INILABAS na ng Judicial and Bar Council ang listahan ng mga aplikante para sa susunod na Presiding Justice ng Court of Tax Appeals kasunod ito ng pagreretiro sa posisyon ni Justice Roman Del Rosario.

Itinalaga si Del Rosario noong Marso 13,2013 at nakatakdang matapos ang kanyang termino sa October 6,2025.

Kabilang sa mga naghain ng aplikasyon sina:

Marlon Agaceta

Cresencjo Aspiras Jr.

Rosauro David

Vicky Fernandez

Marc Joseph Quirante

Marian Ivy Reyes-Fajardo

Ma. Belen Ringpis-Liban

At Maria Rowena San Pedro.

Samantala, naglabas din ng survey ang JBC na makikita sa kanilang social media platform na maaaring sagutan hanggang alas 4:30 ng hapon upang malaman ang saloobin ng publiko. (Gene Adsuara)

PARA sa transparency at accountability, naghain si Akbayan Partylist Rep. Chel Diokno ng resolution na nag-aatas sa Secretary General ng House of Representatives na gawing bukas sa publiko ang Statements of Assets, Liabilities, and Net Worth (SALNs) ng lahat ng mga miyembro ng Kamara.

Nakapaloob ito sa House Resolution No. 271, na inihain ng mambabatas kaama sina Akbayan Reform Bloc members Akbayan Party-list Reps. Percival Cendaña, Dadah Kiram Ismula, at Dinagat Islands Rep. Kaka Bag-ao.

“The Constitution is clear: public office is a public trust. If we truly want to weed out corruption, lawmakers must first open themselves to scrutiny. By making our SALNs open to public scrutiny, we are showing the people that we have nothing to hide and everything to account for,” ani Diokno.

Inihain ng mambabatas ang resolusyon kasunod na rin sa nagaganap na imbestigasyon sa kontrobersiyal na flood control projects, kung saan naglipana ang alegasyon ng korupsyon, ghost projects, at irregular contracts.

“Recent flooding has raised serious concerns about irregularities in the implementation of flood control projects, including allegations of ghost projects, overpriced contracts, questionable bidding practices, and the involvement of relatives or close associates of public officials,” nakasaad sa resolution.

Sa Republic Act No. 6713 o Code of Conduct and Ethical Standards for Public Officials and Employees kung saan nakamandato na ang SALNs ay available para sa inspection sa reasonableng oras at ang pagkopya ay maaaring makuha matapos ang 10 working days mula sa araw na inihain ang request.

Ngunit, ni-restrict ng Office of the Ombudsman ang public access sa SALNs sa pamamagitan ng Memorandum Circular No. 1, s. 2020 na inisyu sa panahon ng Duterte administration.

Upang masiguro naman ang kaligtasan at seguridad ng mga mambabtas, nakapaloob sa resolusyon ang mandato na ang mga sensitibong personal information tulad ng addresses, signatures, at ID details ay dapat na alisin.

Una ng hinikayat ni Diokno ang miyembro ng InfraCom na nagiimbestiga sa flood control issue na “make a full disclosure of financial, business, or pecuniary interest that may be directly or indirectly affected by any investigation into the government’s past or present flood control projects.”

“I believe we need to assure the public that this investigation will not be a whitewash and that no members of the three committees conducting this investigation have a conflict of interest,” pahayag ni Diokno.

Hinamon din ng mambabatas ang mga opisyal ng Department of Public Works and Highways (DPWH) na sangkot sa flood control controversy na magsumite ng kanilang SALNs at lumagda sa bank secrecy waivers upang masiguro na mayroong full accountability.

(Vina de Guzman)

PINANGUNAHAN ni Pangulong Ferdinand R. Marcos Jr., araw ng Huwebes, ang pag-turnover ng 500 wheelchair na inilaan para sa indigent patients sa Ilocos Norte.

