Dahil sa rally sa EDSA: Pagdalo ni PBBM sa FOCAP Presidential Luncheon, kinansela

NAKANSELA ang pagdalo ni Pangulong Ferdinand Marcos Jr., sa Foreign Correspondents Association of the Philippines (FOCAP) Presidential Luncheon sa Makati City araw ng Martes, Hunyo 30 dahil mas pinili ng Pangulo na i-monitor ang sitwasyon sa Edsa kung saan nag-rally ang Iglesia ni Cristo sa EDSA White Plains.

“Nagmo-monitor po ang Pangulo sa ngayon sa kasalukuyang sitwasyon. Patuloy na inaalam ang nangyayari sa mga kababayan natin na naantala sa paglalakbay at pagtatrabaho dahil sa nangyayari sa Edsa,” ayon kay Presidential Communications Office (PCO) Undersecretary at Palace Press Officer Claire Castro.

“Minomonitor din niya ang kapakanan ng ibang kababayan na naiipit sa gitna ng Edsa pati na rin ang pagsasagawa ng mga kapulisan ng kanilang mandato na magbigay proteksyon at seguridad sa mga inosente nating kababayan,” aniya pa rin.

Sa kabilang dako, nag-lockdown na sa 2 gates ng Malakanyang, ang Arlegui at Solano gates. Ang JP Laurel gate lang ang nakabukas. Sinasabing alas-6:00 ng umaga ni-lockdown ang dalawang nasabing gates. (DARIS JOSE)