PNP sa mga iskul:Ipaalam mga off-campus activities 

PINAYUHAN ng Philippine National Police (PNP) ang mga paaralan sa bansa na makipag-ugnayan muna sa pulisya bago magsagawa ng mga off-campus activity upang matiyak ang kaligtasan ng mga mag-aaral.

Ito ayon kay PNP chief PGen. Jose Melencio Nartatez, Jr. ay upang maiwasan ang mga insidente tulad ng pagkalunod ng dalawang student-athlete ng Ateneo de Manila University na sina Rene Baterbonia at Divine Adili sa isang team-building activity sa Aurora noong Hunyo 8.

Sinabi ni Nartatez na mahalaga ang koordinasyon upang maisagawa ang tamang security assessment, emergency response planning, traffic management, at pakikipag-ugnayan sa mga rescue at medical service.

Inatasan na rin ni Nartatez ang lahat ng regional offices at mga lokal na himpilan ng pulisya na magkaroon ng regular na koordinasyon sa Department of Education (DepEd) at Commission on Higher Education (CHED) kaugnay ng mga aktibidad ng mga paaralan.

Samantala, hinikayat ng PNP ang mga school authorities na paigtingin ang mental health at psychosocial support para sa mga mag-aaral matapos ang mga madugong insidente tulad nang nangyaring pananaksak sa Cavite at pamamaril sa Tacloban.

 ( Daris Jose)