Naipamahagi na ng Land Transportation Franchising and Regulatory Board (LTFRB) at Department of Transportation (DOTr) ang mahigit PHP724 million na cash subsidy sa mga operator ng pampublikong bus at jeepneys o public utility vehicles (PUVs) na apektado ang kabuhayan dahil sa coronavirus disease 2019 (COVID-19) pandemic.

Ayon kay LTFRB Chairman Martin Delgra III, ang nasabing ayuda ay napapaloob sa PHP1.158 billion budget para sa Direct Cash Subsidy Program sa ilalim ng “Bayanihan To Recover As One Act” o Bayanihan 2.

Sinabi ni Delgra na magpapatuloy ang pamimigay ng subsidies sa mga naapektuhang mga operators ng pampublikong bus at mga jeepney. Ito ay patunay na determinado ang pamahalaan na sila ay tulungang makabangon, at ‘di sila pababayaan habang dumaranas tayong lahat ng hagupit ng pandemya.

Una nang sinabi ng LTFRB na lampas 110,000 PUV operators na ang nakatanggap ng direct cash subsidy mula sa gobyerno simula nang ilunsad ang programa noong Lunes, ika-16 ng Nobyembre 2020.

Ayon sa LTFRB, ang bawat operator ay nabigyan ng PHP6,500 kada PUV unit na nasa ilalim ng kanilang prangkisa.

Sinabi rin ni Chairman Delgra na sa kabuuang PHP1.158 Billion na inilaan ng pamahalaan para sa subsidy ng mga PUV operator sa ilalim ng Bayanihan 2, 62.53% na ang naipamahagi sa pagtaya noong ika-27 ng Nobyembre 2020 o aabot sa PHP724,516.00

Ayon pa kay Chairman Delgra, ang butal na 37.47% o PHP434,060.000 ay ipapamahagi sa mga PUV operators sa loob ng linggong ito.

Saad ng LTFRB Chairman, naipadala na ngayong noong Martes, ika-1 ng Disyembre 2020, sa mga operator na may “non-LBP accounts” ang PHP48,106,500 na subsidya.

Ang Direct Cash Subsidy Program ay layong magbigay-tulong sa mga operator na hirap makabawi sa kanilang kita dahil sa mga ipinatutupad na safety protocols upang maiwasan ang pagkalat ng COVID-19 sa mga pampublikong sasakyan.

Ang mga benepisyaryo ng direct cash subsidy ay mga operators ng mga sumusunod na PUV na may nakatakdang ruta:

– Public Utility Bus (PUB);

– Point-to-Point Bus (P2P);

– Public Utility Jeepney (PUJ);

– Mini-Bus;

– UV Express; at

– FilCab

Ang cash subsidy ay maaaring gamitin bilang pambayad sa utang; sa fuel at iba pang operational at maintenance expenses; pambili ng equipment, supplies o facilities na mahalaga upang maiwasan ang health risks na dulot ng COVID-19 (i.e. face mask, face shield, alcohol, etc.); at iba pang pangangailangan upang maipagpatuloy ang kanilang araw-araw na operasyon.

Ipinamamahagi naman ang direct cash subsidy sa pamamagitan ng Landbank of the Philippines (LBP) Pantawid Pasada Program (PPP) Cash Cards. Kung  walang PPP cash cards, ilalagay ito sa existing LBP account ng benepisyaryo o kaya sa existing bank account ng operators sa pamamagitan ng PESONet o INSTAPay. (LASACMAR)

Dahil sa inaasahang pagdagsa ng mga mananampa­lataya sa mga simbahan sa tradisyunal na Simbang Gabi, nagtakda ng mga pagbabago ang Catholic Bishops Conference of the Philippines (CBCP) kabilang ang pagsasagawa ng naturang misa sa mas malala­king mga venues tulad ng mga gymnasiums.

“Sa Simbahan 30 percent lang ang ina-accommodate na mass goers kaya pwede sa gymnasium ‘yan,” ayon kay Fr. Jerome Secillano, Executive Secretary ng Committee on Public Affairs ng CBCP.

