GM TAI, NAKIPAGPULONG SA TOWN HALL ‘TUNNEL COMMUNITY’ NG MAYNILA; RELOKASYON SA BULACAN, TARGET NGAYONG SETYEMBRE

NAKIISA si National Housing Authority (NHA) General Manager Joeben A. Tai sa idinaos na town hall meeting sa pangunguna ng Department of Social Welfare and Development (DSWD) noong Setyembre 15, 2026. Ito ay upang tugunan ang usaping pabahay ng mga pamilyang kabilang sa “Tunnel Community” sa mga barangay ng 738 at 79 sa Manila.

Pinangunahan ni DSWD Secretary Rexlon T. Gatchalian ang meeting, kasama sina Manila Department of Social Welfare (MDSW) Director at Officer-in-Charge Jay R. Dela Fuente bilang kinatawan ni Manila City Mayor Francisco “Isko Moreno” Domagoso, at Undersecretary for Innovations and Program Development Edu M. Punay, at iba pang mga lokal na opisyal. 

Nagsilbing pagkakataon ang town hall meeting upang maiparating ng “Tunnel Community” ang kanilang mga hinaing at alalahanin, lalo na sa usapin ng pabahay at iba pang tulong mula sa pamahalaan.

Bilang kinatawan ng sektor ng pabahay, iniulat ni NHA GM Tai na handa na ang NHA na ilipat ang 49 na pamilya sa St. Ildephonsus Village, na matatagpuan sa Brgy. Anyatam, San Ildefonso, Bulacan, ngayong buwan. Ang mga pamilyang ito ay dumaan na sa proseso ng pagkumpleto ng mga kinakailangang dokumento, na nagbibigay-daan upang sila ay mailipat sa loob ng itinakdang panahon ng NHA.

Magpapatupad ang NHA ng moratorium para sa mga benepisyaryo sa kanilang unang taon pagkatapos ng relokasyon.

Samantala, sa isang panayam, tiniyak ni GM Tai na maililipat din ang mga natitirang pamilya bago matapos ang taon.

Bukod dito, ang DSWD, sa pamamagitan ng kanilang Pag-abot Program, ay magbibigay ng subsidiya sa upa para sa natitirang 36 na pamilya habang hinihintay nila ang petsa ng kanilang relokasyon. 

Matatagpuan sa Tripa de Gallina, ang “Tunnel Community” — na itinatag noong dekada ’90 — ay kasalukuyang tirahan ng 94 pamilyang may mababang kita na hindi kayang tustusan ang pabahay sa Maynila.

Ang NHA, na isang attached agency ng Department of Human Settlements and Urban Development (DHSUD), ay nananatiling nakatuon sa pagsuporta sa bisyon ng administrasyong Marcos Jr. na bumuo ng matatatag na komunidad para sa isang Bagong Pilipinas, kung saan ang bawat pamilyang Pilipino ay abot-kaya ang disente, ligtas, at sustenableng pabahay.

 (PAUL JOHN REYES)