2024 April Archive - People's Balita

Archive for April, 2024

Naging emosyonal dahil 14 years na sila: MICHAEL, nilinaw na ‘di pa magtatapos ang top-rating sitcom

Posted on: April 24th, 2024 by @peoplesbalita No Comments

NILINAW ni Michael V. na hindi pa magtatapos ang top-rating sitcom nila na ‘Pepito Manaloto.’

Naglabasan ang komento tungkol sa pagtatapos ng award-winning sitcom nang makita ng netizens ang group hug photo ng cast na i-pinost ng comedian na si John Feir sa Instagram.

Heto ang naging pahayag ni Bitoy: “’Yung group hug na ‘yun, actually ‘yung photo na yun ang nire-represent nun is ‘yung group hug namin, parang remembrance. Appreciation, natuwa lang kami na after all these years, after nung pandemic, magkakasama pa rin kami.”

Naging emotional lang daw si Manilyn Reynes dahil tumagal ng 14 years ang kanilang show.

“Naiyak kami kasi hindi po namin maisip na hanggang ngayon, sa tinagal-tagal ng Pepito Manaloto, 14 years na kami, talagang nandiyan sila simula’t simula. Nakakataba ng puso.”

***

SIMULA May 6, muli nang mapapanood ang groundbreaking Philippine adaptation ng iconic anime na Voltes V sa nangungunang GMA Afternoon Prime.

Excited na ang isa sa lead stars ng serye na si Raphael Landicho, ang child actor na gumanap bilang Little John, dahil sakto sa summer vacation ang muling pagpapalabas ng serye.

“Masaya po kasi volting in again with the Kapuso para ‘yung mga bata, mas makikita po nila kami sa TV and mas ma-e-enjoy nila ang mga robot,” sey ni Raphael.

Sang-ayon naman dito si Radson Flores na gumanap bilang Mark Gordon: “‘Yung date po na ipapalabas ‘yung Voltes V is nearing summer so mas may time po ‘yung mga tao na makapanood ‘yung mga hindi po nakasubaybay. Na-e-excite po kami, ”

Bibida rito sina Miguel Tanfelix, Ysabel Ortega, Radson Flores, Matt Lozano, at Raphael Landicho na gumanap bilang Voltes V team.

Mula ito sa produksyon ng GMA Entertainment Group sa pakikipagtulungan ng Telesuccess Productions at TOEI Company.

***

NAGKAROON ng reunion ang phenomenal ‘90s Girl Group na Spice Girls sa 50th birthday ni Victoria Beckham a.k.a. Posh Spice.

Sa star-studded party ni Posh, ni-recreate ng Spice Girls ang kanilang dance moves sa 1997 hit single nila na “Stop”.

Ang husband ni Posh na si David Beckham ang naging videographer at kinunan niya ang dance moves nila Victoria, Geri Halliwell (Ginger Spice), Mel B (Scary Spice), Emma Bunton (Baby Spice) and Melanie C (Sporty Spice).

Pinost ni Victoria ang clip via IG with the caption: “Best night ever! Happy Birthday to me! I love you all so much! #SpiceUpYourLife.”

Ang ibang A-list celebs na naki-party ay sina Tom Cruise, Eva Longoria, Marc Anthony, Jason Statham and Rosie Huntington-Whiteley.

Naging global sensation ang Spice Girls back in 1994 at nag-number agad ang first single nila na “Wannabe”. Ibang hits pa nila ay “2 Becomes 1”, “Who Do You Think You Are”, “Viva Forever”, “Say You’ll Be There” and “Spice Up Your Life”.

(RUEL J. MENDOZA)

13 bagong appointees, itinalaga ni PBBM

Posted on: April 24th, 2024 by @peoplesbalita No Comments

IPINALABAS ng Malakanyang ang mga pangalan ng 13 bagong appointees kabilang na si dating Foreign Affairs at Justice undersecretary Brigido Dulay.

