Mahigit 141-K na PUVs inaprubahan para sa P10-per-liter fuel discount subsidy

MATAGUMPAY na na-upload ng LTFRB ang kabuuang 141,724 yunit ng pampasaherong jeepney at UV Express na kwalipikado sa ₱10 kada litro na diskwento sa gasolina.

Ayon kay LTFRB Chairman Vigor D. Mendoza II, ang bilang ay sumasaklaw sa lahat ng rehiyon batay sa database ng mga kwalipikadong benepisyaryo. Sa kasalukuyan, 12,688 transaksyon na ang naitala bilang matagumpay.

Nagsimula ang programa sa piling gasolinahan sa Metro Manila, katuwang ang Department of Energy (DOE).

Mula sa mahigit 50 gasolinahan, lumawak na ito sa 4,299 gasolinahan sa buong bansa.

Umabot na sa ₱13.3 milyon ang naipamahagi ng pamahalaan mula nang simulan ang programa.

Noong Abril, sa gitna ng tensyon sa Gitnang Silangan, nakipagpulong si Pangulong Ferdinand “Bongbong” R. Marcos, Jr. sa mga pinuno ng DOTr, DOE, at LTFRB upang talakayin ang iba’t ibang tulong para sa sektor ng pampublikong transportasyon, kabilang ang karagdagang fuel subsidy.

“Patunay ito na patuloy na inaalagaan ng pamahalaan ang sektor ng PUV kahit bumaba na ang presyo ng produktong petrolyo,” ani Chairman Mendoza.

Inaprubahan ni Pangulong Marcos ang ₱5,000 fuel subsidy para sa mga PUV drivers at operators.

Pinalawak din ang Service Contracting Program upang mas mapakinabangan ng mga commuter.

Ang mga gasolinahan ay ikokonekta sa database ng pamahalaan sa pamamagitan ng mobile app.

Tanging mga PUV na may balidong prangkisa ang makakakuha ng benepisyo, na may 150-litro kada linggo na limitasyon bawat yunit.

Kapag nakumpirma ang plaka, awtomatikong ibabawas ang diskwento sa presyo ng gasolina.

Ang LTFRB ang mangangasiwa sa pondo at maglalaan ng budget sa Land Bank of the Philippines para sa settlement at crediting ng fuel subsidy sa mga accredited gasolinahan. (PAUL JOHN REYES)