NANINDIGAN ang mga opisyal ng Iglesia Ni Cristo (INC) na tutol sila sa anumang bagay na labag sa konstitusyon at maging sa snap elections, kudeta at revolutionary government.

Ayon kay Bienvenido Santiago Jr., INC general evangelist, ang pokus lamang ng kanilang tatlong araw na rally ay paghingi ng konkretong aksiyon laban sa korapsiyon at hindi sa pagpapabagsak ng pamahalaan.

Dagdag pa niya, ang nais lamang nilang pabagsakin ay ang korapsiyon. Nais rin aniya nilang maging bukas sa publiko ang isinasagawang imbestigasyon upang matiyak na walang magaganap na pagtatakip dito.

Nanindigan pa si Santiago na dapat na mapanagot ang mga taong nasa likod ng maanomalyang flood control projects, maging sinuman ang mga ito at anuman ang posisyon sa pamahalaan.

Giit pa niya, ang panawagan nilang katotohanan at hustisya, ay nais nilang makamit sa pamamagitan ng mapayapang paraan at hindi ng kaguluhan.

Dagdag pa ni Santiago, “Yung masasamang pinuno, yung mga tiwaling opisyal, ayan ang dapat alisin…hindi po yung pamahalaang gumagarantiya sa kalayaan ng mga mamamayan. Kaya mga kababayan, malinaw ang ating pinaninindigan.”

Samantala, mariin namang pinabulaanan ng INC na may kinalaman sila sa video na inilabas ni dating Cong. Zaldy Co, na nagsasangkot kina Pang. Ferdinand Marcos Jr. at dating House Speaker Martin Romualdez sa naturang katiwalian.

Sa Viber message, sinabi ni INC spokesperson Edwil Zabala na, “We can categorically say that we have nothing to do with that.”

Samantala, tinapos na ng INC ang dapat sana ay 3-araw na anti-corruption protest ng kanilang grupo na ikinasa sa Quirino Grandstand.

Ayon kay Zabala, hindi na kailangan ang tatlong araw para makamit ang layunin nila na maiparating ang mensahe ng kanilang panawagan para sa truth, justice, accountability, at peace.

Dagdag pa niya, pagod na rin ang mga tao kaya’t nagpasya silang tapusin na ang rally, sa ikalawang araw pa lamang nito.

Matatandaang ang naturang rally, na sinimulan nitong Linggo, Nobyembre 16, ay nakatakda pa sanang magtapos ngayong Martes, Nobyembre 18.

(Daris Jose)

NAIS ni Senator Imee Marcos na maalis ang kanyang kapatid na si Pangulong Ferdinand Marcos Jr. sa puwesto para maisulong nito ang kanyang ka- “Team Itim.”

“Matanggal sa puwesto. Ano pa ba? Para i-angat ang kanyang ka-Team Itim. Yun lang naman yun e,” ang sinabi ni Presidential Communications Office Undersecretary at Palace Press Officer Claire Castro nang tanungin kung ano ang motibo ng senadora sa drug allegations nito laban kay Pangulong Marcos at sa First Family.

At nang tanungin kung ang tinutukoy niya ay si Vice President Sara Duterte, ang tugon ni Castro ay “Sino ba yung nasa campaign ads nila na Team Itim? Kung sino man ang kasama niya sa Team Itim, yun na yun.”

Matatandaang, buwan ng Abril nang magkaroon ng political advertisement si Imee Marcos at VP Sara kung saan tinawag nila ang kanilang sarili na “Team Itim.”

Sa isinagawang rally ng Iglesia ni Cristo sa Quirino Grandstand sa Maynila, araw ng Lunes, inakusahan ni Imee Marcos ang First Family na bumabatak ng ilegal na droga.

Araw ng Martes, itinanggi ni Presidential son at House Majority Leader, Ilocos Norte 1st District Representative Ferdinand Alexander “Sandro” Marcos ang akusasyon ng kanyang tiyahin.

Samantala, hinamon naman ng senadora ang kanyang kapatid na si Pangulong Marcos na sumailalim sa hair follicle drug test para maiwaksi ang kanyang akusasyon.

“Gustong paingayin ni Sandro ang usap-usapang hindi ako tunay na kapatid. Isa lamang ang solusyon: Magpapa-DNA test ako, magpa-hair follicle test sila,” ang sinabi ni Imee Marcos sa kanyang Facebook post.

Walang pangangailangan para sa updated drug test para sa Pangulo dahil makikita naman sa trabaho ng Pangulo na siya ay nasa ‘good condition.’

Sinabi ni Presidential Communications Office (PCO) Acting Secretary Dave Gomez na lumang tugtugin na ang panawagan na sumailalim sa hair follicle test si Pangulong Marcos.

“Sabi ko nga lumang tugtugin na ito. Mas maraming importanteng bagay ang dapat tutukan ng ating Pangulo at ng ating pamahalaan, ng Kongreso, ng Senado, at ng executive department,” ang sinabi ni Gomez.

Inalala pa ni Gomez na naharap na rin ang Pangulo sa kahalintulad na akusasyon noong presidential campaign in 2021, dahilan para mag-take ng drug test ang Pangulo.

Sa kabilang dako, wala namang ideya si Gomez sa motibo ni Imee Marcos sa akusasyon nito sa kanyang kapatid na si Pangulong Marcos.

