SINIMULAN na ng National Privacy Commission (NPC) ang imbestigasyon sa lumalalang  text scams na naglalaman na ngayon ng  pangalan ng subscriber.

Sa isang kalatas, sinabi ni  NPC Commissioner John Henry Naga na mahigpit na minomonitor ng kanilang ahensiya ang  “the proliferation of unsolicited text messages,”  tiniyak sa publiko na nakikipag-ugnayan na ang NPC sa mga  key stakeholders para labanan ang  nasabing  fraudulent activity.

Bukod pa rito, nakipagpulong na aniya sila sa telco players kung saan nangako aniya ang mga ito na paiigtingin ang kakayahan kabilang na ang technological at security safeguards,  kontra scammers.

“We are also in coordination with the National Telecommunications Commission (NTC) to share information and conduct concerted actions to the full extent of our respective mandates,” ani Naga.

Bilang bahagi pa rin aniya ng ‘awareness initiatives’ ng ahensiya, magkakaroon aniya ng  public webinar sa susunod na linggo, Setyembre 7 kung saan tatalakayin ang  panganib  at pinsala kapag natanggap ang text messages, at maging ang “best practices” para protektahan ang users.

Nauna rito,  dahil sa mas nagiging creative ang mga text scammer ngayon ay kaagad na  inatasan ng NTC ang mga telecommunications company sa bansa na magsagawa ng text blast para balaan ang publiko.

Ilan sa mga ito ay mga text message patungkol sa pekeng trabaho, lucky winner, at iba pang money scams.

At ang pinakabago ay ang personalized na mga text scam kung saan nakalagay mismo ang pangalan ng recipient.

Kaya naman si NTC  Commissioner Gamaliel Cordoba, inatasan ang telcos kabilang ang DITO Telecom, Globe at Smart na simula August 31 hanggang September 6 dapat magpadala ng text blast ang mga ito sa kanilang subscribers.

Partikular na nakalagay rito ang mensahe na “Huwag pong maniwala sa text na naglalaman ng inyong pangalan at nang-aalok ng trabaho, pabuya o pera, ito po ay scam”.

Nakasaad pa sa kautusan ni Cordoba ang pag-block sa SIM cards na ginagamit sa mga scam.

Inatasan din ang lahat ng regional directors at mga officer-in-charge ng NTC na palawakin ang information campaign laban sa mga bagong variant ng scam gaya ng pekeng trabaho at iba pa.

ISINUSULONG  ni Senate Majority Leader Joel ­Villanueva ang pag-obliga sa mga may-ari ng sasakyan na magpakita ng pruweba na mayroon silang garahe bago sila makapagparehistro ng sasakyan sa Land Transportation Office (LTO).

Ayon kay Villanueva, ito ay para matigil ang pag-park ng mga sasakyan sa gilid ng kalsada na nagdudulot ng matinding pagsisikip ng daloy ng trapiko sa mga pangunahing lansangan.

Sa Senate Bill 925 o “No garage, no car” bill, paiiralin ito sa Metro Manila at mga siyudad na Angeles, Baguio, Bacolod, Batangas, Cagayan de Oro, Cebu, Davao, Iloilo at Olongapo.

Sa mga nasabing lugar, pagbabawalan ng LTO na irehistro ang sasakyan na walang pruweba na may garahe o parking.

Kapag inirehistro ang sasakyan ng walang parking ay papatawan ng tatlong buwan na suspension at walang suweldo ang sinumang kawani o opisyal ng LTO.

Habang ang motorista na magsisinungaling sa LTO na may parking space ay pagmumultahin ng P50,000 sa bawat paglabag at sususpindihin ang lisensya ng tatlong taon gayundin ang rehistrasyon ng bawat sasakyan.

Paliwanag ng majority leader, sinabi ng Japan International Coordination Agency (JICA) na nasa P3.5 milyon ang nawawalang oportunidad kada araw sa Metro Manila noong 2017 dahil sa traffic at aabot ito sa P5.4 bilyon kapag hindi inaksyunan. (BISHOP JESUS “JEMBA” M. BASCO)