HINDI mamumunga ng bayabas ang santol, kaya hindi katakataka kung si Juliana Gomez ay mahusay sa sports na fencing dahil ang ama niyang aktor at Leyte 4th District Congressman na si Richard Gomez (na kilala rin sa bansag na Goma) ay gumawa ng sarili nitong pangalan sa kaparehong sports event noong kabataan niya.

Nauna na nitong nakaraang Nobyembre lamang ay nakasungkit si Juliana ng gold medal sa kanyang pinakaunang international competition sa Air Force Open Fencing Championship sa Bangkok, Thailand.

At nito lamang Disyembre 19, sa pamamagitan ng pagpo-post ng litrato niya sa kanyang Instagram account ay inanunsiyo ni Juliana na siya ay muling nagwagi sa isang international fencing competition, this time sa katatapos lamang na West Java Fencing Challenge 2022 sa Bogor, Indonesia.

Ang caption ni Juliana sa litrato sa kanyang IG Stories ay, “Last competition of the year! Now it’s time to head back home. Thank you Indonesia.”

Siyempre naman, pinaka-proud sa bagong achievement ni Juliana ay mismong si Goma na nag-post rin ng photo ni Juliana sa kanyang IG account na may caption naman na, “Congratulations @gomezjuliana for winning the Gold in the West Java Fencing Challenge 2022 in Bogot, Indonesia.

“You make our country proud! Congratulations to Coach Benny Garcia as well!”

***

PATULOY na umaariba ang mga Filipino artists abroad.

Pinansin at pinuri ang husay ni Dolly de Leon at naging unang artistang Pinoy na nominado sa Golden Globe Awards sa Amerika at nagwagi pang Best Supporting Actress sa Los Angeles Film Critics Award para sa pelikulang ‘Triangle of Sadness’.

Ngayon naman, for the very first time ay isang pelikulang gawang- Pinoy ang mapapanood sa Amazon Original Movie (Prime Video) at ito ay ang ‘Sampung Mga Kerida’ (Ten Little Mistresses).

Tampok sa pelikula ang ilan sa mga bigatin nating artista tulad nina Eugene Domingo, John Arcilla, Christian Bables, Arci Muñoz, Carmi Martin, Agot Isidro at Pokwang.

Mapapanood ang ‘Sampung Mga Kerida’ sa Pilipinas sa February 15, 2023. Bukod dito ay mapapanood rin ito sa halos 240 bansa sa buong mundo.

Sa direksyon ni Jun Lana, ang naturang pelikula ay isang murder-mystery comedy film sa ilalim ng The IdeaFirst Company.

(ROMMEL L. GONZALES)

HINDI talaga matatawaran ang pagiging isang ‘actor’ ng isang Jake Cuenca. 

Talagang siya ‘yung tipo ng artista na napaka-seryoso sa kanyang propesyon. Never na nagpa-petiks-petiks.

Bukod dito, siya rin ang actor sa mga kasabayan na lang niya na napakatapang. Kung tinatanggihan ng iba, si Jake, niyayakap niya ang mga roles na pwedeng “taboo” o hindi talaga kayang gawin ng iba.

Nakikita namin ang dahilan ni Jake kung bakit katulad na lang sa 2022 Metro Manila Film Festival entry niya under 3:16 Media Networks at Mentorque Productions, ang “My Father, Myself,” sobrang in-embrace ni Jake ang kanyang character bilang pamilyadong tao, pero closet gay pala. 

Ang mga intimate scenes nila ni Sean de Guzman, ang dahilan, “he is an actor.” Yun lang, period.

Palagi naming sinasabi na sana, si Jake ang mag-uwi ng Best Actor trophy for this year’s MMFF dahil deserve na deserve niya. 

Mas lalo pa namin itong nasabi nang mapanood na namin ang “My Father, Myself” na dinirek ni Direk Joel Lamangan sa premiere night.

Sa isang banda, overwhelmed si Jake na first time na napanood ang  ginawa at sa mga nakukuhang reaksiyon mula sa mga nanoood ng premiere night.

Sabi ni Jake, “Hindi ko alam kung magagalit. Hindi ko alam kung tatanggapin nila ‘to. Hindi ko alam kung magugustuhan nila. 

“Pero kita niyo naman no’ng matapos ang movie, nagpalakpakan ang mga tao, nagsisigawan ng Best Actor, so for me, sobrang nakaka-overwhelmed ng feeling.”

***

MARUNONG talagang sumagot at humarap ang Kapamilya actress na si Janine Gutierrez sa kahit sinong mga bashers o netizens na uma-attack sa kanya.

Pinagdaanan na rin yata ni Janine ang iba’t-ibang bashers. Merong tungkol sa mga political views niya, networks, lovelife at iba pa.

