Malakanyang, walang nakikitang banta mula sa emergency EDSA rally ng INC

HINDI nakikita ng Malakanyang na banta sa administrasyong Marcos ang ’emergency rally’ ng Iglesia ni Cristo (INC) sa EDSA People Power Monument.

Sinabi ni Presidential Communications Office (PCO) Undersecretary at Palace Press Officer Claire Castro na iginagalang ni Pangulong Ferdinand Marcos Jr. ang karapatan ng publiko sa freedom of expression at peaceful assembly subalit hindi nito kinukunsinti ang pang-aabuso.

“Wala pong nakikitang threat dahil alam naman po ng Pangulo na ang kanyang ginagawa ay para sa taumbayan. Kung meron lang pong ibang interes o interes ng ibang grupo, interes ng iilang tao, hindi po siya dapat maging hadlang sa pagpapatupad ng Pangulo at ng administrasyong ito ng batas,” ang sinabi ni Castro.

Idinagdag pa ni Castro na nananatiling nakapokus ang Pangulo sa pagpapatupad ng batas at pagsusulong ng mga programa para sa kapakanan ng mamamayang Filipino sa kabila ng nagpapatuloy na pagtitipon.

Tinatayang may 15,500 protesters ang nagtipon-tipon sa People Power Monument sa Quezon City, araw ng Martes at nagdulot ito ng sobrang pagbagal ng trapiko sa buong Edsa . Nananawagan ang mga ito ng ‘accountability at transparency.’  

(Daris Jose)