NATAGPUAN na ng mga awtoridad ang isa sa dalawang sakay ng isang multi-purpose vehicle (MPV) na iniulat na tinangay ng malakas na agos ng baha sa kasagsagan ng pananalasa ng Habagat sa Caloocan City, Lunes ng gabi.

Martes ng hapon nang makita sa bahagi na ng ilog sa may Barangay 176, Bagong Silang ang bangkay ng 60-anyos na lalaki na isa sa dalawang sakay ng itim na Mitsubishi Xpander na tinangay ng malakas na agos ng tubig baha patungo sa kanal sa Dona Aurora sa Brgy. 177, Camarin sa kasagsagan ng malakas na buhos ng ulan.

Napag-alaman na mataas at malakas na ang ragasa ng tubig-baha sa lansangan nang tangkain pa rin umanong tahakin ng driver ng MPV hanggang sa lumutang at tinangay na ng agos patungo sa kanal sa Dona Aurora.

Ilang mga residente ang nagtangka pang iligtas ang dalawang sakay ng MPV subalit nabigo na rin sila nang tuluyang tangayin ito ng malakas na agos.

Makaraang ang mahigit isang oras, nakuha ng Rescue Team ng City Disaster Risk Reduction and Management Office (CDRRMO) ang sasakyan sa ilalim na ng Durian Bridge na ayon sa alkalde ay may kalayuan na mula sa pinaghulugang kanal sa Dona Aurora.

Sinabi naman ni Caloocan City Mayor Dale Gonzalo “Along” Malapitan na hindi sila titigil, kasama ang iba pang ahensiya ng pambansang pamahalaan sa paghahanap sa kasama ng natagpuang biktima habang nakikipag-ugnayan na rin sila sa kaanak ng mga ito.

(Richard Mesa)

NAHARANG  sa NAIA Terminal  ang isang 47-anyos na babae matapos tangkaing bumiyahe sa ibang bansa gamit ang pekeng Overseas Employment Certificate (OEC).

Lumabas sa beripikasyon na hindi nakapangalan sa pasahero ang OEC at hindi rin siya nasa listahan ng BI-DMW system.

Sa pagtatanong, inamin ng babae na nagbayad siya ng P2,010 sa isang fixer para sa “OEC assistance.”

Ipinaubaya na sa Inter-Agency Council Against Trafficking ang kaso para sa imbestigasyon.

Nagbabala si BI Commissioner Joel Viado na hindi na makakalusot ang mga pekeng dokumento dahil madali na itong ma-detect.

Binalaan din ang publiko sa paggamit ng pekeng dokuemnto at sa pagkuha ng serbisyo mula sa mga fixer.

“Shortcuts do not work anymore. Our systems are now linked with the DMW, and fake documents can easily be detected. Anyone who attempts to bypass legal procedures not only risks being stopped, but may also face legal consequences,” ani Viado.

Hinikayat din niya ang mga nais magtrabaho abroad na dumaan lamang sa Department of Migrant Workers o DMW. (Gene Adsuara)

NILIKAS ng lokal na pamahalaan sa pangunguna ng Manila Department of Social Welfare (MDSW) ang may 821 na pamilya dahil sa tuloy-tuloy na pag-ulan at pagtaas ng rin ng tubig baha sa lungsod dala ng masamang panahon.

Sa pahayag ni MDSW Director Jay Reyes Dela Fuente, karamihan sa mga inilikas na pamilya ay inabot na ng tubig baha ang loob ng kanilang bahay .

Nasa 2,823 na indibidwal ang nananatili sa mga evacuation centers tulad ng sports complex, barangay hall, pampublikong paaralam, multi-purpose hall, covered court at sports complex.

Karamihan sa mga inilikas ay mga nakatira sa gilid ng estero at ilog Pasig, malapit sa baybayin ng Manila bay at mga lugar na binabaha tuwing malakas ang buhos ang ulan.

Patuloy naman ang monitoring at pag-iikot ng mga tauhan ng MDSW upang malaman ang sitwasyon ng mga residente at agad na matulungan kung kinakailangan

Namahagi na rin ng mga pagkain, inumin at iba pang pangangailangan ang Maynila LGU para sa mga residente nila na nananatili sa evacuation centers. (Gene Adsuara)

BAGSAK sa kulungan ang isang construction worker na sangkot umano sa pagbebenta ng illegal na droga matapos makipagtransaksyon sa isang pulis na nagpanggap na buyer sa Valenzuela City.

          Sa kanyang report kay Northern Police District (NPD) Acting District Director P/BGen. Jerry Protacio, kinilala ni Valenzuela Police OIC chief P/Col. Gerson Bisayas ang naarestong suspek na si alyas “Jun”, 48, ng Brgy. Ugong.

