NBI INARESTO ANG ISANG INA DAHIL SA ONLINE SEXUAL EXPLOITATION SA 2 MENOR DE EDAD NA ANAK

INARESTO ng National Bureau of Investigation–Violence Against Women and Children Division (NBI-VAWCD) ang isang babae sa Tarlac dahil sa diumano’y pag-exploit sa kanyang dalawang menor de edad na anak na babae sa pamamagitan ng pag-aalok sa kanila para sa mga online sexual activity kasama ang mga dayuhang kliyente.

Binigyang-diin ni NBI Director Atty. Melvin Matibag na nananatiling matatag ang ahensya sa komitment nitong protektahan ang mga bata laban sa exploitation, partikular na sa digital na kapaligiran.

 “Patuloy na lulubusin ng NBI ang pagtugis sa mga indibidwal na nag-eexploit sa mga bata at gumagamit ng teknolohiya upang mapadali ang mga krimeng ito. Sa pamamagitan ng intelligence-driven na imbestigasyon, kakayahang digital forensic, at malapit na kooperasyon sa ating mga kasosyong dayuhan sa pagpapatupad ng batas, patuloy nating tutukuyin ang mga salarin, sasagipin ang mga biktima, at pananagutin ang mga nagkasala sa ilalim ng batas,” dagdag pa niya.

Nagsimula ang kaso sa isang referral na natanggap mula sa U.S. Department of Homeland Security Homeland Security Investigations (HSI) Manila noong Disyembre 1, 2025. Sa malawak na imbestigasyong isinagawa ng NBI—kabilang ang pagpapatunay ng identidad, pagsusuri sa digital na ebidensya, paghiling ng impormasyon mula sa GCash, PayPal, at Philippine Statistics Authority, open-source intelligence, pagmamatyag (surveillance), at pakikipagtulungan sa HSI—napatunayan na ginamit diumano ng Subject ang WhatsApp upang makipag-ugnayan sa mga dayuhang kliyente, mag-ayos ng mga mapang-abusong aktibidad gamit ang kanyang mga anak, at tumanggap ng mga bayad. Noong Marso 5, 2026, isang ahente ng NBI-VAWCD, sa pamamagitan ng isang live Zoom session na pinangasiwaan ng HSI, ang mismong nakasaksi sa pagtawag ng respondent sa isang WhatsApp video call kasama ang isang undercover agent ng HSI. Sa tawag na ito, inialok diumano niya ang mapang-abusong online activities gamit ang kanyang mga anak kapalit ng bayad. Batay sa mga nakalap na ebidensya, nag-apply at kumuha ang NBI ng Warrant to Search, Seize, and Examine Computer Data (WSSECD) mula sa Regional Trial Court, Branch 113, Concepcion, Tarlac.

Noong Hulyo 14, 2026, isinagawa ng NBI-VAWCD, sa tulong ng NBI-Digital Forensic and Laboratory Division (DFLD) at sa pakikipagtulungan sa HSI, ang isang entrapment at rescue operation kasabay ng pagpapatupad ng WSSECD.  nakumpiskang aparato ay naglalaman ng WhatsApp account na ginamit diumano ng Subject upang makipag-ugnayan sa mga dayuhang kliyente. 

Ang mga kasong paglabag sa RA No. 11930 (Anti-Online Sexual Abuse or Exploitation of Children and Anti-Child Sexual Abuse or Exploitation Materials Act) at RA No. 9208, na inamyendahan ng Republic Acts Nos. 10364 at 11862 (Expanded Anti-Trafficking in Persons Act), ay isinampa laban sa Subject sa Provincial Prosecutor para sa inquest proceedings. (PAUL JOHN REYES)