LUMAGDA si Navotas City Mayor John Rey Tiangco sa Memorandum of Agreement kasama ang Department of Energy para sa “Solar Solutions for Government: Energy Efficiency and Renewable Energy in Public Buildings” program. Aniya, layon nitong palakasin ang paggamit ng renewable energy sa public buildings at isulong ang mas maayos at efficient na paggamit ng kuryente.

Malaking hakbang rin aniya ito hindi lang para mabawasan ang gastusin sa kuryente, kundi para mapangalagaan din ang kalikasan. (Richard Mesa)

HINIKAYAT ni Akbayan Partylist Rep. Chel Diokno ang Kamara na imbestigahan ang napaulat na ni-require ng mga business process outsourcing (BPO) firms ang mga empleyado nito na pumasok kahit may kalamidad at matinding bagyo.

Sa House Resolution No. 491 na isinumite kasama sina Akbayan Partylist Reps. Perci Cendana at Dadah Ismula, at Dinagat Islands Rep. Kaka Bag-ao, nanawagan si Diokno sa House committee on labor and employment, committee on disaster resilience, ay iba pang kaukulang komite na magsagawa ng joint inquiry sa umano’y hindi ligtas na work practices na nakaapekto sa mahigit na 1.8 million Filipino BPO workers sa buong bansa.

Sinabi ni Diokno sa kanyang privilege speech nitong Lunes (Nov. 17) na batay sa lumabas na credible reports na pinapasok ng BPO companies ang kanilang empleyado na pisikal na pumasok sa trabaho o pilit na pinagamit ng leave credits noong may bagyo at iba pang natural na kalamidad, sa kabila ng mapanganib na kondisyon at government advisories.

“Sa kasagsagan ng Bagyong Tino at Bagyong Uwan, maraming BPO workers ang napilitang lumusong sa baha at sumuong sa malalakas na ulan at hangin—hindi upang maghanap ng ligtas na masisilungan, kundi upang makapasok sa trabaho. Ayon sa kanila, pinagbantaan sila ng kanilang mga kumpanya na paparusahan kung hindi sila papasok, kahit malinaw na delikado ang sitwasyon,” anang mambabatas.

Binigyan diin nito na ang practice na papasukin ang manggagawa na pumasok kahit may kalamidad ay ipinagbabawal sa batas, kabilang na ang probisyon sa Labor Code on occupational safety, at Republic Act No. 11058, para sa karapatan ng empleyado na tumanggi ng trabaho ng walang pangamba na mapapatalsik sa trabaho.

Dagdag pa aniya ang DOLE Labor Advisory No. 17 (2022) na nagsasaad na ang “employees who fail or refuse to work due to imminent danger resulting from weather disturbances shall not be subject to administrative sanction.”

Sa kabila ng mga polisiya, 98 BPO firms ang tinignan ng Department of Labor and Employment kasunod ng ulat na pinilit na pumasok sa trabaho noong may bagyo.

Bukod sa imbestigasyon, pinasisilip din ng resolution ang contingency plans at emergency protocols ng mga kumpanya para masiguro ang kaligtasan ng empleyado, enforcement mechanisms ng RA 11058 at karapatan na tumanggi sa hindi ligtas na trabaho; sapat na tugon ng DOLE sa reklamo at potential legislative reforms, tulad ng paid emergency leave, expanded remote-work options, simplified reporting mechanisms, at mabigat na parusa sa mga lalabag.
Ang Pilipinas ay tinatamaan ng nasa 20 bagyo sa isang taon, na nakaapekto sa kaligtasan at work mobility ng mga manggagawa.
“Filipino workers are not waterproof and calamity-proof. Forcing them into danger for profit is unacceptable, and we will never stand idly by in the face of unjust policies,” pagtatapos ni Diokno.
(Vina de Guzman)

PASADO na sa ikalawang pagbasa ang panukalang ordinansa sa Maynila na magpapalakas sa Madrasah Education Program.
Layunin nitong isama ang community-based Islamic schools sa sistema ng edukasyon ng lungsod sa pamamagitan ng mekanismong para sa akreditasyon, curriculum standardization, at pagbibigay ng teknikal at pinansiyal na suporta sa mga guro na matagal nang naglilingkod nang boluntaryo.
Ayon kay Councilor Elmer Par, tinatayang 50,000 Muslim ang naninirahan sa Golden Mosque area kaya’t mahalagang mabigyan ng pormal na suporta ang Madrasah.
Binibigyang-diin naman ni Councilor Lou Veloso ang pangangailangan ng standardized curriculum upang masiguro ang kalidad ng edukasyon habang napapanatili ang Islamic values.
Pinuri ni Vice Mayor Chi Atienza ang ordinansa bilang hakbang tungo sa mas inklusibong pamayanan sa Maynila. (Gene Adsuara)

NAGBABALA si Caloocan 2nd District Rep. Edgar R. Erice na ang Pilipinas ay nasa gitna ng isang malalim na krisis politikal, ekonomiko, at moral, na higit pang pinapatindi ng lumalalang korapsyon at hidwaang pampulitika.