          Nakatanggap ng impormasyon ang mga tauhan ni P/Capt. Joan Dorado, hepe ng Station Drug Enforcement Unit (SDEU) hinggil sa umano’y pagbebenta ng suspek ng shabu kaya ikinasa ng SDEU ang buy bust operation, sa koordinasyon sa PDEA.

          Hindi na nakapalag ang suspek nang dambahin ng mga tauhan ni Capt. Dorado, sa pangunguna ni P/Lt. Sherwin Dascil makaraang bentahan ng shabu ang isang pulis na nagpanggap na buyer dakong alas-11:55 ng gabi sa Lamesa St., Brgy. Ugong.

          Nakumpiska sa suspek ang nasa 15 grams ng suspected shabu na may estimated street value na P102,000, buy bust money, recovered money at coin purse.

          Ayon kay P/MSgt. Ana Liza Antonio, kasong paglabag sa Sections 5 at 11, under Article II ng R.A 9165 o ang Comprehensive Dangerous Drugs Act of 2002 ang kanilang isinampa laban sa suspek sa pamamagitan ng inquest proceedings sa Valenzuela City Prosecutor’s Office.

          Pinuri naman ni Gen. Protacio ang operating team sa kanilang mabilis at decisive action na nagresulta sa pagkakaaresto sa isang drug personality. “This operation is a testament to our unrelenting campaign against illegal drugs and our commitment to a drug-free community,” aniya. (Richard Mesa)

KALABOSO ang 59-anyos na retiradong sundalo matapos pagtripan at pagbabarilin ang tatlong binata, kabilang ang dalawang estudyante sa Caloocan City.

          Sa kanyang report kay Northern Police District (NPD) Acting District Director P/BGen. Jerry Protacio, kinilala ni Caloocan Police OIC chief P/Col. Joey Goforth ang suspek na si alyas “Juanito”, 59, retired Marines, at residente ng Brgy. 8.

          Lumabas sa inisyal na imbestigasyon, dakong alas-6:30 ng gabi, kumakain sa Sinilyasi Street, Brgy., 8, ang mga biktimang sina alyas “DJ”, 20, out-of-school youth, alyas “Zenri”, 20, estudyante at alyas “Mark”, 19, estudyante, pawang residente ng nasabing barangay, nang dumaan ang suspek at kanyang kasama.

          Makalipas ang ilang sandali, bumalik ang suspek at nilapitan ang mga biktima saka nagtanong “Adik ba kayo?” bago naglabas ng baril at ilang beses na nagpaputok patungo sa direksyon ng tatlong binata.

          Dahil sa takot, nagtakbuhan sa magkakaibang direskyon ang mga biktima saka nagtago para sa kanilang kaligtasan habang tumakas naman ang suspek patungo sa kanilang bahay.

          Humingi naman ng tulong ang mga biktima sa pulisya at sa isinagawang follow-up operation ng mga tauhan ng Caloocan Police Sub-Station 4 sa pangunguna ni P/Capt. Zoilo Lopez, katuwang ang SWAT team sa pamumuno ni P/Capt. Mark Son Almeranes ay matagumpay na naaresto ang suspek.

          Nakumpiska sa suspek ang ginamit na isang ARMSCOR caliber .45 pistol na may isang magazine na kargado ng isang bala at isang basyo ng bala saka siya dinala sa himpilan ng pulisya para sampahan ng kaukulang kaso. (Richard Mesa)

SA ISANG viral na video na kumakalat ngayon sa social media, makikita ang isang insidente ng alitan sa pagitan ng isang motorcycle rider na gumagamit ng ride-hailing app at ilang mga tricycle driver, umano’y naganap sa isang TODA (Tricycle Operators and Drivers’ Association) terminal o pick-up point. Ayon sa video, pilit na pinipigilan ng mgatricycle driver ang motorcycle rider sa paglapit sa pasahero nito kahit na may confirmed booking ito mula sa naturang ride-hailing platform. Ang paninindigan ng mga tricycle driver ay tila nakikita nilang pang-aagaw ng teritoryo ang pagpasok ng motorcycle rider sa lugar na kanilang ino-operate. Ang video ay mapapanood dito: https://www.facebook.com/reel/715964551163836

Ipinapaalala ng Lawyers for Commuters Safety and Protection (LCSP) na hindi ito ang unang pagkakataon namay ganitong insidente. Marami nang naitalang kahalintulad na insidente kung saan hinaharang o sinisitang mga miyembro ng TODA ang mga motorcycle riders, sa pag-aakalang inaagawan sila ng ruta. Sa katunayan, sa isang pagdinig ng Senate Committee on Public Services na dinaluhan ng LCSP ngayong taon, tinalakay ang parehong isyu na kasalukuyan nang pinag-aaralan ng isang technical working group.

