PBBM, PINAPABILIS ANG PAGTATAYO NG MGA SILID-ARALAN SA BUONG BANSA SA PAMAMAGITAN NG DEPED–LGU PARTNERSHIP

UPANG pabilisin ang pagtatayo, rehabilitasyon, at pagkukumpuni ng mga silid-aralan sa buong bansa, pormal na pinagtibay ni Pangulong Ferdinand R. Marcos Jr., araw ng Lunes ang isang makasaysayang pakikipagtulungan sa pagitan ng Department of Education (DepEd) at ng mga City Local Government Units (LGUs)
“Ang bawat silid-aralan na ating itinatayo ay nagbibigay ng mas magandang kinabukasan para sa ating mga kabataan,” ayon kay Pangulong Marcos.

Ang paglagda sa Memorandum of Agreement (MOA) ay nagmamarka ng ikalawang batch ng mga partnership sa ilalim ng Nationwide Classroom Building Program ng administrasyon, na layong agarang tugunan ang kakulangan sa silid-aralan sa bansa, na tinatayang umaabot sa 144,758 yunit noong Enero 2026.

Hindi natin puwedeng hintayin pa ng mga dekada, o kahit mga taon, para mabigyan ang bawat estudyante ng ligtas at angkop na silid-aralan para sa epektibong pagkatuto,” sabi ni Pangulong Marcos.

“Kapag kulang ang classroom, masikip ang klase. Nahahati sa ilang shift ang pasok ng mga estudyante. Mas nahihirapang matuto ang mga mag-aaral, mas nabibigatang magturo ang mga guro, at mas nangangamba ang mga magulang,” aniya pa rin.

Sa ilalim ng kasunduan, ang mga pamahalaang lungsod ang mangangasiwa sa procurement, konstruksyon, at pamamahala ng proyekto upang masiguro ang mas mabilis at epektibong implementasyon sa ground level, habang ang DepEd ang magtatakda ng pamantayan at magpapatunay ng pagsunod bago ang pinal na turnover at pagbabayad.

“Sa pamamagitan ng Memorandum of Agreement na nilagdaan ninyo ngayon, binibigyan natin ng mas malaking papel ang mga lungsod sa bansa,” sabi ng Pangulo.
“Tiyakin natin hindi maaantala ang mga proyekto. Tiyakin natin de-kalidad ang ating maitatayo na silid-aralan. Tiyakin din natin na ang bawat sentimo na pinaghirapan ng ating mga kababayan ay gagamitin sa tama,” aniya pa rin.

Sinusuportahan ang inisyatibang ito ng malaking pondo mula sa 2026 General Appropriations Act, na naglaan ng mahigit PhP85 bilyon para sa Basic Education Facilities.

Mula sa halagang ito, P9.6 bilyon ang nakalaan para sa pagtatayo ng humigit-kumulang 4,000 silid-aralan sa unang tranche, habang karagdagang P5.96 bilyon ang gagamitin para sa humigit-kumulang 1,700 pang silid-aralan sa pamamagitan ng bagong nilagdaang mga kasunduan. (DARIS JOSE)