Maayos na nagpaalam sa manager na si Ogie…AIKO, gusto nang ibuhos ang kanyang atensyon sa pulitika (ni: REY PINEDA) 

WALA na pala sa poder ni Ogie Diaz ang batikang aktres na si Aiko Melendez.

Ayon mismo ito sa “Showbiz Update” vlog ng talent manager at content creator.     Maayos naman daw na nagpaalam itong si Aiko sa pamamagitan ng viber. Katuwiran daw ni Aiko gusto raw nitong ibuhos ang kanyang atensyon sa pulitika.

Magkaiba man ang paniniwala nila sa pulitika, nananatili pa rin daw ang respeto nila sa isa’t isa maging ang kanilang pagiging matalik na magkaibigan.     

Ayon pa kay Ogie 80% daw ng buhay ni Aiko ay nakalaan sa pulitika, 20% lang daw ang natitira dito para sa kanyang showbiz career.     

Aminado rin si Ogie na hindi siya ang manager ni Aiko pagdating sa pulitika, kung kaya’t anuman ang maging desisyon nito ay kanyang inirerespeto. 

Samantala, nagsisilbi pa rin si Aiko bilang konseyal ng 5th District ng Quezon City, matapos siyang ma-reelect para sa second consecutive term noong May 2025. 

*** 

INAMIN ni Ruru Madrid na malaking epekto sa kanyang career ang pagiging aktibong miyembro ng kanyang relihiyong Iglesia Ni Cristo.

Marami raw kasi ito tinanggihang endorsements, tulad na lamang ng pag-eendorso ng alak at sugal.

Salungat daw kasi ito sa mga ititnuturo ng kanilang relihiyon.     

Maging sa mga roles nito sa TV man o pelikula, minsan kinakailangan pa nitong magpadala ng written explanation sa mga church leaders kung medyo maselan ang papel na kanyang ginagampanan.      

Kaya kung mapapansin ninyo, talagang namimili ng mga roles at projects itong si Ruru.     At malaking epekto sa kanyang personal na buhay ang pag-convert ng kanyang partner na si Bianca Umali sa INC.

Dahil hindi na raw salungat ang kanilang mga paniniwala, mas naging malalim at puno ng pagmamahal.     

Bagay daw na lalung nagbigkis sa kanilang halos walong taon ng pagsasama.