Opisyal na itinalaga ni Pangulong Ferdinand R. Marcos Jr. si Dulay bilang Inspector General ng Internal Affairs Service ng Philippine National Police (PNP).

Kasama rin sa listahan ang bagong apat na miyembro ng Bases Conversion and Development Authority Board of Directors na sina Maricris Carlos, Paul Christian Cervantes, Pablo De Borja at Bryan Matthew Nepomuceno. Si Larry Lacson ay itinalaga naman bilang Acting Administrator at miyembro ng National Food Authority councils.

Si Eric Zerrudo naman ay bilang National Commission for Culture and the Arts Executive Director.

Ang Cultural Center of the Philippines (CCP) ay mayroong tatlong Board of Trustees members, at ito ay Sina Felix Duque, Gizela Gonzales at Kaye Tinga.

Samantala, ang iba pang appointees ay sina Luz Jordana Jose bilang Director IV ng Department of Health at sina Arthur Ledesma at Romeo Prestoza bilang mga acting members ng John Hay Management Corporation Board of Directors. (Daris Jose)

19 sasakyan natupok sa NAIA-3 parking area

Posted on: April 24th, 2024 by @peoplesbalita No Comments

NASA 19 sasakyan na nakahimpil sa parking lot extension ng Ninoy Aquino International Airport (NAIA) Terminal 3 ang nasunog bunsod sa hinihinalang nagliyab na talahiban dahil sa tindi ng init ng panahon, Lunes ng hapon.

Sa panayam kay Manila International Airport Authority (MIAA) General Manager Eric Jose Ines, umabot sa 19 ang inisyal na bilang ng mga sasakyang nasunog sa open parking area ng NAIA Terminal 3.

Ayon kay Ines, maaaring empleyado rin ng NAIA o MIAA ang mga nagmamay-ari ng ilang sasakyan, at iisa pa lamang kahapon ang lumapit at nagsabing pag-aari nito ang isa sa mga nasunog na sasakyan.

Ang MIAA, ang may-ari ng nasabing parking area pero naka-lease ito sa hindi pa binanggit na umupa.

Wala namang nasugatan at wala ring flights na naapektuhan sa sunog dahil malayo ang rampa sa open space parking extension.

Sa ulat ni Fire Inspector Jaime Cera, ng Bureau of Fire Protection (BFP)-Pasay, ala-1:35 ng hapon nang magsimula ang sunog at idineklarang fire-out alas- 2:03 ng hapon.

“Grassfire” ang nakitang sanhi ng sunog, dahil sa mga tuyong damo sa open parking na umapoy at nadamay ang mga nakahilerang sasakyan.

Ayon pa kay Insp. Cera, may iba pang fire trucks na tumulong sa pag-apula ng apoy. Malakas umano ang hangin kaya lumakas ang apoy na mabilis kumapit sa mga sasakyan na hindi na naisalba ng mga nagmamay-ari nito.

Makikita sa mga video na ipinoste sa social media ang malaking sunog habang isa-isang nagliyab ang mga sasakyan sa parking area ng paliparan. (Daris Jose)

AMBS at ABS-CBN, nagkapirmahan na: Tumatak na Kapamilya serye nasa ALLTV na bukod sa ‘TV Patrol’

Posted on: April 24th, 2024 by @peoplesbalita No Comments

INANUNSIYO na ng Advanced Media Broadcasting System (AMBS) at ABS-CBN Corporation ang kanilang partnership na maghahatid ng mga minahal na entertainment program at makabuluhang balita sa mga manonood sa pamamagitan ng free-to-air channel na ALLTV.

Ginanap ang contract signing ceremony sa Brittany Hotel Villar City para sa content agreements na magbibiday-daan sa ALLTV na ipalabas ang ilang nostalgic Kapamilya shows sa ilalim ng Jeepney TV brand at ang longest-running primetime newscast sa bansa na ‘TV Patrol.’

Simula sa ika-13 ng Mayo, mapapanood ng ALLTV viewers ang mga pinakatumatak at pinakapaboritong Kapamilya teleserye na handog ng Jeepney TV sa iba’t ibang oras pati na rin sa primetime pagkatapos ng ‘TV Patrol.’

