CIDG’s OPLAN PAGTUGIS, NAKALAMBAT NG 77 WANTED PERSONS

MATAGUMPAY na naaresto ng Criminal Investigation and Detection Group (CIDG) ang 77 wanted persons at mga pugante sa loob ng tatlong araw na isinagawa mula Setyembre 7 hanggang 9, 2026.

Ang estratehikong sabay-sabay na pagsisikap sa pagpapatupad ng batas ay humantong sa pagkakaaresto ng mga pugante sa Luzon, 34 na indibidwal ang naaresto, 29 sa Mindanao, at 14 sa Visayas.

Ang tatlong araw na operasyon ay matagumpay na nakakuha ng labindalawang (12) Regional Level Most Wanted Persons mula sa Rehiyon 1, 4B, 7, 11, 12, 14, at Negros Island Region (NIR). Labing-anim (16) Provincial Level MWPs ang natunton sa Zamboanga del Norte, Benguet, Samar, Maguindanao del Norte, Leyte, Rizal, Manila, Negros Occidental, Nueva Ecija, Cebu, at Pampanga.

Sa 77 akusado, 19 sa mga naaresto ang nahaharap sa mabibigat na kasong isinampa kung saan tahasang hindi inirekomenda ang piyansa.

Ang mga pugante ay nahuli sa bisa ng Warrants of Arrest para sa mga mabibigat na kaso kabilang ang Murder, Frustrated Murder, Attempted Murder, Rape, Statutory Rape, Qualified Theft, Theft, Syndicated Estafa, Estafa, Plunder, Robbery, at Carnapping.

May mga pag-aresto rin dahil sa mga critical statutory violations, partikular na ang Republic Act No. 9165 (Comprehensive Dangerous Drugs Act of 2002) at Republic Act No. 9262 (Anti-Violence Against Women and Their Children Act of 2004).

Lubos na pinuri ng Direktor ng pamunuan ng CIDG ang sabay-sabay na pagganap ng lahat ng mga operating field unit na kasangkot sa mabilis na pag-aresto. Binigyang-diin niya na ang mga operasyong ito ay direktang nakakatulong sa mga biktima at mga nagdadalamhating pamilya sa pagkamit ng hustisyang nararapat sa kanila.

Tinitiyak ng CIDG sa publiko na ang unit ay nananatiling matatag sa pagtataguyod ng batas; at walang humpay sa pagtutuos, pagtugis, at pagsubaybay sa mga kriminal, mga taong hinahanap, at mga pugante – sa buong Pilipinas. (PAUL JOHN REYES)

News 1

21-anyos na tambay, laglag sa sugal, droga sa Valenzuela 

TIMBOG ang 21-anyos na binata na hinihinalang sangkot sa ilegal na droga nang mahuli sa akto na naglalaro umano ng ilegal na sugal kasama ng isa pang lalaki sa Valenzuela City, kamakalawa ng gabi.

Nahaharap sa kasong paglabag sa PD 1602 (Anti-illegal Gambling Law) at R.A 9165 o ang Comprehensive Dangerous Drug Act of 2002 ang suspek na si alyas “Toper”, ng Brgy., Lingunan.

Sa ulat ni Police Investigator PSSg Christopher Quiao kay Valenzuela Police Chief P/Col. Joseph Talento, nagsasagawa ng Anti-Criminality Operation ‘Oplan Galugad’ ang mga tauhan ng Police Sub-Station 1 nang maaktuhan nila ang dalawang kelot na nagsusugal umano ng ‘lucky 9’ sa M. Gregorio St., Brgy., Canumay West dakong alas-9:20 ng gabi.

Kaagad silang nilapitan nina PCpl John Ray Laredo at Pat Juluis Carlos Valencia saka ipinaalam sa kanila ang nilabag nilang pagkakasala sa batas bago inaresto.

Nasamsam sa dalawa ang perang taya, gamit na baraha at isang plastic sachet na naglalaman ng hinihinalang shabu na nakuha umano kay ‘Toper’. (Richard Mesa)