30% ng kinakailangang kuryente ng mga government buildings, gawing solar

ISINUSULONG ni Manila Rep. Joel R. Chua na i-require sa kinakailangang suplay ng kuryente ng mga government buildings ay kunin mula sa solar power.
Sa ilalim ng House Bill 8711 o panukalang “Solar Government Act,” ang mga government infrastructure, buildings, at opisina sa buong bansa ay kinakailangang maglagay at gumamit ng solar energy systems.
Sakop ng panukala ang mga public schools, ospital, libraries, sports facilities, parks, museums, airports, docks, port areas, government offices, at iba pang properties na pag-aari at ginagamit ng National Government at government-owned and controlled corporations.
“The Philippines is endowed with abundant solar energy throughout the year. Harnessing this renewable resource provides the government with a practical and sustainable opportunity to reduce electricity consumption from conventional sources and stabilize long-term energy costs,” ani Chua.
Sa panukala, inaatasan ang Department of Energy (DOE), kasama ang Department of Budget and Management (DBM) at Department of Public Works and Highways (DPWH), na magbuo ng isang Solar Government Plan sa loob ng isang taon kapag ganap itong naging batas.
Kasama sa Solar Government Plan ang isang komprehensibong imbentaryo ng mga government buildings at opisina, technical and feasibility assessments, phased implementation prioritizing high-energy-consuming facilities, technical standards, at recommended financing mechanisms.
Nakasaad pa sa panukala na ang lahat ng bagong itatayo o ipinatayong government buildings at infrastructure ay dapat idinisenyo para i-accommodate at isama ang solar energy systems bilang bahagi ng kanilang standard energy infrastructure.
Ini-engganyo rin ng panukala ang mga local government units na magpatupad ng solar energy systems, sa kanilang sariling mga opisina at pasilidad. (Vina de Guzman)