LTFRB nagbabala sa PUV operators na tumatanggi sa fare discount

NAGBABALA ang Land Transportation Franchising and Regulatory Board (LTFRB) sa mga operator at driver ng public utility vehicles (PUV) laban sa pagtanggi sa 20% fare discount para sa persons with disabilities (PWDs), senior citizens at estudyante.

Kasunod ito ng rek­lamo ng isang PWD na umano’y hindi tinanggap ng konduktor ng isang bus ang kanyang PWD ID habang bumibiyahe mula Pampanga patu­ngong Maynila. Ayon sa complainant, ipinakita niya ang valid na ID na inisyu ng lokal na pamahalaan ngunit hindi ito kinilala ng konduktor.

Sinabi ni LTFRB ­Acting Chairman Greg G. Pua Jr. na kung mapatutunayang totoo ang reklamo, maaaring nilabag ng konduktor ang kondisyon ng operasyon ng bus at ang batas na nagbibigay ng fare discount sa mga PWD. Inendorso na ng LTFRB Legal Division ang rek­lamo para sa imbestigasyon at kaukulang aksyon.

Binigyang-diin ni Pua na mahigpit na ipatutupad ng LTFRB ang polisiya sa fare discounts at maa­aring managot ang mga PUV operator at driver na mapatutunayang lumabag sa mga itinakdang alituntunin.