Dumalo sa contract signing ang Chairman ng Villar Group na si Manny Villar, Sen. Mark Villar, Vista Land & Lifescapes Inc. president at CEO Paolo Villar, at All Value Holdings Corp. president at CEO Camille Villar. Kinatawan ang AMBS nina president Maribeth Tolentino at CFO Cecille Bernardo.

Sina ABS-CBN chairman Mark Lopez, president at CEO Carlo Katigbak, chief operating officer Cory Vidanes, Group CFO Rick Tan, at chief partnership officer Bobby Barreiro naman ang kumatawan sa ABS-CBN.

Layunin ng bagong partnership na maghatid ng saya at balita sa mga manonood ng ALLTV na available sa Channel 2 sa free TV, cable, at satellite TV nationwide.

(ROHN ROMULO)

NAVOTAS LUMAGDA SA MOU PARA SA MAKABATA HELPLINE

Posted on: April 24th, 2024 by @peoplesbalita No Comments

PUMASOK sa isang kasunduan ang Pamahalaang Lungsod ng Navotas, kasama ang Council for the Welfare of Children (CWC) para sa pagpapatupad ng Makabata Helpline 1383 sa lungsod.

Nilagdaan ni Mayor John Rey Tiangco ang memorandum of understanding kasama si CWC undersecretary Angelo M. Tapales.

Sa ilalim ng MOU, gagawin ng lungsod ang Makabata Helpline bilang karagdagang serbisyo sa hotline na naa-access ng publiko para sa child-related concerns.

“Our city treasures its young population. Through the Makabata 1383, we encourage people, especially the youth, to report instances of child abuse and violence, and help to immediately resolve these cases,” saad ni Mayor Tiangco.

Ang CWC, sa pakikipagtulungan sa Navotas, ay naglalayon na gawing popular ang child helpline service at i-maximize ang mga operasyon nito upang makinabang ang mas maraming mga bata at pamilyang Pilipino.

Ang Makabata Hotline, na inilunsad noong Nobyembre 2023, ay binuo ng CWC upang magbigay ng plataporma para sa mga bata na mag-ulat ng anumang uri ng karahasan, pang-aabuso, at pagsasamantala.

Nilalayon din nitong tugunan ang paglabag sa mga karapatan ng bata sa pamamagitan ng agarang koordinasyon at prevention measures.

Dumalo rin sa seremonya sina Atty. Karen Gina Dupra, CWC Project Management Office Head, at Ms. Jennifer Serrano, City Social Welfare and Development Officer. (Richard Mesa)

Walang kinalaman sa mandato ko bilang Vice President at DepEd Secretary ang sama ng loob ni FL Liza

Posted on: April 24th, 2024 by @peoplesbalita No Comments

WALA umanong kinalaman ang personal na damdamin ni First Lady Liza Araneta-Marcos sa mandato ni Vice President at Department of Education (DepEd) Secretary Sara Duterte bilang bise presidente ng Pilipinas.

Sa isang video message, sinabi ni Duterte na bilang tao, karapatan ng First Lady na makaramdam ng sama ng loob at galit sa kanya.

Gayunman, sinabi niya na ang personal nitong nararamdaman ay walang kinalaman sa kanyang sinumpaang tungkulin.

“Mga kababayan, bilang tao, karapatan ni Unang Ginang Liza Marcos na makaramdam ng sama ng loob at galit. Subalit ang kanyang personal na damdamin ay walang kinalaman sa aking mandato bilang isang opisyal ng pamahalaan,” ayon kay Sara.

Tiniyak rin naman ng bise presidente na makikipag-usap siya ng pribado kay Pang. Ferdinand Marcos Jr. hinggil sa naturang bagay.

“Upang makausad tayo, iiwan na natin sa isang pribadong pag-uusap sa pagitan lamang namin ni Pangulong ‘Bongbong’ Marcos Jr. ang mga susunod na hakbang,” aniya pa.

