LTFRB, ISINUSULONG ANG MAAGANG PAGHAHANDA PARA SA UNDAS

MAGSISIMULA sa Setyembre 21 ang pagtanggap ng Land Transportation Franchising and Regulatory Board (LTFRB) ng aplikasyon para sa Special Permit para sa Undas, bilang paghahanda sa inaasahang pag-uwi ng milyun-milyong Pilipino sa kanilang mga probinsya.

Alinsunod ito sa direktiba ni DOTr Secretary Giovanni “Banoy” Z. Lopez na tiyaking sapat, ligtas at komportable ang pampublikong transportasyon para sa mga biyaherong uuwi upang gunitain ang kanilang mga yumaong mahal sa buhay.

Ayon kay Acting LTFRB Chairman Atty. Greg G. Pua, Jr., tatanggap ng aplikasyon mula Setyembre 21 hanggang Oktubre 2 upang magkaroon ng sapat na panahon ang LTFRB na suriin ang mga dokumento at roadworthiness ng mga unit.

“Taun-taon, malaking bilang ng ating mga kababayan ang bumibiyahe pauwi sa kanilang mga probinsya. Kaya naman, maaga tayong naghahanda upang matiyak ang ligtas at komportableng biyahe nila,” ani Acting Chairman Pua.

“Layunin nating walang pasaherong mai-stranded sa pamamagitan ng sapat na pampasaherong bus at iba pang angkop na pampublikong transportasyon,” dagdag niya.

Ayon kay Acting Chairman Pua, ang bisa ng Special Permit mula Oktubre 28 hanggang Nobyembre 6.

Noong nakaraang taon, mahigit 800 pampasaherong bus ang nabigyan ng Special Permit para sa Undas.

Kabilang sa mga pangunahing requirement ang Official Receipt/Certificate of Registration (OR/CR) ng unit, Valid Personal Accident Insurance, at Personal Passenger Accident Insurance (PPAI). Para sa mga juridical entity, kinakailangan din ang Board Resolution at/o Secretary’s Certificate na nagbibigay-awtorisasyon sa aplikasyon at nagtatalaga ng authorized representative.

Itinakda rin ng LTFRB ang mga sumusunod na kondisyon:

1. 50% lamang ng kabuuang authorized units ng bawat operator sa bawat awtorisadong ruta ang maaaring mag-aplay;

2. Ang unit ay hindi dapat higit 14 na taong gulang mula sa petsa ng pagkakagawa; at

3. Dapat ilahad ang tiyak na address ng mga terminal sa magkabilang dulo ng rutang inaaplayan.

Tiniyak ni Acting Chairman Pua ang patas na pagproseso ng mga aplikasyon, alinsunod sa direktiba ni Secretary Banoy na walang palakasan sa proseso.

Hinimok naman niya ang mga aplikante na i-report sa LTFRB Hotline 1342 at official social media accounts ng ahensya ang sinumang indibidwal o grupong maaaring magsamantala sa proseso ng aplikasyon. (PAUL JOHN REYES)