2 timbog sa sugal, baril sa Caloocan

BAGSAK sa kulungan ang dalawang indibidwal kabilang ang isang bebot nang maaktuhan naglalaro ng illegal na sugal at makuhanan pa ng baril ang isa sa kanila sa Caloocan City.

Ayon kay Caloocan Police Chief P/Col. Joey Goforth, ang mga suspek ay 26-anyos na lalaking construction worker ng Barangay 185, at 26-anyos na babaeng vendor ng Barangay Bagong Silang.

Sa kanyang ulat kay Northern Police District (NPD) Acting Director P/BGen. Benliner Capili, sinabi ni Col. Goforth na nagsasagawa ng Anti-Criminality Operation ang mga tauhan ng Police Sub-Station 14, na may kaugnayan sa Simultaneous Anti-Criminality Law Enforcement Operation (SACLEO) sa Brgy., 185 ng lungsod.

Dito naaktuhan ng mga pulis ang mga suspek na nagsusugal umano ng ‘cara y cruz’ na nagresulta sa pagkakaaresto sa kanila.

Nakumpiska sa kanila ang bet money at gambling paraphernalia habang nang kapkapan, nakuha sa lalaking suspek ang ang isang kalibre .38 revolver na kargado ng bala at walang kaukulang mga dokumento.

Nahaharap ang mga suspek sa kasong paglabag sa PD 1602 (Illegal Gambling), habang karagdagan pa na kasong paglabag sa RA 10591 (Comprehensive Firearms and Ammunition Regulation Act) ang kakaharapin ng lalaking suspek. (Richard Mesa)