P85 umento sa sahod sa NCR, epektibo na

EPEKTIBO na nitong Sabado, Hulyo 25, ang unang tranche ng P85 arawang umento sa sahod sa National Capital Region (NCR), ayon sa Department of Labor and Employment (DOLE).

Sa ilalim ng Wage Order No. NCR-27, ipinatupad ang inisyal na P60 dagdag-sahod para sa non-agriculture sector, na magtataas sa daily minimum wage mula P695 tungo sa P755. Para naman sa agriculture sector, service at retail shops na may 15 o mas mababang bilang ng empleyado, gayundin sa manufacturing firms na may mas mababa sa 10 regular workers, tataas ang minimum wage mula P695 tungo sa P718.

Ang ikalawang yugto ng umento na P25 ay ipatutupad sa Enero 20, 2027. Sa panahong iyon, aabot sa P780 ang minimum wage para sa non-agriculture sector at P743 para sa iba pang sektor.

Ayon kay DOLE Secretary Francis Tolentino, layunin ng pagtaas ng sahod na palakasin ang kakayahang bumili ng mga Pilipino at tulungan silang makasabay sa mga kondisyon ng ekonomiya, kabilang ang inflation at pagtaas ng bayarin sa kuryente. Ito ay alinsunod sa direktiba ni Pangulong Ferdinand R. Marcos Jr. upang mapabuti ang kalidad ng buhay ng mga manggagawa.

Ito na ang pinakamalaking pagtaas ng sahod sa Metro Manila hanggang sa kasalukuyan, na makikinabang ang mahigit 1.1 milyong manggagawang tumatanggap ng minimum wage sa rehiyon.

Pinaalalahanan ni Tolentino ang mga employer na sundin ang bagong wage order, dahil ang hindi pagsunod ay may kaakibat na parusang itinakda ng batas.

 (DARIS JOSE)