Trending topics sa social media platforms… CAPRICE at HEATH, nagpakilig agad sa pilot episode ng ‘You’re My Favorite Song’ (ni: ROMMEL GONZALES) 

SA pilot episode pa lang ng “You’re My Favorite Song” ay kinilig na nang husto ang fans nina Caprice Cayetano at Heath Jornales sa kanilang first-ever TV team-up kasama sina Marco Masa at Clifford.

Hindi pa man umeere sa telebisyon ang nasabing GMA Afternoon Prime romance-drama series ng CapEath ay maingay na ito sa social media. 

Marami na ang nakaabang sa magiging takbo ng kuwento nina Angel (Caprice), Miguel (Heath), Calix (Clifford), at Zion (Marco).

Naging trending topics nga rin sa social media platform na X ang official hashtag ng You’re My Favorite Song pilot episode na #YMFSPilotWeek at ‘ANGELs STORY BEGINS.’

Sa unang episode nitong Lunes (June 22), nakilala ng viewers si Angel Dimaculangan. Matalino at confident, matindi ang pagmamahal ni Angel sa kaniyang pamilya na kinabibilangan nina Mama Bebe (Katya Santos) at si Lolo Xavi (Boboy Garrovillo). 

Ipinakilala rin sa episode ang mga karakter nina Heath, Marco, at Clifford. Lead vocalist ng bandang Siklab si Miguel (Heath). Nag-krus ang landas nila ni Angel habang abala ito sa pagba-busking na suot ang isang mascot costume na teddy bear.

Samantala, pinakamatalinong estudyante ng buong Brighton Bay Academy si Calix (Clifford), na nakilala ni Angel dahil sa pagtatanggol ng huli kay Zion (Marco Masa).

Nagsisimula pa lang ang kuwento ng apat pero marami ng #feels ang viewers!

Mapapanood ang You’re My Favorite Song weekdays sa oras na 4:00 p.m. pagkatapos ng Kamao sa GMA Afternoon Prime. 

Available rin ang episodes, highlights, at iba pang exclusive content nito sa GMANetwork.com at sa GMA Play, ang official video streaming app ng GMA Network.