“Pantay na hustisya lamang ang hinihingi ko,” – Leyte Rep. Romualdez

ITO ang naging pahayag ni Leyte Rep. Ferdinand Martin G. Romualdez sa gitna ng mga ulat na sasampahan na siya ng kasong plunder ng Office of the Ombudsman.

Aniya, pinipilit ng Ombudsman ang kaso sa kanya at gagamitin ang mga testigo na nauna na nilang na- discredit at sinampahan pa ng kasong cyberlibel at perjury.

“Ito ba ang patas na imbestigasyon? Mga testigong ibinasura na, kinasuhan pa ng cyberlibel at perjury — gagamitin pa rin para lang ituro ako at ako lamang. Hindi ako uurong sa laban na ito. Hindi ako matitinag. Gawin natin ang tama,” giit ng dating Speaker.

Naunang nagpahayag ng katiyakan ang Ombudsman na sasampahan nila ng kasong plunder si Romualdez kaugnay ng umano’y iregularidad sa pambansang budget.

Ayon kay Ombudsman Jesus Crispin Remulla, ang kaso laban sa dating Speaker ay “ready for preliminary investigation.” (Vina de Guzman)