Kinilala ni PBBM…Mga guro, kabilang sa ‘most important’ partners sa nation-building

KINILALA ni Pangulong Ferdinand Marcos Jr. ang mga guro bilang “most important partners” ng bansa sa nation-building.

Partikular na kinilala ng Pangulo ang pagsisikap ng mga guro mula sa paghahanda ng mga aralin sa mas maaga o late hour para gabayan ang kanilang mga estudyante.

“You become the second parents to your students. You believe in them. You remind them of what they are capable of, especially when they need it the most,” ang sinabi ng Pangulo sa kanyang naging talumpati.

“And that is why we recognize our teachers as among the most important partners in nation-building,” aniya pa rin.

Sa kabilang dako, may kabuuang 5,211 personnel sa ilalim ng Expanded Career Progression (ECP) System ang nanumpa sa kanilang mga bagong tungkulin, kabilang na ang 4,972 mga guro at 239 school heads.

Ang ECP System ay nagbibigay ng tinatawag na expanded career pathways para sa mga public school teachers at school leaders, mula Teacher I hanggang Teacher VII, Master Teacher I hanggang V, at School Principal I hanggang IV.

Tinuran naman ni Education Secretary Sonny Angara na mahigit sa 80,000 school personnel ang na-promote ngayong taon habang 132,000 ang maaaring ma-promote sa susunod na taon.

Samantala, may 234 na itinalagang School Counselor Associates (SCAs) ang nagpartisipa rin sa oathtaking ceremony.

Sinabi ni Pangulong Marcos na mahigit sa 82,100 mga guro at school heads ang ni-reclassify sa buong bansa sa pamamagitan ng ECP System ‘as of November.’ Sa Pangasinan lamang, mahigit sa 10,200 personnel ang nakinabang mula sa inisyatiba.

Hindi rin lingid sa kaalaman ng Pangulo ang kakapusan ng school counselors at nagwika na ginagawa na ng gobyerno ang makakaya nito para itaas ang bilang.

“As we pay greater attention to the mental health of our youth, their role has become more crucial, more important than ever,” ang sinabi ni Pangulong Marcos.

“These concerns require concrete measures, and that is precisely what this administration is working to deliver,” aniya pa rin.

Nauna rito, sinabi ng Department of Education (DepEd) na kailangan nitong mag-hire ng 48,000 school counselor associates sa buong bansa para palakasin ang mental health at psychosocial support para sa mga mag-aaral.

Plano naman ng departamento na mag-deploy ng 10,000 counselor associates sa pagtatapos ng taon laban sa pinakabagong pigura ng DepEd. 

(Daris Jose)