“Ang landas tungo sa solusyon ay hindi kaguluhan, hindi kudeta, at hindi “BBM Resign. Hindi po solusyon ang pagpapatalsik sa Pangulo. Mas lalo itong magdudulot ng pagkakawatak-watak sa bayan, ” pahayag ni Erice.

Aniya, kung mapalitan ang Pangulo sa paraang hindi naaayon sa Saligang Batas, mas lalo lamang lalalim ang awayang pampulitika at magpapatuloy ang cycle ng paghihigantihan at palitan ng kapangyarihan.

“Kapag nag-resign si Pangulong Bongbong Marcos, papalit si VP Sara, at lalo tayong magkakawatak-watak. Wala ring tunay na pagbabago kung ang sistema ay bulok pa rin,” dagdag niya.

Nananawagan si Erice na kinakailangan dumaan sa Konstitusyonal na Proseso at ang nagkasala sa gitna ng mga akusasyon ng korapsyon laban sa Pangulo, mga mataas na opisyal, at iba pang sangay ng gobyerno.

Aniya, kung may ebidensyang lumabag ang Pangulo o sinumang opisyal sa Konstitusyon, naroon ang impeachment, ang Independent Commission on Infrastructure (ICI), at iba pang legal na mekanismong dapat galangin.

Iginiit din ni Erice sa Makabuluhang Kontitusyonal na Reporma na hindi sapat ang pagpapalit ng mga tao, ang dapat palitan ay ang sistemang nagpapalago ng katiwalian.

Kaya nanawagan siya ng agarang pagpasa ng mga sumusunod: 1. Anti-Political Dynasty Law na layong wakasan ang konsentrasyon ng kapangyarihan sa iilang pamilya at itama ang deka-dekadang pag-abuso; Anti-Turncoatism Law , na tutuldok sa balimbingan at gawing makabuluhan ang political parties; Campaign Finance Reform na layong gawing patas ang laban sa halalan at mabawasan ang impluwensiya ng yaman sa politik at ang Pagpapalakas ICI nang sa gayon ay magkaroon ng tunay na kakayahang imbestigahan, kasuhan, at supilin ang korapsyon sa mga proyekto ng gobyerno, maging sino man ang mabulgar.

Panawagan niya kina Pangulong Bongbong Marcos, Pangalawang Pangulong Sara Duterte, mga Senador, at mga kasamahan sa Kamara na unahin ang bayan bago ang sarili.

Hinimok din niya si Pangulong Marcos na isama sa legislative agenda ang mga repormang nabanggit at i-certify as urgent.

Hinikayat din ni Erice ang Pangulo na ipaliwanag nang malinaw sa publiko ang mga alegasyon ni dating Congressman Zaldy Co tungkol sa ₱100 bilyong insertions sa 2025 General Appropriations Act at iba pang nakaraang taon.

“Ito ay isyu ng kakayahan at pananagutan. Hindi maaaring balewalain. Kaya nananawagan ako na imbitahan at tanungin agad ang mga opisyal ng Department of Budget and Management, Department of Finance, at NEDA Secretary upang lumabas ang katotohanan.” giit ni Erice.

Sa pamamagitan ng Konstitusyon, maaari pa nating iligtas ang bayan at bigyan ang mamamayan ng tunay na pagbabago,” pagtatapos niya.
(Richard Mesa)

MAGLALABAS ng show cause order ang Commission on Elections (Comelec) si Senator Rodante Marcoleta dahil sa umano’y maling pagdeklara ng donasyon sa kampanya.

Sinabi ni Comelec Chairman George Garcia na layunin ng show cause order na pagpaliwanagin si Marcoleta kung saan naggaling o sino ang nagbigay ng donasyon sa anyang kampanya.

Ayon kay Garcia, ang Political and Finance Department ng komisyon ang mag-iisyu ng show cause order laban sa senador dahil sa ulat na umano’y hindi pagtutugma ng Statement of Contributions and Expenditures (SOCE) ni Marcoleta sa kanyang Statement of Assets, Liabilities, and Net Worth (SALN).

Ayon kay Garcia, lumalabas base sa SOCE ni Marcoleta na P112 milyon ang nagastos sa kampanya, mas mataas kumpara sa higit P52 milyon na idineklara sa kanyang SALN.

Paliwanag ng Comelec, dapat malinaw na nakalista sa SOCE ang lahat ng donor at pinagmulan ng kontribusyon, at walang exemption kahit anonymous a kong donor.

Possible namang maharap sa kasong perjury o paglabag sa election law si Marcoleta kung mapatunayang pineke ang kanyang SOCE, sabi pa ng Comelec.( Gene Adsuara)