BAGSAK sa selda ang apat na katao matapos mahuli sa akto ng mga pulis na sumisinghot ng shabu sa magkahiwalay na lugar sa Valenzuela City.

Sa ulat ni PMSg Ana Liza Antonio kay Valenzuela police chief P/Col. Salvador Destura Jr., nakatanggap ng tawag mula sa isang concerned citizen ang Station Drug Enforcement Unit (SDEU) sa ilalim ng pangangasiwa ni P/Lt Joselito Suniega at inireport sa kanila ang hinggil sa nagagnap na illegal drug activities sa S. Feliciano St., Brgy. Ugong.

Kaagad namang pinuntahan ng mga operatiba ng SDEU sa pangunguna ni PSSg Alvin Olpindo ang nasabing lugar kung saan naaktuhan nila sina alyas “Rommel”, 53, ng Brgy, Mapulang Lupa at alyas “Reymond”, 34, ng Caloocan City na sumisinghot ng shabu dakong alas-11:25 ng umaga.

Nakumpiska sa mga suspek ang isang plastic sachet na naglalaman ng hinihinalang shabu at ilang drug paraphernalias.

Nauna rito, alas-5:30 ng umaga nang maaktuhan naman ng mga tauhan ng Police Sub-Station 2 sa pangunguna ni P/Capt. Selwyn Villanueva na sumisinghot din ng shabu sa isang abandonadong bahay sa Santiago St., Santiago Kanan, Fortune 1, Brgy. Gen T De Leon sina alyas “Jun”, 41 at alyas “Arnel”, 37.

Ani PMSg Carlito Nerit Jr., nakuha sa mga suspek ang dalawang plastic sachets na naglalaman ng hinihinalang shabu at ilang drug paraphernalias habang ang isang improvised gun (pengun) na may isang bala ng cal. 38 ay nasamsam kay ‘Jun’.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002 habang karagdagan kasong paglabag sa RA 10591 o Comprehensive Firearms and Ammunition Regulation Act ang kakaharapin ni ‘Jun”. (Richard Mesa)

SINIMULAN na ng Pamahalaang Lungsod ng Navotas ang pamamahagi ng buwanang cash subsidy para sa mga kwalipikadong Navoteño solo parents sa ilalim ng Republic Act 11861 o ang Expanded Solo Parents Welfare Act.

Nasa 381 benepisyaryo ang nakatanggap ng kanilang cash aid mula Enero hanggang Marso na nagkakahalaga ng P3,000. Nag-iiba ang halaga depende sa buwan ng aplikasyon o pag-renew ng kanilang 2024 solo parent identification card.

Ipinatupad ng Navotas ang pamamahagi ng subsidy sa pamamagitan ng City Ordinance No. 2023-40, na tinustusan sa pamamagitan ng Gender and Development Fund.

Sa ilalim ng ordinansa, kwalipikadong tumanggap ng P1,000 buwanang cash subsidy mula sa pamahalaang lungsod ang mga rehistradong solo parents na kumikita ng minimum wages pababa.

“We encourage Navoteño solo parents to register with our city social welfare office to qualify for the program.  This year, we have allotted enough funds to provide monthly subsidy to 500 beneficiaries,” pahayag ni Mayor John Rey Tiangco.

“Raising children is never easy and doing it all by yourselves double the challenges and difficulties.  We hope this amount can help ease at least a little of your burdens and bring smiles to you and your kids,” dagdag niya.

Upang maging kuwalipikado para sa programa, ang mga Navoteño solo parent ay dapat magkaroon ng updated na solo parent ID na na-verify ng City Social Welfare and Development Office; dapat kumita ng hindi hihigit sa minimum na sahod; at hindi dapat nakalista bilang benepisyaryo ng anumang cash assistance program mula sa pambansang pamahalaan o non-government organizations, kabilang ang Pantawid Pamilyang Pilipino Program.

Ang pamahalaang lungsod, sa pamamagitan ng City Ordinance No. 2019-17, ay nagbibigay din sa mga indigent solo parents ng P1,000 educational assistance kada school year.

Ang Expanded Solo Parents Welfare Act ay nagbibigay ng karagdagang benepisyo sa mga rehistradong solo parents kabilang ang P1,000 buwanang subsidy, 10% discount at VAT exemption, 7-araw na parental leave na may bayad, priority sa mga scholarship program at grant, automatic Philhealth coverage, at iba pa. (Richard Mesa)