Social media platforms, dapat may pananagutan sa kaligtasan ng mga bata

SA GITNA ng mga insidente ng karahasan na kinasasangkutan ng mga kabataan at patuloy na banta ng exploitation at trafficking online, isinusulong ni Nueva Vizcaya Lone District Representative Atty. Timothy Joseph “Tim” Cayton ang mas matibay na proteksyon para sa mga menor de edad sa social media.

Inihain ni Cayton ang House Bill No. 10760 o “Social Media Safety for Children Act,” na naglalayong obligahin ang social media platforms na gawing prayoridad ang kaligtasan, privacy at kapakanan ng mga batang gumagamit ng kanilang serbisyo.

Naging mas matindi ang usapin sa child safety kasunod ng mga trahedyang kinasasangkutan ng mga estudyante. Noong Hunyo, tatlong estudyante ang nasawi sa pamamaril sa San Jose National High School sa Tacloban City. Nitong Agosto naman, isang estudyante ang napatay ng kapwa mag-aaral sa Ateneo de Zamboanga University Junior High School, bago nasawi rin ang huli. Naiulat ding ini-livestream sa social media ang insidente.

Kasabay nito, nananatiling banta ang online sexual abuse and exploitation of children (OSAEC), trafficking at iba pang uri ng exploitation, kung saan maaaring magamit ang digital platforms upang makontak at mapagsamantalahan ang mga menor de edad.

Sa ilalim ng HB 10760, kailangang gamitin ang pinakamataas na available privacy at safety settings bilang default para sa minors, higpitan ang unsolicited contact mula sa mga adult account, at limitahan ang exposure sa content tungkol sa sexual exploitation, suicide, self-harm at matinding karahasan.

Itinatakda rin ng panukala ang 16 taong gulang bilang minimum age para magkaroon ng sariling social media account nang walang parental consent, habang ang edad 13 hanggang 15 ay mangangailangan ng verifiable consent ng magulang o guardian.

Kasama rin sa panukala ang paghihigpit sa targeted advertising sa mga bata at pag-disable bilang default ng mga feature tulad ng autoplay, infinite scroll at streak mechanisms.

Sa pamamagitan ng Social Media Safety for Children Act, isinusulong ng mambabatas ang mas ligtas at responsableng digital environment para sa bawat batang Pilipino. (VINA de GUZMAN)