pangunahing committee leaders.

“Ang sole purpose is really to have an orchestrated and unified response on the part of the House para harapin at tingnan kung ano ang mga pwede nating magawa on an urgent basis para ma-address natin itong oil price crisis,” ani Quimbo.

Ayon pa sa mambabatas, limang komite ang inisyal na kasama na magsagawa ng emergency discussions —Ways and Means, Labor, Agriculture and Food, Energy, at Foreign Affairs — bago ito pinalawig ng Speaker.

Kasama sa 13 komite ang Energy, Agriculture, Aquaculture and Fisheries, Foreign Affairs, Ways and Means, Labor, Transportation, Information and Communications Technology, Economic Affairs, Social Services, Trade and Industry, Overseas Workers Affairs, at Appropriations.
(Vina de Guzman)

MULING nagsagawa ng eleksyon para sa mga bagong opisyal ang Manila City Hall Press Club (MCHPC), na isa sa pinakamatandang organisasyon ng mga mamamahayag sa bansa, nitong nakaraang Biyernes, Marso 27, 2026.

Sa naganap na eleksyon, naitalaga bilang Pangulo ng MCHPC si Ms. Jocelyn Domenden-Tabangcura na reporter ng Police Files Tonite habang ang nagbabalik na opisyal at dating Pangulo ng nasabing organisasyon na si JR Reyes, reporter at kolumnista sa pahayagang REMATE at Remate Online, ay nailuklok bilang Bise-Presidente.

Nanatili naman sa kani-kanilang pwesto sina Gene Adsuara ng People’s Balita bilang Kalihim at Emmanuel Mortega II ng DZXL bilang Ingat Yaman habang nanalo naman bilang Auditor si Archie Amado ng Radyo Aguila.

Nakuha naman ng beteranong reporter at kolumnista ng People’s Tonight at People’s Journal na si Edd Reyes ang pinakamataas na bilang para sa Director katuwang ang kilalang Anchor broadcaster at reporter ng Radyo Pilipinas na si Lorenz Tanjoco.

Sumunod na nakakuha ng may pinakamataas na bilang ay sina radio reporter Felix Laban ng DZME at ang kinikilalang reporter saan man sulok ng bansa na si Patrol 24 Jun Samson ng DWIZ.

Napabilang din sa mga Director sina Pot Chavez ng Manila Standard, DZBB reporter Manny Vargas, Bombo Radyo reporter na si Grant Hilario at DZMM radio reporter/anchor na si Steve Raz.

Nagsilbi naman bilang Comelec o tagapangasiwa ng eleksyon ang mga kinatawan ng National Press Club of the Philippines (NPC) na sina Director Dennis Napule at Director Jun Mendoza.

Ang naturang kaganapan ay sinaksihan naman ng mga beteranong reporter at kasalukuyang Adviser ng MCHPC na sina NPC Director at Radio reporter Aya Yupangco at ni DWWW anchor at People’s Bslita Consultant Archbishop Jemba Basco.

Ang MCHPC ay isa sa pinakamatandang samahan ng mga mamamahayag sa bansa na itinatag noon pang 1950’s. Ang nasabing samahan ay binubuo ng mga lehitimong reporter mula sa radyo, dyaryo, online, at telebisyon na nagkokober sa lahat ng kaganapan na nangyayari sa Manila City Hall. (Gene Adsuara)

NAIS ni Pangulong Ferdinand Marcos Jr. ang high-level engagement discussions sa Iran upang masiguro ang ligtas na pagdaan ng Philippine-bound vessels sa pamamagitan ng Strait of Hormuz sa gitna ng labanan sa Gitnang Silangan.

Sa katunayan ayon kay Presidential Communications Office Undersecretary at Palace Press Officer Claire Castro, inatasan ng Pangulo ang Department of Foreign Affairs (DFA) hinggil sa bagay na ito.
Sa kabilang dako, hangad naman ni Department of Foreign Affairs (DFA) Secretary Ma. Theresa Lazaro na makausap ang top diplomat ng Iran sa Maynila upang matiyak ang ligtas na pagdaan ng mga tangke na magdadala ng langis papasok sa Pilipinas habang hinahabol ng bansa ang oras para matiyak na ma-secure ang sapat na fuel bago ang nagbabadyang global shortage.
Nauna rito, nakipagpulong ang Pangulo sa mga miyembro ng UPLIFT (Unified Package for Livelihoods, Industry, Food, and Transport) Committee, isang inter-agency task force na kanyang itinatag bilang tugon sa kanyang idineklarang national energy energy dala ng labanan sa Gitnang Silangan.
Ani Castro, inatasan ng Pangulo si Lazaro na makipag-usap kay Iranian Ambassador to Manila Yousef Esmaeil Zadeh bunsod na rin ng nagbabadyang pangangailangan ng Pilipinas ng fuel sources.
“Ayon po kay Secretary Tess Lazaro ng DFA, makikipag-usap po siya sa ambassador ng Iran, most probably po ay tomorrow. Kung hindi man po magkakaroon ng tomorrow, by next week po,” ang sinabi ni Castro.
“However, it was not clear if there would be oil tankers bound for the Philippines already,” aniya pa rin.
Kumpiyansa naman ang Pilipinas na magiging maganda ang takbo ng pag-uusap lalo pa’t maganda naman ang relasyon ng Maynila sa Tehran.
“Sa akin pong pagkakaalam at sinabi po rin naman ni Secretary Tess Lazaro, maganda naman po ang relasyon natin sa bansang Iran,” aniya pa rin. (Daris Jose)