1st BATCH NG BUWANANG FINANCIAL ASSISTANCE PARA SA MGA OPERATOR NG MODERN PUV, INILABAS NA NG LTFRB

INILABAS na ng Land Transportation Franchising and Regulatory Board (LTFRB), sa ilalim ng patnubay ni DOTr Secretary Giovanni “Banoy” Z. Lopez, ang unang batch ng buwanang financial assistance para sa mga operator ng modern public utility vehicles (PUVs).

Ayon kay Acting LTFRB Chairman Atty. Greg G. Pua, Jr., 16 tseke na nagkakahalaga ng P9.08 milyon ang inihanda at ipinamahagi sa 16 Transport Service Entities (TSEs) sa iba’t ibang bahagi ng bansa.

“Ito pa lamang ang unang batch ng financial assistance mula sa national government. May mga susunod pang ilalabas sa mga darating na araw para sa mga operator ng modern PUV na nahihirapang magbayad ng loan o makasabay sa tumataas na operational costs,” ani Acting Chairman Pua.

Bukod sa mga tseke, idedeposito rin ang ayuda sa mga account na isinumite ng mga TSE.

Ang assistance package ay inaprubahan ni Pangulong Marcos matapos ang kanyang pakikipagpulong kay Secretary Banoy, kasunod ng mga pangamba ng sektor ng modern PUV sa patuloy na pagtaas ng operational costs na nakaaapekto sa kanilang kakayahang bayaran ang loans para sa kanilang mga unit.

Batay sa guidelines ng LTFRB, ang mga rehistrado at accredited na TSE ay makatatanggap ng P20,000 buwan-buwan para sa amortization ng bawat modern PUV unit na nakuha mula nang magsimula ang programa hanggang sa maging epektibo ang kautusan.

Saklaw nito ang mga operator na tumalima sa Public Transportation Modernization Program (PTMP). Maaari ring gamitin ng mga operator na fully paid na ang kanilang units ang P20,000 ayuda para sa operational expenses.

Ang LTFRB ang nangangasiwa sa pagproseso ng mga aplikasyon. Ayon kay Acting Chairman Pua, may umiiral nang kautusan upang mapadali at mapabilis ang proseso at agad na maipagkaloob ang ayuda sa mga kwalipikadong benepisyaryo.

Magsisimula ngayong Setyembre ang buwanang assistance at ipagkakaloob sa loob ng tatlong buwan, o hanggang sa maubos ang pondong inilaan para rito.

Layunin ng programa na maiwasan ang foreclosure ng mga asset at credit default sa pamamagitan ng direktang cash flow support para sa buwanang loan obligations, habang natitiyak ang pagpapatuloy ng operasyon para sa mga commuter.

Saklaw ng ayuda ang modern jeepneys at UV Express sa buong bansa, gayundin ang modern buses na bumibiyahe sa Metro Manila.

Samantala, umiiral din ang P12 kada litro na fuel discount para sa passenger jeepney at UV Express operators sa buong bansa. Noong unang bahagi ng taon, inaprubahan din ni Pangulong Marcos ang P5,000 cash subsidy para sa mga PUV operator. 

(PAUL JOHN REYES)