ILLEGAL FUEL SCHEME SA NAVOTAS CITY NASUGPO NG PNP, ₱12-M HALAGA NG PETROLEUM PRODUCTS NAKUMPISKA, 10 ARESTADO

MATAGUMPAY na nasugpo ng Philippine National Police (PNP), sa pamamagitan ng Criminal Investigation and Detection Group (CIDG), ang umano’y ilegal na aktibidad ng kalakalan ng petrolyo sa Lungsod ng Navotas noong gabi ng Hunyo 22, 2026, na nagresulta sa pag-aresto sa 10 indibidwal at pagkumpiska ng humigit-kumulang ₱12-M halaga ng mga produktong petrolyo, kagamitan, at mga transport assets.

Ang operasyon ay isinagawa ng mga tauhan ng CIDG National Capital Region Field Unit sa pakikipagtulungan ng mga maritime police unit. Naharang ng mga awtoridad ang isang oil tanker at mga kaugnay na kagamitan na umano’y ginagamit sa isang unauthorized fuel transfer scheme na karaniwang tinutukoy bilang “paihi,” na nakakaapekto sa mga lehitimong operasyon ng kalakalan at nagdudulot ng mga panganib sa kaligtasan ng publiko at sa kapaligiran.

Nakumpiska sa operasyon ang malaking bulto ng pinaghihinalaang diesel fuel, transport vehicles, motorized boats, siphoning equipment, at operational buy-bust money.

Ang mga naarestong indibidwal na pawang mga nasa hustong gulang na may edad 20 hanggang 58, kasalukuyan silang nasa ilalim ng kustodiya ng CIDG para sa dokumentasyon at pagsasampa ng mga kaukulang kaso.

Ang operasyon ay naaayon sa Focused Agenda ng PNP sa Enhanced Managing Police Operations, na tumatarget sa mga organisado at ilegal na aktibidad na sumisira sa kapakanan ng publiko, katatagan ng ekonomiya, at pangangalaga sa kapaligiran. Sinusuportahan din nito ang direktiba ni Pangulong Ferdinand R. Marcos Jr. na palakasin ang mga aksyong pagpapatupad laban sa mga iligal na kalakalan at iba pang aktibidad na nakakasira sa regulated industries.

Pinuri ni PNP Chief, Police General Jose Melencio C. Nartatez Jr., ang mga operating unit para sa matagumpay na operasyon.

“Hindi lamang ito usapin ng paglabag sa batas. Kapag may iligal na kalakalan ng produktong petrolyo, naaapektuhan ang kabuhayan, kaligtasan, at tiwala ng publiko. Kaya patuloy nating paiigtingin ang ating mga operasyon laban sa mga gawaing nagpapahina sa kaayusan at patas na kalakalan sa ating bansa,” sabi ni PGen Nartatez.

Binigyang-diin pa niya na ang lahat ng operasyon ng pulisya ay nananatiling nakabatay sa propesyonalismo at paggalang sa karapatang pantao.

“Patuloy nating ipatutupad ang batas nang may integridad, malinaw na proseso, at paggalang sa karapatan ng bawat isa. Ang mahalaga ay napapanagot ang mga lumalabag habang nananatiling tapat tayo sa ating tungkulin bilang lingkod-bayan,” dagdag pa ni PNP Chief Nartatez. 

(PAUL JOHN REYES)