P250 million confidential funds, agad hiningi ng OVP matapos maluklok si VP Sara Duterte

KAAGAD humingi si Vice President Sara Duterte ng confidential funds matapos siyang maluklok, ayon sa House prosecution panel nitong Martes.

Sinabi ni Lanao del Sur Rep. Zia Alonto Adiong, tagapagsalita ng House prosecution, kagya’t humiling si Duterte ng confidential funds kahit na alam niya na wala ang nasabing pondo sa panunungkulan ni dating bise presidente Leni Robredo at walang kaukulang supporting plan kung saan at papaano gagamitin ang pondo.

Ani Adiong, naipakita ng prosecution ang “timeline” ng request sa P250 million confidential funds at paano ginamit ang naunang P125 million ng nasabing pondo. 

Nailarawan ito ni Lemuel Ortonio, Office of the Vice President (OVP) Assistant Secretary and Assistant Chief of Staff na tumestigo sa impeachment trial hearing sa Senado.

Sa direct examination ni prosecution counsel Atty. Mae Divinagracia, kinumpirma ni Ortonio na ang OVP ay walang confidential funds nung naluklok si Duterte noong July 2022. Ani Ordonio, wala silang record na may confidential funds si Robredo bago maupo si Duterte sa OVP. 

Matapos ang dalawang buwan sa panunungkulan, pinirmahan ni Duterte noong Aug. 22, 2022 ang isang sulat na humihingi ng P250 million confidential funds sa Department of Budget and Management (DBM). 

Sa nasabing pagdinig sa Senado, kinumpirma ni Ortonio ang pirma ni Duterte sa request at sinabi na ang halaga ng hiniling na pondo ay nasa diskresyon ng pangalawang pangulo.

Kinumpirma din ni Ordonio na ang mga funding request ay walang computation, projection at Physical and Financial Plan (PFP). 

Hinanap ng DBM ang supporting plan noong Sept. 15, ani Ortonio, at naisumite ito sa DBM matapos ang apat na araw. 

“Mas nauna po ‘yung request ng P250 million for the confidential funds prior to the plan requested by DBM to be submitted,” sinabi ni Adiong. 

“So baliktad po ang nangyari. Nauna muna ‘yung request ng pera, tsaka po pinagplanuhan paano gamitin ang pera,” dagdag ng kongresista.

Ayon naman kay prosecution legal spokesperson at counsel Atty. Benjamin “Jay” Tolosa Jr., dapat mauna ang plano kung papaano gagamitin ang pondo saka hihilingin kung magkano ang gagastusin.

“Hindi dapat mauna ‘yung numero na hihingin mo, tapos saka ka lang gagawa ng plano kung paano ubusin yung P125 million,” sinabi ni Tolosa. 

Nakakuha ang OVP ng P125 million, kalahati sa naunang hinihiling nito na P250 million noong December 2022. Ang nasabing pondo ay naubos mula Dec. 21 hanggang 31, o 11 araw lamang.

“Ano ba ang basehan ng P250 million para sa confidential funds?” tanong ni Adiong. “Was there already an operational plan on August 22? Was there a contemporaneous document identifying the confidential operations and calculating their requirements? O hinugot lang ba sa hangin ang P250 million?” (VINA de GUZMAN)