Ayon kay Sara, marami pang mas malaking problemang kinakaharap ang bansa na dapat tutukan ng pansin at resolbahin.

Partikular pang tinukoy ng Bise ang muling pagkalat ng ilegal na droga sa bansa, nagbabadyang kakulangan ng tubig at kuryente, kriminalidad, terorismo at insurgency.

“Patuloy ang pagtaas ng presyo ng pagkain at iba pang mga bilihin at ito ay mas nagpapahirap pa sa dinaranas na gutom o kawalan ng sapat na pagkain ng mahihirap nating kababayan,” aniya.

Dagdag pa niya, “Samantala, hindi pa rin natatapos ang banta ng kriminalidad, terorismo, at insurhensiya sa ating bansa.”

Nauna rito, ibinunyag ni FL Liza na ‘bad shot’ sa kanya si Sara matapos na matawa pa umano ito nang tawagin ng dating Pang. Rodrigo Duterte si Pang. Marcos na ‘bangag.’

“For me, nasaktan ako because my husband will do everything to protect you. You ran together ‘di ba? Sama sama tayong babangon muli,” ayon pa sa Unang Ginang, sa panayam sa radyo. “Pupunta ka sa rally, tatawagin ‘yung Presidente mong ‘bangag,’ ‘di ba, you’re going to laugh? Tama ba ‘yan? Even Leni [Robredo] never did that.”

Kapansin-pansin namang maganda pa rin ang pakikitungo nina Pang. Marcos at VP Sara sa isa’t isa, sa kabila ng pagpapahayag ng sama ng loob ng Unang Ginang laban sa bise presidente. (Daris Jose)

Ads April 24, 2024

Posted on: April 24th, 2024 by @peoplesbalita No Comments

Habang pursigido talaga si Alden… DONNY, balitang type ding ligawan si KATHRYN pero naudlot

Posted on: April 24th, 2024 by @peoplesbalita No Comments

HIWALAY na raw sina Kim Chiu at Paulo Avelino.

O di ba? Wala namang inamin ang mga bida ng ‘Linlang’ at ‘What’s Wrong with Secretary Kim’, ay naghiwalay na raw, huh!

Ito ang tsikang tinawag pa sa amin ng isang insider na taga-Dos na kapwa malapit kina Paulo ay Kim.

Ayon pa sa kausap namin ay nagkaroon daw ng kumprontasyon ang dalawa na humantong daw sa hiwalayan.

Hindi lang malinaw kung ano raw ang dahilan sa hiwalayan ng dalawa.

Wala namang binanggit ang source namin kung sino kina Kim at Paulo ang unang tumapos sa relasyong hindi naman nila inamin sa publiko.

Well, may kinalaman kaya dito ang napabalitang masugid na manliligaw daw ngayon ni Kim na si Atty. Oliver Moeller?

Well, your guess is as good as mine.

***

SPEAKING of manliligaw, isa sa napabalitang nanliligaw daw ngayon kay Katryn Bernardo ay si Alden Richards,

Kasabay daw ni Alden si Jericho Rosales at Donny Pangilinan na balitang naudlot.

Anong say mo ngayon Daniel Padilla, huh!

Hindi lang isa, hindi lang dalawa, kundi tatlong bigating aktor at pinagkakaguluhang heartthrobs ang nagkandarapa ngayon na magiging kapalit sa iniwan mo DJ. huh!

Kinumpirma pa sa amin ng isang Kapamilya insider na sobrang decided daw ang Kapuso aktor at gagawin ang lahat maging girlfriend lang daw niya si Kathryn, huh!

Hindi rin naman pinagkaila ng source namin matutuloy na ang sequel ng blockbuster movie nila noon na “Hello, Love, Goodbye”.

Pero pinagdiinan naman ng source namin na walang kinalaman ang follow up movie ang nakikitang sobrang closeness ngayon nina Alden at Kathryn, na kung saan lahat ng mga private parties ng Kapamilya aktres ay present din ant Kapuso prime star, huh!