Ang 575 wheelchair, ipinamahagi sa pamamagitan ng inisyatiba ng Philippine Charity Sweepstakes Office (PCSO), ay ibinigay sa 21 munisipalidad at 2 lungsod ng lalawigan kung saan nakatanggap ng 25 units bawat isa.

Ang ceremonial distribution, idinaos sa Imelda Cultural Center sa Batac City, ay bahagi ng pagdiriwang ng ika-108 birth anniversary ng kanyang ama at kapangalan na si dating pangulong Ferdinand Marcos Sr.

“Thank you, Mr. President, for the wheelchairs given to our constituents in need,” ang sinabi ni Rose Ingrid Salvador, isang staff sa tanggapan ng Alkalde ng Pagudpud na siyang nangasiwa sa pagbyahe sa wheelchair patungong Pagudpud matapos ang turnover.

Sa kabilang dako, mainit na tinanggap ni Acting Provincial Social Welfare and Development Officer Rochelle Gajes ang dinonate na kagamitan, sabay sabing maraming pasyente ang humihingi ng tulong sa kanyang tanggapan lalo na ang request para sa wheelchair.

Samantala, bahagi rin ng birth anniversary celebration ng matandang Marcos, isang free dialysis treatment ang ipinagkaloob sa mga pasyente sa Mariano Marcos Memorial Hospital sa Batac City.

Nag-alay naman ang chorale ng ospital ng tradisyonal na Ilocano songs sa mga pasyente bilang pagbibigay galang sa Marcos patriarch, na magiliaw na tinatawag na “Apo Lakay” ng mga Ilocano.

Sa ilalim ng direktiba ni Pangulong Pangulong Marcos Jr., nagsasagawa na ang administrasyon ng iba’t ibang healthcare improvement initiatives, kabilang na ang zero balance billing sa mga ospital ng goibyerno, pinalawak na saklaw ng Philippine Health Insurance Corp. (PhilHealth), at distribusyon ng patient transport vehicles sa lahat ng 1,642 local government units sa buong bansa sa pagtatapos ng taon.  (Daris Jose)

LISENSYA NG 5 BGC BOYS, SUSPENDIDO NA NG 90 DAYS

SUSPENDIDO na ng 90 days ang lisensya ng limang tinaguriang BGC Boys na matapos madiskubreng gumagamit sila ng pekeng driver’s license para makapasok ng casino.

Kabilang dito sina dismissed Department of Public Works and Highways (DPWH) Bulacan First District Engineer Henry Alcantara at assistant district engineers Brice Hernandez, Jaypee Mendoza, Edrick San Diego at Arjay Domasig.

Sinabi ni Land Transportation Office (LTO) Assistant Secretary Vigor Mendoza na ipinatatawag na rin nila sa Biyernes, September 12, ang dalawa, at maaaring ma-revoke at hindi na rin sila makapag-apply muli ng panibagong lisensya.

“The minimum is perpetual revocation ng authentic license nila at perpetual disqualification—use of fake license yan,” ani Asec. Mendoza.

Nauna nang ipinag-utos ni Transportation Acting Secretary Giovanni Lopez sa LTO na huwag palampasin ang kahit anumang pamemeke ng lisensya at parusahan ang mga mahuhuling gumagawa nito. (PAUL JOHN REYES)

NANAWAGAN si Parañaque Rep. Brian Raymund Yamsuan na taasan ang pondo para sa Presidential Communications Office (PCO) upang tulungan ang gobyerno na mapanalunan ang kampanya kontra sa fake news.

Bilang pangunahing communications agency ng gobyerno, sinabi ni Yamsuan na dapat magsilbi ang PCO sa forefront sa pagbibigay sa publiko ng tamang information at itama ang pekeng balita at disinformation na kumakalat sa social media ukol sa gobyerno.

Dapat din aniyang mabigyan ang PCO ng karagdagang resources para sa mga programa nito sa digital media, na kadalasang ginagamit ngayon para sa balita at impormasyon.

