DOJ: Estrada, Bonoan kasuhan ng plunder, graft

INIREKOMENDA ng Department of Justice (DOJ) na kasuhan sina Sen. Jinggoy Estrada, dating Public Works Secretary Manuel Bonoan at ilang personalidad na sangkot sa umano’y maanomalyang flood control projects. 

Kabilang sa mga kasong inirekomenda ng DOJ ang plunder, paglabag sa Anti-Graft and Corrupt Practices Act, direct bribery, receiving gifts by public officers, at corruption of public officials.

Kabilang din sa mga respondents sina dating DPWH officials Bong Dinglasan, Engr. Denryl Caesar Cortuna, Asst. Engr Manny Bulosan, at Engr. Arturo Gonzales Jr. 

Ibinasura naman ang reklamo laban sa yumao nang si dating DPWH undersecretary Catalina Cabral.

Hindi rin isinama sina dating DPWH officials Roberto Bernardo, Henry Alcantara, at Gerard Opulencia sa isinapinal na criminal information na ihahain sa korte, kapalit ng pagtestigo.

Ayon kay Assistant Ombudsman Mico Clavano, nag-ugat ang resolusyon kaugnay ng reklamong inihain ng National Bureau of Investigation-Department of Justice (NBI-DOJ) Public Works and Bid-Rigging Task Force.

Saklaw umano ng imbestigasyon ang iba’t ibang ebidensya kabilang ang legislative records, Position Description Forms, at sworn transcripts mula sa pagdinig ng Senate Blue Ribbon Committee noong ­Nobyembre 14, 2025, na nagdetalye ng umano’y ilegal na pagmamaniobra at sinasabing 30% cuts kaugnay ng regional flood control projects.

( Daris Jose)