PBBM, inatasan ang DPWH na bilisan ang pagkumpleto sa lahat ng nakabinbing Infra projects sa buong bansa- Malakanyang

INATASAN ni Pangulong Ferdinand R. Marcos Jr. ang Department of Public Works and Highways (DPWH) na bilisan ang pagkumpleto sa lahat ng nakabinbing infrastructure projects sa buong bansa upang matiyak ang napapanahong paghahatid sa publiko.
“Bilang pagsunod sa direktiba ni Pangulong Ferdinand R. Marcos Jr. na agapan ang pagtatayo at pagsasaayos ng mga nakabinbin na infrastructure projects, double time ang trabaho ng DPWH sa pamumuno ni Secretary Vince Dizon sa iba’t ibang lugar sa bansa,” ang sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
“Malapit nang matapos ang temporary passageway o bridge connector na pansamantalang papalit sa nasirang Cabagan – Santa Maria Bridge sa Isabela. Ayon sa ahensiya, 89% complete na ang konstruksyon ng proyekto at target itong buksan sa Marso para sa light vehicles,” ang tinuran ni Castro.
“Sa Oriental Mindoro naman, personal na binisita ng kalihim ang makeshift bridge sa Sitio Bongabong upang planuhin ang pagpapagawa ng mas matibay na tulay para sa mas ligtas at maayos na pagtawid ng mga residente,” ang sinabi pa rin ni Castro.
Sa kabilang dako, nagbigay naman aniya ng ulat ang DPWH kay Pangulong Marcos tungkol sa sitwasyon ng mga major infrastructure projects sa bansa.
Kabilang aniya sa ulat ang mga proyektong gaya ng “Bukidnon-Davao Road na kumpleto na ang repair works noong Enero matapos itong masira noong Oktubre ng nakaraang taon; nariyan din ang sinkhole sa Kennon Road na natapos ang pagkukumpuni nitong Pebrero; Apalit section ng MacArthur Highway-Buhang Flyover sa Jaro, Iloilo; Maharlika Highway sections sa Gumaca, Quezon, Samar, at Guinobatan, Albay na patuloy na inaayos; at, ang EDSA Rehabilitation Phase I na nasa 49.4% completed na at inaasahang matatapos sa Hunyo ngayong taon.
“Puspusan ang trabaho ng pamahalaan upang tapusin sa lalong madaling panahon ang mga infrastructure projects ng bansa dahil para sa Pangulo, kung mabilis at maayos ang trabaho, mas mabilis din mararamdaman ng tao ang ginhawa ng mga pampublikong proyekto,” ang sinabi ni Castro. (Daris Jose)