Ang posisyon ng LCSP sa isyung ito ay malinaw:

Kinokondena namin ang sapilitang ginawa ng mgatricycle driver laban sa motorcycle rider. Hangga’t may kumpirmadong booking ang isang lehitimong accredited na motorcycle rider sa pamamagitan ng isang ride-hailing app, dapat siyang pahintulutang magtungo sa kinaroroonan ng pasahero — kahit pa saklaw ng ruta ng isang TODA ang lugar na iyon.

Ang prinsipyong ito ay nakabatay sa karapatan ng bawat pasahero na pumili ng uri ng pampublikong transportasyon na nais niyang gamitin. Sa mga nag-viral na video ng kaparehong insidente, sinasabi ng mga tricycle driver na ang pagpapapasok sa mga ride-hailing motorcycle riders sa mga subdivision o residential area ay banta raw sa kanilang kabuhayan. Kaya ang nais nila, ang pasahero ay sumakay muna ng tricycle papuntang TODA terminal bago mag-book ng ibang transportasyon. Ngunit ang mungkahing ito ay hindi makatwiran at salungat sa batas.

Uulitin namin: ang karapatan sa pagpili ng sasakyan  ay nasa pasahero. At lalo itong mahalaga kapag malayo ang destinasyon o kung may kailangan silang agarang puntahan. Mariing tinuturing na mas praktikal para sa ibang commuter na mag-book ng motorcycle ride-hailing service na may point-to-point pick-up at drop-off, kaysa sumakay muna ng tricycle, bumaba sa terminal, at doon pa lamang mag-book ng panibagong sasakyan.

Mahalagang linawin: ang mga insidenteng tinutukoy natin ay may kinalaman sa mga riders na may confirmed bookings mula sa legitimate ride-hailing platforms. Sa ganitong mga kaso, walang legal na kapangyarihan o sapat na batayan ang mga tricycle driver upang hadlangan sila. Iba ang usapan kung ang rider ay sangkot sa “habal-habal” o ‘colorum’ na operasyon—kung saan pumapara lang ng pasahero nang walang booking at nanginginain ng pasahero sa TODA areas. Ngunit kung lehitimo ang booking sa platform, dapat hayaan siyang gawin ang serbisyo.

Ang ginawa ng mga tricycle driver sa video ay maaaring umabot sa grave coercion under the Revised Penal Code, na nagpaparusa sa sinumang pumipigil sa isang tao na gawin ang isang bagay na hindi ipinagbabawalng batas gamit ang dahas o pananakot. Sa kasong ito, pinipigilan nila ang motorcycle rider na sunduin ang kanyang pasahero—isang legal na aktibidad—sa pamamagitan ng pananakot. Katulad din nito, ang pamimilit sa pasahero na huwag mag-book sa ride-hailing apps ay maaaring ituring na grave coercion, dahil pinipilit nila ang pasahero na gumawa ng bagay na labag sa kanyang kalooban.

Bukod pa rito, magkaiba ang saklaw at kalikasan ng operasyon ng mga tricycle at ng mga motorcycle riders mula sa ride-hailing apps:

Ang mga tricycle ay kumukuha ng kanilang awtoridadmula sa mga Local Government Unit (LGU) at karaniwang limitado lamang sa mga itinakdang ruta gaya ng mga kalsada sa loob ng subdivision o barangay. Samantala, ang mga motorcycle rider na kumikilos sa ilalim ng mga ride-hailing platform ay maaaring bumiyahe sa mas malawak na mga ruta at tumawid sa iba’t ibang hurisdiksyon, kaya maaring sila ay tinuturing na mas flexible at praktikal silang opsyon para sa mga malalayong biyahe o point-to-point na lakad.

Sa huli, nais ng LCSP na idiin na ang pinaka-pangunahing dapat isaalang-alang sa ganitong mga sitwasyon ay ang kalayaan ng pasahero na pumili. Kung mas nais ng pasahero na sumakay ng tricycle, dapat igalangito. Ngunit kung pinili nilang mag-book ng motorcycle rider sa pamamagitan ng ride-hailing platform at ito ay may confirmed booking, dapat din itong igalang at hindi hinaharang ng mga tricycle driver o TODA. Ang pagbabawal sa isang legal na aktibidad ay hindi lamang labag sa karapatan ng pasahero—maaaring magbunga rin ito ng pananagutang kriminal sa ilalim ng batas.

Atty. Albert N. Sadili
Spokesperson

Lawyers for Commuters Safety and Protection (LCSP)
09660859816 – Viber and Mobile Number