Sinabi ni Secillano na kailangang magkipag-ugnayan ng Obispo o ang kura paroko ng isang lugar sa kanilang lokal na pamahalaan para makahanap ng mas malaking venue kumpara sa simbahan para pagdausan ng Simbang Gabi at upang mas marami ang makadalo. Isa lamang ito sa pagbabago na gagawin ng mga simbahan. Sinabi ni CBCP president at Davao Archbishop Romulo Valles na epektibo lamang ito habang mayroon pang pandemya. Kasama sa mga pagbabago ang pagsasagawa ng novena Masses o Simbang Gabi ng alas-6 ng gabi habang ang huling Misa de Gallo ay maaaring isagawa ng alas-6 ng umaga at maaaring dagdagan depende sa rami ng mga dadalong Katoliko.

“Meron po tayong December 25 na misa. Pwede naman po ‘yang madagdagan dahil ‘yan po naman talaga ‘yung Pasko ng Kapanganakan. ‘Yun pong mga tao usually duma­dagsa naman po ‘yan kaya si­gurado po ‘yung mga Simbahan mas magdadagdag pa parang Sunday schedule po tawag namin diyan,” ayon kay Valles.

Hinihikayat pa rin naman ng simbahan ang mga Katoliko na hindi makadadalo sa Simbang Gabi na magmisa sa loob ng kanilang bahay sa pamamagitan ng ‘online mass streaming.’

LUNGSOD NG MALOLOS – Kinilala ang Pamahalaang Panlalawigan ng Bulacan sa pamumuno ni Gobernador Daniel R. Fernando bilang isa sa ‘Top Government Employer’ sa buong Hilagang Luzon sa ginanap na 1st Virtual Stakeholders Accomplishment Report (StAR) Awards sa pamamagitan ng isang online convention noong Biyernes, Nobyembre 27, 2020.

Itinampok sa online event ang kontribusyon ng kanilang mga stakeholder sa taong 2019 at ipinakita ang mga ulat ng matatag na estado ng Pag-IBIG Fund nitong taon sa iba’t ibang lugar sa bansa sa kabila ng mga pagsubok na dulot ng pandemya.

Ayon kay Provincial Administrator Eugenio Payongayong, kinilala ang Pamahalaang Panlalawigan ng Bulacan sa mahalaga nitong kontribusyon sa patuloy na tagumpay ng Fund na naging dahilan upang makamit nila ang pinaka mataas na rekord sa taong 2019, na sa ngayon ay nagsilbing pinakamahusay na taon para sa kanila; at para sa pagiging isa sa pinakamahusay na employer sa sektor ng gobyerno kasama ang Pamahalaang Panlungsod ng Mabalacat at Pamahalaang Panlalawigan ng Pampanga.

Sinabi ni Fernando na nagsusumikap ang Pamahalaang Panlalawigan upang makasunod at makabayad ng kontribusyon sa tamang oras at sinigurado na ang pamahalaan ay magpapatuloy sa pagsasagawa ng mga programa na makatutulong sa pagpapabuti ng mga pagganap nito.

“Nagsusumikap ang Pamahalaang Panlalawigan ng Bulacan upang maka-comply sa pagbibigay ng ating mga kontribusyon nang naaayon. Atin pong ipagpapatuloy ang mga magagandang hakbangin nang sa gayon ay maging maayos ang ating pagganap sa Pag-IBIG Fund,” anang gobernador.

Bukod sa top employers, kinilala din ng Pag-IBIG Fund ang mga stakeholder sa mga kategoryang collection agencies, developers at mga stakeholder na may espesyal na parangal sa Hilagang Luzon, Timog Luzon, Visayas, Mindanao at NCR.

Kinilala rin ang Pamahalaang Panlalawigan ng Bulacan bilang top employer sa sektor ng gobyerno noong nakaraang taon kasama ang Pamahalaang Panlalawigan ng Pangasinan at Pampanga. (Bishop Jesus “Jemba” M. Basco)