Kina PBBM, Sotto, Erwin Tulfo, De Lima, Castro at iba pa…Ex-Marines, pinangalanan at ibinulgar na naghatid umano ng male-maletang pera 

IBINUNYAG ng 18 nagpakilalang dating Marines na naghatid umano sila ng male-maletang pera sa mga prominenteng opisyal ng gobyerno kabilang na kina Pangulong Ferdinand Marcos Jr., Senador Vicente Sotto III, Sen. Erwin Tulfo at Mamamayang Liberal party-list Representative Leila de Lima, dating ACT Teachers Party-list Rep. France Castro at iba pa.

Base sa joint affidavit ng 18 dating sundalo, na nagpakilalang mga tauhan o bagman ni dating Ako Bicol Party-list Rep. Zaldy Co, nagdeliver sila ng bilyun-bilyong pisong kickbacks mula sa mga flood control projects na nakasilid sa mga maleta, kung saan kada maleta naglalaman umano ng humigit-kumulang P48 milyon.

Sa Senate hearing sa flood control mess, isiniwalat ng isa sa ex-marines na si Johnny Buduan na noong 2022, naghatid sila ng limang maleta sa Ilocos Norte, na nakalaan umano para kay Pangulong Ferdinand Marcos Jr.

Ayon sa testigo, may mga maleta ring inihatid noong panahon ng kampanya (2022) na tinanggap umano ni Rep. Sandro Marcos habang si Zaldy Co ang kumuha ng litrato.

(Daris Jose)