Juvenile law, edad ng criminal liability sisilipin ng Senado

SUSURIIN ng Senate Committee on Social Justice, Welfare, and Rural Development, sa pamumuno ni Sen. Erwin Tulfo ang pagpapatupad ng Juvenile law.

Ayon kay Tulfo, panahon na para silipin ang implementasyon ng Republic Act 9344, o ang “Juvenile Justice and Welfare Act of 2006” kasunod ng mga sunud-sunod na high-profile cases na kinasangkutan ng mga menor-de-edad, kabilang ang insidente ng pamamaril sa Tacloban at mga kaso ng pananaksak sa Negros Occidental at lalawigan ng Cavite.

“Paulit-ulit ko nang binibigyang-babala ang publiko rito dahil sa totoong buhay, napakalaki at napakalinaw ng mga kakulangan sa pagpapatupad ng batas na ito,” ani Tulfo.

Sinabi ni Tulfo na matagal na niyang isinusulong ang naturang pagsusuri bago pa man siya pumasok sa gobyerno.

“Bago pa man ako maging senador, nasaksihan ko na ang mabigat na reyalidad ng batas na ito. Sa loob ng maraming taon, dinadagsa ang prog­rama ko ng mga pamil­yang nawalan ng pag-asa matapos mabiktima ng mga menor-de-edad, dahil na rin sa kawalan ng pangil ng pagpapatupad ng Juvenile Law,” ani Tulfo.

Noong 2019, hayagang pinuna ni Tulfo ang pagpapatupad ng natu­rang batas, partikular ang kakulangan sa pondo para sa pagpapatayo ng mga Bahay Pag-asa centers.

Kinuwestiyon din ni Tulfo ang pagiging epektibo ng kasaluku­yang edad ng criminal liability.

Muli ring titingnan ng komite ang mga kontrobersyal na probisyon ng batas, partikular ang itinakdang edad para sa criminal liability.