“If you will allow me, I would like to echo kung ano ang sinabi ng Simbahan. Nakikita nila sa ngayon na mukang may pandemic of lies. Maging mapanuri tayo sa ating information na tinatanggap at shine-share sa publiko dahil napakaraming kasinungalingan na nakikita natin but I am confident and hopeful the truth will prevail,” ang sinabi ni Gomez. (Daris Jose)

HINDI magpapadala ang Malakanyang sa hamon at pag-uudyok ng mga maiingay na muling sumailalim sa hair follicle test si Pangulong Ferdinand Marcos Jr., para mapatunayan lamang sa publiko na negatibo siya sa paggamit ng ilegal na droga.

“Yes. Uulitin natin, paulit-ulit, uulit-ulitin natin, hindi po tayo magpapadala kung ano ang sinasabi ng mga maiingay. Matagal na po itong naresolba,” ayon kay Castro.

“Uulit-ulitin ko, paulit-ulit, ang Pangulo po ay malinis at ang Pangulo po ay hindi magpapadala sa anumang pag-uudyok: pag-uudyok ng mga destabilizers, pag-uudyok ng mga obstructionists na walang gagawin kundi magbigay ng mga kondisyon, magbigay ng pag-uutos sa Pangulo kahit hindi na po ito naaayon sa kaniyang pagtatrabaho,” dagdag na pahayag ni Castro.

Nauna rito, hinamon ng senadora ang First Family na magpa-hair follicle test ang mga ito para patunayan na mali ang kanyang alegasyon habang handa naman siya (Imee Marcos) na sumailalim sa DNA test.

Ito kasi ang iminungkahing solusyon ni Senador Imee Marcos kaugnay sa naging sagot ng pamangkin niyang si Ilocos Norte 1st District Rep. Sandro Marcos sa sinabi niyang gumagamit umano ng droga ang kapatid niyang si Pangulong Bongbong Marcos Jr.

“Gustong paingayin ni Sandro ang usap-usapang hindi ako tunay na kapatid,” saad ni Sen. Imee sa kaniyang latest Facebook post.

“Isa lamang ang solusyon: Magpapa-DNA test ako, magpa-hair follicle test sila,” dagdag pa niya.

Matatandaang tahasang sinabi ni Sen. Imee sa kilos-protesta ng Iglesia Ni Cristo (INC) noong Lunes, Nobyembre 17, na gumagamit diumano ng droga ang pangulo.

Bukod dito, nabanggit din ni Sen. Imee ang misis ni PBBM na si First Lady Liza Araneta-Marcos at si Sandro.

Bagay na pinabulaanan mismo ni Sandro nitong Martes, Nobyembre 18

“Sa lahat po ng binanggit ni senadora, walang basehan, walang katotohanan, at walang magandang idudulot sa bayan,” ani Sandro sa isang pahayag. (Daris Jose)

INIHAYAG ng Makabayan Bloc na hindi sapat ang pagbibitiw nina Executive Secretary Lucas Bersamin at Department of Budget and Management Secretary Amenah Pangandaman.

Ayon sa Makabayan, dapat na imbestigahan sila at ma-prosecute sa ilalim ng batas.

“These resignations tell us that President Marcos himself is feeling the heat from the corruption scandals plaguing his administration,” nakasaad sa statement.

Naniniwala ang mga ito na ang mga rebelasyon ni dating congressman Zaldy Co at ang pagbibitiw ng mga opisyal ay para proteksiyunan umano ang pangulo mula sa pananagutan.

Iginiit pa ng Makabayan na magsagawa ng isang komprehensibong imbestigasyon kina Bersamin, Pangandaman, at iba pa.

Kabilang na dito sina Presidential Legislative Liaison Office (PLLO) Usec.

Adrian Bersamin, Department of Education Undersecretary Trygve Olaivar; Department of Justice Undersecretary Jose Cadiz Jr., at iba pang isinasangkot sa alegasyon.

Wala anilang dapat iligtas mula sa pagbusisi.

Mas importante na isama mismo sa imbestigasyon si Presidente Marcos.

Gayundin, nanawagan din sila sa kongreso, Ombudsman, at iba pang law enforcement agencies na magsagawa ng imbestigasyon. (Vina de Guzman)

PINABULAANAN ni Presidential son at House Majority Leader Sandro Marcos ang akusasyon ng kanyang tiyahin na si Senadora Imee Marcos laban sa kanilang pamilya.

Reaksyon ito ng Ilocos Norte Representative matapos akusahan nabgagamint ng iligal na droga ang kanyang mga magulang na sina Pangulong Bongbong Marcos at First Lady Liza at maging siya.

Ikinalungkot din nito kung gaano ibinaba ng kanyang tiyahin ang sarili, gamit ang kasinungalingan at destabilisasyon para isulong umano ang kanyang personal na ambisyong pulitikal.

Ayon sa mambabatas, ‘dangerously irresponsible’ ang naging pahayag ng senadora laban sa kanila.

“Sa lahat ng binanggit ng senadora, walang basehan, walang katotohanan at walang magandang idudulot sa bayan,” saad nito sa isang statement.

Idinagdag pa nito na hindi ito pag-uugali ng isang tunay na kapatid na pagtaksilan ang sariling pamilya.

Una nang inihayag ng senadora sa rally ng INC nitong Lunes ang paggamit umano ng droga ng kapatid, asawa at anak nito.

Inihayag pa ni Sen. Marcos na matagal nang gumagamit ng ipinagbabawal na gamot ang mag-asawang Bongbong at Liza Marcos. (Vina de Guzman)