Sa totoo lang din namin sobra ang closeness ngayon nina Alden at Kath na kapansın-pansin din na nag-e-enjoy ang dalawa sa company ng isa’t isa, di ba?

Well, kung hahantong sa pagiging mag-sweetheart sina Alden at Kathryn well walang masama di ba?

Pero ngayon pa lang ay kung anu-anong negatibong ibinato kay Alden na obviously mga fans ni Daniel, huh!

Isa na rito ang sinasabing hindi raw kasing yaman ni Daniel si Alden, huh!

Well, ayon pa sa isang nakausap namin ay tahimik lang si Alden at hindi niya ipinagmamalaki ang anumang naipundar niya sa pag aartista.

“Isa si Alden sa may ari ng isang private school sa Laguna. May mga scholars siyang tinutulungan at bukod pa riyan, yung mga inaalagaan niyang mga street children dati, na ngayon ay binigyan niya ng maayos na buhay”.

“Magtanung kayo sa malapit sa tinitirhan ngayon ni Alden, may mga ari-arian siya na ikakagulat nila,” sey pa ng kausap namin.

Sa totoo lang din naman, hindi maglalakas loob si Alden na alukin ang Star for All Seasons sa pagsasamahan nilang pelikula, if ever pumayag si Ate Vi at siya mismo ang magpo-produce.

(JIMI C. ESCALA)

34 heat-related illness, 6 patay naitala ng DOH

Posted on: April 24th, 2024 by @peoplesbalita No Comments

NAKAPAGTALA na ang Department of Health (DOH) ng 34 kaso ng heat-related illnesses sa bansa, kabilang ang anim na namatay, ngayong mataas ang heat index sa ilang lugar.

Base sa kanilang Event-Based Surveillance and Response System, ang naturang 34 heat-related illness cases ay naiulat mula Enero 1 hanggang Abril 18, 2024 lamang.

Ang mga pasyente ay mula sa Central Visayas, Ilocos Region, at Soccsksargen.

Sa naturang bilang, anim katao na umano ang iniulat na nasawi ngunit biniberipika pa ang dahilan ng kanilang kamatayan.

“The most number of heat related illnesses in recent years was recorded at 513 in the year 2023,” wika pa nito.

Nabatid na ang heat index ay ang sukatan ng temperatura na nararamdaman ng isang tao.

Ito ay iba umano sa aktwal na temperatura ng hangin. Nasusukat ito sa pamamagitan ng humidity at air temperature.

Drug suspect kalaboso sa P174K shabu sa Caloocan

Posted on: April 24th, 2024 by @peoplesbalita No Comments

KALABOSO ang isang hinihinalang drug personality matapos makuhanan ng mahigit P174K halaga ng droga sa Caloocan City, kamakalawa ng gabi.

Sa ulat ni Caloocan police chief P/Col. Ruben Lacuesta kay Northern Police District (NPD) Director P/BGen. Rizalito Gapas, habang nagpapatrulya ang mga tauhan ng Cadena De Amor Police Sub-Station sa kahabaan ng Carnation St., Brgy., 174, Camarin nang maispatan nila ang dalawang lalaki na nag-uusap dakong alas-11:55 ng gabi.

Kalaunan, nakita ng mga pulis ang isang lalaki na may iniabot na may iniabot na isang transparent plastic sachet ng hinihinalang shabu sa kanyang kausap kaya nilapitan nila ang mga ito.

Gayunman, nang mapansin ng mga suspek ang kanilang presensya ay tumakbo ang mga ito kaya hinabol sila ng mga pulis hanggang sa makorner at maaresto ang isa sa kanila.

Nang kapkapan, nakuha sa suspek na si alyas “Dogong” ang isang transparent plastic sachet na naglalaman ng nasa 25.7 grams ng hinihinalang shabu na nagkakahalaga ng P174,760 habang nakatakas naman ang nag-abot sa kanya ng droga.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)