“You have to inform Congress of all the things that you need to be effective, to effectively communicate with the people. Paano tayo makikipaglaban [against fake news] kung wala tayong bala,” pahayag ni Yamsuan sa representante ng PCO sa isinagawang briefing ng House Committee on Public Information.

Sinabi ni PCO Assistant Secretary Jose Maria Villarama II na ang kanilang tanggapan ay “makes do with the funding” sa pondong ibinigay sa ilalim ng national budget. Ang alokasyon ng PCO para sa digital media initiatives a ilalim ng panukalang spending plan para sa 2026 ay P16 million.

(Vina de Guzman)

NASUKOL ng mga tauhan ng Northern Police District (NPD) sa pina-igting na operation kontra wanted persons sa Lungsod ng Valenzuela ang isang babae na wanted sa Pasig City.

Sa ulat, nakatanggap ng tip mula sa isang mapagkatiwalaang importante ang mga tauhan ni NPD Acting District Director P/BGen. Jerry Protacio na nagtatago umano sa Valenzuela City ang 29-anyos na bebot na si alyas “Lota”.

Napag-alaman ng mga operatiba ng District Mobile Force Battalion–Intelligence Section ng NPD na ang akusado ay kabilang sa talaan ng mga Most Wanted Person (MWP) ng Pasig City Police Station kaya agad nilang ikinasa ang pagtugis kay alyas “Lota”.

Bandang alas-2:40 ng madaling araw nang tuluyang matunton ng mga tauhan ni Gen. Protacio ang akusado sa kanyang tinutuluyan sa Phase II, Libis Street, Barangay Canumay East.

Ang akusado ay dinakip ng pulisya sa bisa ng warrant of arrest na inisyu ng Presiding Judge ng Regional Trail Court (RTC) Branch 166, Pasig City noong February 26, 2025 para sa Qualified Theft (29 Counts).

Ayon kay BGen. Protacio, may inirekomendang piyansa naman ang korte na halagang P1,044,000.00 para sa pansamantalang paglaya ng akusado.

Pansamantalang nakapiit ang akusado sa custodial facility unit ng NPD habang hinihintay ang pagpapalabas ng commitment order mula sa hukuman. (Richard Mesa)

DEDBOL ang 21-anyos na kelot matapos mag-ala superman nang lumipad mula sa ika-apat na palapag ng malaking supermarket sa Valenzuela City, Miyerkules ng hapon.

Dead-on-the-spot sanhi ng matinding tinamong pinsala sa katawan ang biktimang nakilala sa pamamagitan ng nakuhang driver’s license na si alyas “Ryan”, residente ng Brgy. Mapulang Lupa, nakasuot ng puro itim na damit  na tila nagluluksa na sa kanyang kamatayan.

Sa ulat na nakarating kay Valenzuela Acting Police Chief P/Col. Joseph Talento, napansin na ng testigong si alyas “Reza”, 29, isa sa mga may-ari ng stall sa supermarket sa Brgy., Paso De Blas ang biktima, na tila wala sa sarili, balisa, at palakad-lakad hanggang umakyat sa ika-apat na palapag bago mag-ala-1 ng hapon.

Nang makarinig ang testigo ng tila kaguluhan malapit sa escalator sa lower ground ng supermarket, nakita na lang niya ang biktima na tumalon na sa ika-apat na palapag at lumagpak sa ibaba ng establisimiyento.

Mismong ang mga rescue officer ng Valenzuela City Disaster Risk Reduction and Management Office (VCDRRMO) na nagresponde sa lugar ang nagdeklara na patay na ang biktima habang nakita na rin sa CCTV ng mga imbestigador ang patunay na kusang tumalon ang biktima mula sa ika-apat na palapag ng supermarket.

Maliban sa driver’s license, nakuha rin ng pulisya ang suicide note sa bulsa ng biktima bagama’t hindi na isinapubliko ang nilalaman nito. (Richard Mesa)