Pero this time, who would thought na bukod sa ganda ay ang kaseksihan naman ni Janine ang makukuwestiyon.

May gustong mag-body shaming sa actress. Sinabihan siya na malaki at tiyan at kinuwestiyon kung buntis daw ba siya.

Maganda ang sagot ni Janine na very matter-of-fact talaga. Sey niya sa netizen, “PMS bloat actually and I’ve been holiday eating since wala pang taping. It’s okay to enjoy the off season.  

“Diet na ulit after Christmas.  Sana masarap din kain mo this December.”

TUNAY ngang balik-saya ang matagumpay na ‘Parada ng mga Bituin, o ‘Parade of Stars’ na angkop sa tema ngayong taon, “Balik Saya ang MMFF 2022.”

Ang Parade of Stars ay naging hudyat ng opisyal na pagsisimula ng pagdiriwang, na kung saan ang host city ay ang lokal na pamahalaan ng Quezon City.

Ang ‘Parada ng mga Bituin’, ay nagtampok ng mga naglalakihang karosa na lulan ang mga maniningning na bituin na mula sa walong kalahok sa taunang film festival, na pinangunahan nina Vice Ganda, Coco Martin, Toni Gonzaga, Jake Cuenca, Ivana Alawi, Jodi Sta. Maria, Nadine Lustre at Ian Veneracion na isa talaga sa pinaka-tilian ng mga girls dahil sa taglay pa rin nitong kaguwapuhan.

Nagsimula ito mula sa Welcome Rotonda-Quezon Avenue hanggang Quezon Memorial Circle na naganap kahapon, Disyembre 21.

Ang parada ay tumahak ng pitong kilometro, na tinatayang tumagal ng nang higit sa dalawang oras at salamat sa Diyos dahil pinagpala naman ng magandang panahon.

Ang staging area para sa mga float ng walong opisyal na entries at Metropolitan Manila Development Authority (MMDA) ay nasa kahabaan ng E. Rodriguez hanggang D. Tuazon. Ang mga traffic enforcer ng ahensya ay tumulong sa gilid ng ruta ng parada para sa crowd control.

Samantala, inanunsyo ng Film Development Council of the Philippines (FDCP) na magbibigay ito ng pondong nagkakahalaga ng P500,000 para makatulong sa marketing ng mga pelikula sa pamamagitan ng CreatePHFilms, para sa bawat film producer na nakapasok sa MMFF 2022.

Ang CreatePHFilms Funding Program ng FDCP ay idinisenyo upang magbigay ng suporta sa mga filmmaker, producer, at distributor sa lahat ng yugto ng paggawa ng pelikula upang umakma sa kanilang mga pagsisikap na makagawa ng mga de-kalidad na pelikulang Pilipino.

Lumagda rin ang MMFF ng Memorandum of Agreement sa BingoPlus, isang online bingo game platform, para maging film festival presenter.

“This year’s festival promises an exciting selection of films for all moviegoers. It offers a wide variety of genres that will complete the tradition of Filipinos going to the cinemas during the holiday season (Ang pagdiriwang ng taong ito ay nangangako ng isang kapana-panabik na seleksyon ng mga pelikula para sa lahat ng manonood ng sine. Nag-aalok ito ng malawak na sari-saring genre na kukumpleto sa tradisyon ng pagpunta ng mga Pilipino sa mga sinehan sa panahon ng Kapaskuhan),” ayon sa naging ni Atty. Romando Artes, MMDA at MMFF Over-all Chairman.

Sa walong opisyal entries sa MMFF 2022 nanguna sa parada ang “Family Matters” ng Cineko Productions, na sinundan ng “My Father, Myself” Inc. ng 3:16 Media Network at Mentorque Productions; ” “Partners in Crime” ng ABS-CBN Film Productions; at “My Teacher” ng TEN17P.

May special float din ang BingoPlus na major sponsor ng MMFF 2022, kasunod ang huling apat na kalahok, “Labyu with an Accent” ng ABS-CBN Film Productions “Deleter” ng Viva Communications, Inc.; “Nanahimik ang Gabi” ng Rein Entertainment Productions”; at “Mamasapano: Now It Can Be Told” ng Borracho Film Production.

Ang ika-48 na MMFF ay mapapanood sa mga sinehan sa buong bansa mula Disyembre 25, 2022 hanggang Enero 7, 2023.

Ang Gabi ng Parangal ay nakatakda sa Disyembre 27 sa New Frontier Theater sa Cubao, Quezon City, na kung saan i-announce ang mga mananalo sa Best Float.

Suportahan natin ang Pelikulang Pilipino.

(ROHN ROMULO)