No. 1 most wanted sa NCRPO sa murder, nalambat sa Navotas

NAGWAKAS na ang mahigit isang taon na pagtatago ng isang lalaki na wanted sa kasong Murder nang makorner ng pulisya sa ikinasang sa manhunt operation sa Navotas City, kahapon ng umaga.

Sa ulat ng tanggapan ni Northern Police District (NPD) Director P/BGen. Benliner Capili, ang 34-anyos na akusado na si alyas “Popoy” ay nakatala din bilang No. 1 sa Top Ten Most Wanted Person sa NPD at No. 2 sa Navotas City Police Station.

Ikinasa ng mga tauhan ni Navotas Police Chief P/Col. Renante Pinuela ang manhunt operation laban sa akusado kasunod ng natanggap na impormasyon na muling naispatan ang presensya nito sa lungsod.

Dakong alas-10:40 ng umaga nang tuluyang masukol ng pinagsamang mga operatiba ng Warrant and Subpoena Section at Intelligence Section ng Navotas Police ang akusado sa Bangus St., Brgy., NBBS Kaunlaran.

Hindi naman umano pumalag ang akusado nang isilbi sa kanya ang warrant of arrest na inisyu ng Regional Trial Court (RTC), Branch 287, Navotas City, noong January 30, 2024 para sa kasong Murder na walang inirekomendang piyansa. 

Pansamantalang nakapiit ang akusado sa Custodial Facility Unit ng Navotas Police habang hinihintay ang utos ng hukuman para sa paglilipat sa kanya sa Navotas City Jail. (Richard Mesa)