INILUNSAD ng Pamahalaang Lungsod ng Navotas ang rescue operation at evacuation efforts sa mga residenteng nakatira sa Celestino St., Brgy. San Jose, dahil sa mabilis na pagtaas ng tubig baha na dala ng high tide na sinamahan pa ng patuloy na pagbuhos ng ulan.

Ito’y matapos masira ang pader ng isang pribadong kompanya sa nasabing lugar na dahilan upang rumagasa ang malakas na agos ng tubig patungo sa mga kabahayan kaya mabilis na lumikas ang mga residente.

          Pinangunahan mismo ni Mayor John Rey Tiangco ang pag-rescue at pagpapalikas sa mga pamilyang apektado ng pagtaas ng tubig, katuwang ang disaster response team ng lungsod, Navotas Police, Maritime Police, AFP at iba pang rescue volunteers.

          Nabatid na kahit walang ulan ay apektado sa baha ang ilang lugar sa lungsod dahil nakakapasok ang tubig dagat tuwing high tide bunga ng hindi pa rin naayos ang Tangos-Tanza Navigational Gate na siyang pumipigil sa tubig pag high tide.

          Pagbabayarin umano ng pamahalaang lungsod ang kompanyang nagmamay-ari ng nasirang pader habang pinaalalahanan ni Mayor Tiangco ang lahat na nakatira sa tabing-dagat o ilog na lumikas na para sa kaligtasan ng kanilang pamilya.

Tuloy-tuloy din ang isinasagawang libreng sakay ng pamahalaang lungsod sa mga rutang lubhang apektado para matulungan ang mga stranded na commuter, gayun din ang relief operations at serbisyong pangkalusugan sa mga evacuation center. (Richard Mesa)

BILANG tugon sa malawakang pagbaha dulot ng ilang araw na pagbuhos ng malakas na ulan dala ng Habagat at bagyong Crising, Dante at Emong, idineklara ng Pamahalaang Lungsod ng Valenzuela na isailalim sa state of calamity ang lungsod, kasunod ng pag-apruba sa Resolution No. 3503, Series of 2025, na ipinasa sa special session ng Sangguniang Panlungsod.

Ang deklarasyon ay batay sa mga pormal na rekomendasyon ng Local Disaster Risk Reduction and Management Council (LDRRMC) at mga barangay na nag-ulat ng malawakang pagbaha, pinsala sa imprastraktura, at pagkagambala sa komunidad.

Sa kasagsagan ng pagbaha, mahigit 9,000 indibidwal ang nailigtas at inilikas sa mga evacuation center ng Valenzuela City Disaster Risk Reduction and Management Office (VCDRRMO), katuwang ang City Social Welfare and Development Office (CSWDO) at City Health Office para matiyak ang kaligtasan, kalusugan, at kapakanan ng mga apektadong residente.

Ang deklarasyon ng state of calamity ay nagbibigay-daan sa mabilis na paggamit ng mga lokal na pondo para sa kalamidad, pagbibigay ng emergency assistance, at ang pagpapabilis sa recovery and rehabilitation efforts sa mga apektadong lugar. Pinapadali din nito ang koordinasyon sa mga pambansang ahensya at mga humanitarian partner para sa paghahatid ng kinakailangang suporta.

Layunin ng pamahalaang lungsod na matiyak ang mapabilis na pagbangon ng bawat Pamilyang Valenzuelano nang may lakas at dignidad. Nagpapatuloy naman ang relief operations at serbisyong pangkalusugan sa mga evacuation center.

Nagpapatuloy din ang Libreng Sakay ng pamahalaang lungsod sa mga rutang lubhang apektado para matulungan ang mga stranded na commuter.

“Hindi po natin pwedeng baliwalain ang epekto nitong bagyo sa ating mga manggagawa at marginalized sector, kaya naman idineklara na natin ang state of calamity dito sa ating lungsod. Nananawagan po ako sa ating mga kababayan na maging alerto at makiisa, sapagkat ang ating kolektibong pagkilos at responde ay higit na kinakailangan ng ating mahal na lungsod.” pahayag ni Mayor Wes Gatchalian sa kanyang video message na inapload sa Facebook.

Kaugnay nito, nananatili sa heightened alert ang pamahalaang lungsod dahil sa patuloy na pag-ulan na dala ng Bagyong Dante at Emong na maaaring magdulot ng karagdagang pagbaha at pinsala. (Richard Mesa)

BANGKAY na nang matagpuan habang palutang-lutang ang katawan ng isang machine operator na unang tumalon sa ilog noong Martes ng hapon sa Malabon City.

          Kinilala ni Malabon police chief P/Col. Allan Umipig ang biktimang si Alvin Almanzor, 32, residente ng Sto. Niño, Barangay Concepcion.

Batay sa imbestigasyonn ni P/MSg. Jeric Tindugan, may hawak ng kaso, lasing umano ang biktima nang tumalon sa ilog sa Sto Rosario Village dakong alas-2 ng Martes ng hapon sa kasagsagan ng malakas na buhos ng ulan.

Nang hindi na lumutang ang biktima, humingi na ng tulong ang mga residente at opisyal ng barangay sa Philippine Coast Guard (PCG) at Malabon City Disaster Risk Reduction and Management Office (CDRRMO).

Kaagad namang nagsagawa ng rescue operation ang mga tauhan ng PCG at CDRRMO subalit, bigo ang mga ito na mahanap ang lalaki.

Hindi tumigil ang Rescue Team ng PCG at CDRRMO sa paghahanap sa biktima hanggang makita nila ang wala ng buhay na kaatwan nito dakong alas-6:20 ng Miyerkules ng gabi sa Pumping Station sa Brgy Baritan. (Richard Mesa)